Kisumwa Kyalondekesa Kwa Nzwá
18 Kyabhiti o ima yiyi, ngamono anju ya mukwa kutuluka ku dyulu ni ungana wadikota. O ngongo yoso anga a imwikina ni kubhenya kwê. 2 O anju yadikola ni dízwi dya swina: “Yabu! Babilonya ya Dikota yabu! Yakituka inzo ya madimonyo ni diswamenu dya jinzumbi joso jayibha* ni dya jinjila jayibha, ja xidi! 3 O ifuxi yoso yanu o vinyu ya njinda ya undumbu wê,* o jisobha ja ngongo ja bhange-nê undumbu, o jingenji ja ngongo jakituka jimvwama mukonda dya jimbote jê ja ufusa.”
4 Ngevu dízwi dya mukwa dyatundu ku dyulu, dyambe: “Tundenu-mu enu mu mundu wami, se ki mumesena kukala ni kikuma ku ituxi yê, se ki mumesena we kutambula mbandu ku kaxtiku kê. 5 Kuma o ituxi yê yavulu, yabhixila katé ku dyulu, Nzambi wanda mufundisa, mukonda dya ima yoso yayibha yabhange. 6 Mu bhangyenu kala kyabhangele mwene ku akwâ. Kyene, mu futyenu mu luyadi o ima yabhangele. Ku kopho ya yudikile mwene, mu bhanyenu mu luyadi. 7 Mu ukexilu wa dizangeleka mwene, yu wakexile ni maumvwama mavulu mayibha, mu kwatesyenu wôma, mu bhekesyenu malamba. Mukonda mwene uzwela ku muxima wê, wixi: ‘Eme mwéne ngi mvwale, ngaxikama ku ungana! Kingala ngi mutudi, kinganda kala ni dilamba.’ 8 Mukonda dya kiki, o mabhebhu mê kala o kufwa, o dilamba ni nzala, anda kwiza mu kizuwa kimoxi ngó. Mwene anda mu jokotesa mu túbhya, mukonda Jihova Nzambi wa mu mufundisa, wala ni kutena kwadikota.
9 “O jisobha ja ngongo jabhange-nê undumbu, jatungile-nê kumoxi mu maumvwama moso mayibha, janda dila ni kudibeta bhu phetu mukonda dya dilamba dyê, kyoso kyanda mona o túbhya twa mu jokotesa o kidyanzunga. 10 Ene anda kwimana dikanga mukonda dya phaxi yê, anda zwela, exi: ‘Wawé! Wawé Babilonya, o mbanza yadikota, o mbanza yaswina, mukonda o kaxtiku ké kabhixila mu ola imoxi!’
11 “O jingenji ja ngongo, janda dila ni kudikwata mukôndo, mukonda dya Babilonya ya Dikota, kuma kikwanda kala dingi muthu usumba o imbamba yâ. 12 Ni imbamba yâ yoso ya ulu, ya phalata, ni matadi ala ni valolo yavulu, o jiphélula, o izwatu ya linyu yafina ni izwatu yakusuka, o izwatu ya seda, o izwatu yakusuka kyavulu, ni ima yoso yobhange ni mabaya anuha kyambote, ni imbamba yobhange ni mazu a nzamba, ni mabaya ala ni valolo yavulu, ni ngondo, ni felu ni matadi afwama kyavulu, 13 o kanela, o jimbutu ja Indya ji nuha kyambote, ni wasu wadizumba, ni maji anuha kyambote, ni mubafu ni vinyu, ni maji, ni fadinya ya fina, ni tiliku, ni jingombe, ni jimbudi, ni jikabalu, ni makalu, ni abhika, ni myenyu ya athu. 14 Eye Babilonya! Kindala kiwala dingi ni ima yambote i wa mesenene. O makúdya moso ni ima yoso yakatunda ya jimuka, nuka dingi wanda ku imona.
15 “O jingenji jakexile mu sumbisa o imbamba yoso yiyi, ja kituka jimvwama mukonda dya mwene, anda kwimana dikanga mukonda dya wôma wa kaxtiku kê. Ene anda kala ni malamba ni kudila jingololo. 16 Anda zwela: ‘Wawé! Wawé o mbanza yadikota, yazwata izwatu ya linyu ya fina, ni izwatu yakusuka, ni izwatu yakusuka kyavulu, ya dizwika ni imbamba ya ulu ni matadi ala ni valolo yavulu, ni jiphélula, 17 mukonda o maumvwama mê moso, abwika mu ola imoxi ngó!’
“Ni jikabhitangu joso ja jinaviyu, ni yó oso endela mu musanza ni akalakadi a jinaviyu, ni athu oso abhanga wenji ku musanza wa kalunga, anda kwimana dikanga. 18 Kyoso kyanda mona o dixi dya mutunda mu túbhya twa mbanza yajokota, ene anda dikola, exi: ‘Mbanza yebhi yasokela ni mbanza yiyi yadikota?’ 19 Ene anda dikunga mavu ku mítwe yâ, anda dikola ni kudila jingololo, exi: ‘Wawé! Wawé o mbanza yadikota! O maumvwama mê ma bhangesa kwila, yó akexile ni jinaviyu mu musanza wa kalunga, akituka jimvwama. O mbanza a ibwika mu ola imoxi ngó!’
20 “Enu ku dyulu sangulukenu, ni enu we mu athu amisolo,* ni jipoxolo ni jipolofeta, mukonda Nzambi wa kaxtikala o mbanza yadikota phala o mbote yenu!”
21 Anju yadikota yazangula ditadi dya difwangana ni ditadi dya dikota dya kuhuhila nadyu, anga uditakula ku musanza wa kalunga, wixi: “Kyene we kimoxi, kala o ditadi kya ditakula ni lusolo lwoso, Babilonya o mbanza yadikota, anda ku ibwika, kanda ku isanga dingi. 22 Momwé eye u Babilonya, athu kanda kwívwa-mu dingi o mimbu ya yó akwa kuxika o jimbánza, né ngó o mimbu ya jingimbidi, ni mimbu ya yó axika jimbendu, ni mimbu ya akwa kuxika jikoloneta. Momwé kimwanda kala dingi yó a yudika iteka, kimwanda kala dingi muthu wala ni ufunu woso-woso, né kwívwa-mu dingi o jibuya ja ditadi dya kuhuhila. 23 Momwé ki mwanda mwika dingi kandeya, athu kanda kwívwa we o dízwi dya ngayala ni dya dibhanga. Mukonda o jingenji jé, ene exile o athu afuma a ngongo, eye we wa nganala o ifuxi ni wanga wé. 24 Kyene, momwé asange-mu o manyinga a jipolofeta, a athu o sole,* ni a yó oso a ajibha mu ngongo.”