Malakiya

2 “O kitumu kiki phala enu mu akunji.” 2 Kiki kyene kyambe Jihova dya ifuxi: “Se ki mungibhana mátwi, se ki muximana o dijina dyami ni muxima wenu woso, nganda mibhekela wíndwa. O mabesá menu nganda ku akitula mabhebhu. Mukidi o mabesá menu akituka kya mabhebhu. Mukonda ki mungibhana mátwi.”

3 “Talenu! Mukonda dyenu, nganda bwika o mbutu yokune kya ni kuwesa ku jipholo jenu o matobe a ibhaku i mwene mubhakula mu jifesa jenu. Anda mitexa kumoxi ni ixete yenyonyo.* 4 Kyenyiki, enu mwanda kwijiya kwila nga mibhana o kitumu kiki phala o kikutu ki ngate ni Levi kinangenene.” Kiki kyene kyambe Jihova dya ifuxi.

5 “O kikutu ki ngate ni mwene, kikutu kya mwenyu, kya kutululuka. Ngate-nê o kikutu kiki phala a ngixile.* Mwene wa ngikwatela wôma, yu waxila o dijina dyami. 6 Mwene wexile mulonga o ngonge yakidi. Ku mizumbu yê, kikwexile phulu yakima. Mwene wende n’eme ni kutululuka ni kuyuka. Wakwatekesa athu avulu kweha o phulu. 7 O kwijiya kwatokala kukala jinga mu dikanu dya mukunji. O athu atokala kusota o kitumu mu dikanu dyê, mukonda mwéne o mukunji wa Jihova dya ifuxi.

8 “Maji o njila yami mwa ibhambuka. Mwabhangesa athu avulu kubhukumukina o kijila. Ki mwakumbidila o kikutu ki ngate ni Levi.” Kiki kyene kyambe Jihova dya ifuxi. 9 “Mukonda dya kiki, nganda mibhangesa ku misebhulula ni ku mixongwena bhu pholo ya mundu woso. Mukonda ki mwa belesela o itumu yami. Eye kiwatalatala o athu oso kala kituma o Kijila, maji walondekesa katombo.”

10 “Manyi kitwala ngo ni tata imoxi? Ki Nzambi imoxi ngo wa tubhange? Mukonda dyahi-phe twa mudilungulukila mudyetu ni kukamba kubelesela o kikutu kyate Nzambi ni jikuku jetu? 11 Akwa Judá kexile jifiyele. Mu Izalayele ni mu Jeluzaleme wabhange-mu ima yayibha. Akwa Judá kaxila Jihova, yó wazolo o ima ikôla. Ene akazala ni ahatu abheza jinzambi ja jixi jengi. 12 Mu jibalaka ja Jakobo, Jihova wanda bwika-mu oso abhanga o ima yiyi, né mwene se o muthu ubhakula jisata kwa Jihova dya ifuxi.”

13 “Enu mwa mubhanga kima kyengi kya mubhangesa o kalatódyu ka Jihova kwizala ni masoxi a yó a mudila ni kukema. Mukonda dya kiki, mwene kene muxikina dingi o jisata jenu, mba kutambula kima kyoso-kyoso ki mubhakula. 14 Enu mwa mukwibhula, ‘mukonda dyahi?’ Mukonda Jihova wejiya kwila, ki wala fiyele kwa muhat’wé, wakazala-nê tunde mu unzangala, sumbala mwéne o muhat’wé watungu-nê, wate-nê o kikutu. 15 Maji mwaxaxi k’enu sayi athu, asolo ku mixima yâ kudituna kubhanga o ima yiyi. Mukonda ene amesena kuvwala ana* anda bhanga mbandu ya mundu wa Nzambi. Kyenyiki-phe alukenu ni ibanzelu yenu! Kibhukale muthu uxa muhat’wê wa unzangala, nayi musota muhatu wengi.” 16 Kiki kyene kyambe Jihova, o Nzambi ya Izalayele: “Eme ngazembe* o kudisenga, ngazembe we o muthu ubhanga o usweya.” Kiki kyene kyambe Jihova dya ifuxi. “Alukenu ni ibanzelu yenu, kibhukale muthu uxa muhat’wê.

17 “O izwelu yenu, Jihova ya mukumu kya. Maji enu mwa mu kwibhula, ‘Mukonda dyahi o izwelu yetu ya mukumu?’ Mukonda enu mwamba: ‘Woso yó ubhanga ima yayibha, muthu wambote bhu pholo ya Jihova, mwene usanguluka-nê.’ Mba mwa mu kwibhula: ‘Kwebhi kwala o Nzambi ya kuyuka?’”