Mukanda wa Phetele
2 Kyenyiki, xisenu o kuyibha kwoso, o makutu, o mangonya, o lwimbi ni kuditatela. 2 Kala mu ana awisu amivwala kindala, kalenu ni hânji yavulu ya kunwa o lete yadisanze* ya mak’â Nzambi, phala bhukaxi ka lete yiyi mutene kukula mu nzumbi ni kubhuluka, 3 mukonda enu mwamono kwila, Ngana muthu wambote.
4 Enu mwazukama kuditadi dya mwenyu. Sumbala o athu aditunu-dyu maji Nzambi wadisolo, dyene dyala ni valolo yavulu bhu pholo yê. 5 Enu mwala mu matadi a mwenyu, mu inzo a mu itunga bhukaxi ka nzumbi ya Nzambi, phala mukale mu akunji akôla, ni mutene kubhakula jisata joxikine kwa Nzambi bhukaxi ka Jezú Kidistu. 6 Mukonda kyosoneke mu Mikanda Ikôla, exi: “Talesenu! Ngita ku Ziyone o ditadi dyosole, o ditadi dya fwama, dya betakota dya kaboko. Woso uxikina o ditadi didi kanda dyela, lémbwa!”
7 Kuma mwala ni kixikanu kwa mwene, o ditadi didi dyala ni valolo phala enu. Maji phala yó kaxikana, “o ditadi dya ditunu o atungi, dyene dya kituka o ditadi dya betakota.* 8 Mwene wakituka we ditadi dibhangesa kudibhala ni ndanji ibhalesa o athu.” Ene adibhukana mukonda aditunu o mak’â Nzambi. Kyene kya axindile kyá. 9 Maji enu mwala mu “mwiji wosole, mwala mu akunji, mwala we mu jisobha, mu kifuxi kikôla, mwala mu mundu wangene wa Nzambi,” phala mwijidise o idifwa yambote* ya Yó wa mikatula mwavundu, yu wa mibheka mu mukengeji wê wakatunda. 10 Mukonda m’ukulu ki mwakexile mu mundu wa Nzambi, maji kindala mwala kyá mu mundu wa Nzambi. Mukulu Nzambi ka mi londekesele henda, maji kindala wa mi londekesa henda.
11 Phange jami jakazola, kuma mu asonyi, mu ajitu mu ngongo mumu, kolokotenu mu kulenga o jihânji ja xitu ja mulwa ita moxi dyenu. 12 Kalenu ni wendelu wambote bhupholo ya athu a mundu yú, phala kyoso ene kyanda mi tatela kwila mu athu ayibha, ene akale jimbangi ja ibhangelu yenu yambote. Mu kyenyiki ene aximane Nzambi mu kizuwa Kyê kya kufundisa.
13 Mukonda dya Ngana, tumakenu o maungana moso a ngongo, kikale o sobha mukonda mwene wa mikala kupholo, 14 kikale o jinguvulu, mukonda ene a asolo kwa sobha, phala kukaxtikala o athu abhanga o ima yayibha ni kuximana o athu abhanga o ima yambote. 15 Mukonda Nzambi wamesena kwila, mu kubhanga o mbote enu mutena kubhangesa o athu ayibha azwela o ima yakambe valolo, kudixibha.* 16 Kalenu kala mu athu ala ni ufôlo. O ufôlo wenu ki ukale divunga dya* kusweka o ima yayibha, maji kalenu mu abhika a Nzambi. 17 Xilenu o athu oso, londekesenu henda ku jiphange joso mu ngongo, Nzambi mu kwatelyenu wôma, bhanenu kijingu kwa sobha.
18 Enu mu abhika, beleselenu o jingana jenu ni kuxila kwoso, kana ngó o jingana jambote, ja tetuluka, maji we ni yó athathamana. 19 Kyoso o muthu kya dibhana ni ibhidi,* anga amutalesa hadi sé kukala ni kikuma mukonda dya kitongolwelu kyê kwa Nzambi, kiki kima kyambote. 20 Mukonda mbote yahi i mukala nayu se mukolokota mu ibhidi ya ku mibeta mukonda dya kuta kituxi? Maji se mukolokota mu ibhidi mukonda dya kubhanga o mbote, kiki kisangulukisa Nzambi.
21 Enu Nzambi kyene kya mixanena, mukonda Kidistu wa mifwila bhu kididi, yu wamixila phangu phala mu mukayele kyambote o makanda mê. 22 Mwene katele kituxi, mu kanu dyê ki mwa monekene makutu. 23 Kyoso kyakexile mu mulokalala,* mwene kakexile mwavutwila kima* we. Kyakexile ku mutalesa hadi, mwene kakexile mwa kwatesa wôma, maji o ima yoso wa ibhakula kwa Nzambi, Yó ufundisa ni kuyuka. 24 Mwene wambata o ituxi yetu ku mukutu wê bhukaxi ka taka,* phala tufwile mu ituxi yetu ni tumwena o mwenyu mu kuyuka. “Bhukaxi ka jifidila jê, enu amisake.” 25 Mukonda enu mwexile kala mu jimbudi ja jimbidila o njila, maji kindala mwavutuka ku mubhidi ni mulangi wa myenyu yenu.