Ku akwa Jihebelewu

1 M’ukulu Nzambi wazwelele ni jikuku jetu bhukaxi ka jipolofeta, mu ithangana yavulu ni mu maukexilu avulu. 2 Maji kudisukilu dya izuwa yiyi, mwene wa tu zwelela bhukaxi ka Mon’ê yó wa musolo kala mulundudi wa ima yoso. Yó bhukaxi ka mwene wabhange o ima yoso mu ngongo. 3 Mwene o kimwikinu kya kubhenya kwa Nzambi, mwene we o kilombolwelu kyafwama kya kidifwa kyê, mwene ukwatesa o ima yoso ni maka mê ala ni kutena. Kyazubha kuzelesa o ituxi yetu mwene waxikama ku mbandu ya kadilu ya Nzambi Sukeku ku dyulu. 4 Kyenyiki mwene wabetakota o jianju ndenge, kuma watambula dijina dya fwama dingi o majina a jianju ndenge.

5 Mu kifika anju yebhi Nzambi wa mwambelele kyá, kwila: “Eye u mon’ami, lelu eme nga kituka ngi tat’é?” Wambe dingi, wixi: “Eme nganda kala ngi tat’ê, mwene wanda kala mon’ami?” 6 Maji mu kutumikisa dingi mon’ê wa Phande-kumbi mu ixi, mwene wambe: “O jianju joso ja Nzambi ji mu ximane.”*

7 Yalungu ni jianju mwene wambe: “Nzambi ubhangesa o jianju jê n’a kale ni kutena kwavulu,* o jiselevende jê* mulengu wa túbhya.” 8 Yalungu ni Mon’ê, mwene wambe: “Nzambi mwéne o kyandu kyê katé ku hádya ni hádya, o mbasá ya Utuminu wê mbasá ya kuyuka. 9 Eye wazolo o kuyuka o ima yayibha wa izembe, mukonda dya kiki Nzambi, o Nzambi yé, wabeta dingi ku ku unda ni maji a kusanguluka o akwenu ndenge.” 10 Mwene wambe we, wixi: “Eye Ngana kudimatekenu wate o kaboko ka ixi, o dyulu ikalakalu ya maku mê. 11 O dyulu ni ixi ki yanda kalaku dingi, maji eye wanda nangenena. O dyulu ni ixi dyanda kuka kala kibhita ni izwatu. 12 Eye wanda ku ifuta-futa kala kibele, wanda ilungulula kyengi kala kizwatu. Maji eye phe, éye mwéne umoxi, o mivu yé ki yanda bhwa.”

13 Anju yebhi Nzambi wa mwambelele, wixi: “Xikama kumbandu yami ya kadilu, katé ki ngitula o jinguma jé bhoxi dya inama yé?” 14 Ene ki jinzumbi jibhanga o sidivisu ya Nzambi? Ene a atumikisa kala akunji phala kukwatekesa yó anda bhuluka.