Hozeya
14 “Eye Izalayele vutuka kwa Jihova Nzambi yé,
Kuma eye wadibhale mukonda dya kituxi kyé.
2 Vutukenu kwa Jihova mu kwamba, mwixi:
‘Loloka o itondalu yetu, xikina o ima yambote itubhanga,
Twanda kubhakula o diximanu ditunda mudikanu dyetu kala jisata ja tungombe.
3 Akwa Asídya kanda tubhulula kana.
Kitwanda sambela ku jikabalu.
Kitwanda zwela dingi ku ikalakalu ya maku metu kwila: “Yene o Nzambi yetu!”
Mukonda o mon’a kitungu,* eye u mukwatela henda.’
4 Nganda misaka, kimwanda ngibhukumukina dingi,
Nganda mizola ni muxima wami woso,
Mukonda Izalayele ki nga mukwatela dingi njinda.
5 Nganda dibhanga kala ngi dimume phala akwa Izalayele.
Ene anda bwingita kala ithulu ku mukáwu.
O jindanji jâ jandaya koxi a mavu kala o jindanji ja mixi ya Libanu.
6 O jithangu jê janda dimwanga,
Wanda dizandela kala o muxi wa midiva,
Wanda kala ni dizumba dyambote kala dya mixi ya Libanu.
7 Ene anda tunga dingi bhoxi dya kilembeketa kyê.
Anda kuna jimbutu, anda bwingita kala muxi wa muvidi.
Anda fumana kyavulu kala o vinyu ya Libanu.
8 Efalayíme wanda kwibhula: ‘Iteka nganda bhanga-nayu ihi?’
Eme nganda mwivwa, nganda mulonga.
Nganda dibhanga kala ngi muxi wa junipelu wadizande.
Eme nganda dibhanga kala ngi muxi wima ibundu phala enu.”
9 Nanyi wala njimu n’a tongolole o ima yiyi?
Nanyi wala njimu, o ima yiyi ni imutetulukile?
Mukonda o jinjila ja Jihova jayuka,
O athu ayuka anda kwendela mwenyomo.
Maji akwa ituxi anda dibhala mu jinjila jiji.