Dya Dyanga Dya Malunda
21 Kyenyiki, Satanaji* ubhilukila Izalayele anga ufunyisa Davidi phala kusota kwijiya se o mundu wa Izalayele watenesa kikuxi. 2 Mukiki, Davidi wambela Jowabe ni atwameni a mundu, wixi: “Ndenu ku miji yoso ya Izalayele, tunde ku Beleseba ndu ku Dane mukondale o mundu ni ngijiye se atenesa kikuxi.” 3 Maji Jowabe wa muvutwila, wixi: “Jihova abandekese o mundu wê mu luhama. Eye ngana u sobha, o athu oso kakutokala kya? Mukonda dyahi ngana yami, eye wamesena kubhanga o kima kiki? Mukonda dyahi wamesena kubhangesa akwa Izalayele kukala ni kikuma?”
4 Maji-phe sobha waditunu kwivwa Jowabe. Kyenyiki, Jowabe wayi, wanyungu o Izalayele yoso, anga uvutuka mu Jeluzaleme. 5 Jowabe wabhana kwa Davidi o dyalwilu dya athu oso a asoneka. Mu Izalayele mwexile kazunda kamoxi ni hama a midi a mayala exile ni jixibhata, ku Judá kwexile hama jiwana ni makwinyi asambwadi a midi a mayala exile ni jixibhata. 6 Maji o miji ya akwa Levi ni ya Bejamí, Jowabe ka akwata konda, mukonda o kitumu kyabhana o sobha ki kimuwabhela.
7 O Nzambi yakidi wayibhila we kyavulu o kima kyabhange Davidi, mukonda dya kiki mwene wakastikala akwa Izalayele. 8 Davidi anga wambela o Nzambi yakidi, wixi: “Ngate kituxi kyadikota mu kubhanga o kima kiki. Ngakudyondo, loloka o kituxi kya selevende yé, mukonda ngabhange kima kya wowa.” 9 Jihova watumu Ngade, o mukwa kumona o isumwa ya Nzambi phala ku itangela kwa Davidi, mu kwamba: 10 “Ndé, utangele Davidi, wixi: ‘Jihova wambe kiki: “Ngi kubhana ima itatu, sola-bhu kima kimoxi ki ngatokala ku kubhanga.”’” 11 Kyenyiki, Ngade wayi kate kwa Davidi yu wa mwambela, wixi: “Kiki kyene kyambe Jihova: ‘Sola o kima ki wamesena: 12 Mivu itatu ya nzala mu ixi, inga mbeji jitatu ni kulenga o jinguma jé, kyoso ene kyaya ni ku kukaya? Inga Jihova u kukastikala ni xibhata yê mu izuwa itatu, kifwa ni dibhebhu mu ixi he o anju ya Jihova ibheka kibwikilu mu Izalayele yoso?’ Kindala xinganeka kyambote, u ngitangele yoso i ngatokala kuzwela kwa yó wa ngitumikisa.” 13 Davidi anga wambela Ngade, wixi: “O kima ki wa ngitumu o kusola kyabhonzo kyavulu phala eme. Ngakudyondo, muveji dya kwehela o mayala ku ngikastikala, kota se Jihova mwéne u ngikastikala, mukonda o henda yê yadikota.”
14 Mukyenyiki, Jihova watumikisa dibhebhu mu Izalayele, ku kwafu makwinyi asambwadi a midi a athu, mu Izalayele. 15 Kyenyiki, o Nzambi yakidi watumikisa anju phala kubwika Jeluzaleme. Kyoso o anju ki yaleka o maku phala kubwika, Jihova wakwatela henda ku mundu wê, yu wambela o anju yexile mubwika o mundu, wixi: “Kwabhu kya! Tulula o lukwaku lwé.” O anju ya Jihova yexile bhwa zukama ni kibhela kya Holonane, o mukwa Jebuze.
16 Kyoso Davidi kyabhetula o mesu bhulu, wamono o anju ya Jihova bhulu ni xibhata bhu maku yalungila mu Jeluzaleme. Kyenyiki, Davidi ni adyakime azwatele o izwatu ya jisaku, afukama ni pholo bhoxi. 17 Davidi wambela o Nzambi yakidi, wixi: “K’eme ngatumu kusota kwijiya se kwexile athu akuxi ku kifuxi? Éme ngalweza, éme ngate o kituxi kiki. Maji ihi yabhange o mundu* yú? Jihova Nzambi yami, ngakudyondo, o wíndwa yu wize kokwami ni ku dibhata dya tata yami, maji kana ku ubheka ku thandu a mundu wé.”
18 Kyenyiki, o anju ya Jihova yatumu Ngade kutangela Davidi n’a bande kate bhu kididi kya kubhyatela kya Holonane mukwa Jebuze, phala kutunga-ku kalatódyu phala Jihova. 19 Mukiki, Davidi wabhange yoso kala kya mutumu Jihova bhukaxi ka Ngade. 20 Kyoso Holonane kyexile muzuka o tiliku, wamono anju, o an’ê awana exile-nê kumoxi adisweka. 21 Davidi kyazukama, Holonane wa mumono, watundu ni lusolo bhu kididi kya kubhyatela, wafukamena Davidi ni pholo bhoxi. 22 Davidi wambela Holonane, wixi: “Ngisumbise* o kibhela kiki kya kubhyatela ni ngitunge-bhu kalatódyu phala Jihova. Ngisumbise-kyu mu valolo yatokala o kibhela kiki, phala o dibhebhu didi dyeza ku thandu dya mundu, dibhwe.” 23 Holonane wambela Davidi, wixi: “Xala ni kibhela kiki ngana yami u sobha, ubhakule yoso i wamesena.* Tambula o jingombe jiji phala kubhana jisata ja kwoha. Tambula we o mabaya exile mu asunga ku jingombe phala kuzuka o jimbutu, akale jihwínyi, ni tiliku phala kubhakula o jisata ja jimbutu. Yene yoso ngi kubhana-yu.”
24 Sobha Davidi wambela Holonane, wixi: “Kana, ku kibhange! Eme nganda sumba o kibhela mu valolo yatokala. Mukonda kinganda tambula kima kya kutokala phala ku kibhakula kwa Jihova, né ngo kubhakula jisata ja kwoha ji ngakambe kusumba.” 25 Kyenyiki, Davidi wasumbu o kibhela kya Holonane mu hama asamanu a jixikulu* ja ulu. 26 Davidi watungu kwenyoko kalatódyu phala Jihova, yu wabhakula jisata ja kwoha ni jisata ja paze. Davidi wasambe kwa Jihova, mwene yu wa mutambwijila mu kutumikisa túbhya ku thandu a kalatódyu ka jisata ja kwoha. 27 Mukusuluka, Jihova watumu o anju kubhaka o xibhata mu mbunda. 28 Kyoso Davidi kyamono kwila Jihova wa mutambwijila bhu kididi kya kubhyatela kya Holonane mukwa Jebuze, wasuluka ni kubhakula jisata bhu kididi kyenyokyo. 29 Mu thembu yenyoyo, o balaka ya Jihova yatungile Mozé mu kikangalakata ni kalatódyu ka jisata ja kwoha, kexile bhu kididi kya kubhezela ku Ngibiyone. 30 Maji-phe Davidi kexile mutena kuya-ku phala kwijiya o kizwelu kya Nzambi kuma wexile ni wôma mukonda dya kumona o xibhata ya anju ya Jihova.