Kala Kyasoneka Matesu
18 Mu kithangana kyenyókyo, o maxibulu azukama kwa Jezú anga a mu ibhwidisa, exi: “Nanyi o muthu wabetakota mu Utuminu wa dyulu?” 2 Mwene anga wixana kamona, u mu tula bhukaxi kâ, 3 anga u atangela, wixi: “Ngi mi ambela ni kidi kyoso kwila, se ki mu lungulule o ukexilu wenu ni mu kale kála o an’a ndenge, ki mwanda bokona mu Utuminu wa dyulu. 4 Mu kiki, woso uditulula kala o kamona kaka, mwéne o muthu wabetakota mu Utuminu wa dyulu. 5 Woso utambulula kamona kála kaka mu dijina dyami, u ngi tambulula we eme. 6 Maji woso ku twana twa ndenge tutu twa ngi xikana, ubhangesa-ku kana kamoxi kuta kituxi,* kyeji betakota ku mu kutila ditadi dya kuhuhila, dyene mu nyungina nadyu o jumendu ni ku mu bobesa mu kalunga mwazongo.
7 “Lamba dya ngongo mukonda ibhekela o ima ibhangesa o athu kuta kituxi! Mu kidi, o ima ibhangesa kuta kituxi* yanda moneka mwene, maji o yó woso u ibheka, lamba dyê! 8 Mu kiki-phe, se o lukwaku lwé mba o kinama, ki ku bhangesa ku di bhala, batula-kyu u ki takule dikanga. Kota se utambula o mwenyu ni unema mba ni kutenguna, muveji dya kukala ni maku ayadi mba inama iyadi, anga a ku takula mu túbhya ki tu jimi dingi. 9 Se dyesu dyé di kubhangesa kuta kituxi, katula-dyu, uditakule dikanga. Kota se utambula o mwenyu ni dyesu dimoxi, muveji dya kukala ni mesu ayadi, anga a kutakula mu Njena* ya wama o túbhya. 10 Dilangyenu-phe phala ki mu sebhulule muthu umoxi ku twana twa ndenge tutu, mukonda ngi mi ambela kwila ku dyulu, o jianju jâ jene mu mona o pholo ya Tata yami wene ku dyulu. 11 ——
12 “Ihi i mu banza? Se muthu ukala ni hama ya jimbudi, anga ku jimbidila mbudi imoxi, o kwila mwene kanda xisa o makwinyi avwa ni divwa ku milundu, phala kuya musota ya jimbidila? 13 Ngi mi tangela kwila, se mwene u isanga usanguluka dingi ni imoxi ya jimbidile, o makwinyi avwa ni divwa ki ji jimbidila ndenge. 14 Kyene we kimoxi, Tata yami* wene ku dyulu kamesena kwila, ku twana twa ndenge tutu kutexika né ngó kana kamoxi.
15 “Se phang’yé ukuta kituxi, ndé u mwijidise o kikuma* kyê, kikale ngó eye ni mwene ubheka wenu. Se mwene ukwivwa, eye wa mu nganyala. 16 Maji se mwene ka kwivu, ambata dingi kiyadi mba kitatu, phala maka oso a abatule mu kanu dya mbangi jiyadi mba jitatu. 17 Se mwene ka evu, tangela o kilunga. Se u dituna kwivwa katé mwene o kilunga, mwene a kukale kala muthu kaxikina Nzambi,* mba mukwa kutambula o lubhaku.
18 “Ngi mi ambela o kidi kwila, yoso imukuta mu ngongo, ku dyulu a ikutu kyá, yoso we imujituna mu ngongo, ku dyulu a ijituna kyá. 19 Ngi mi ambela dingi o kidi kwila, se kiyadi kya athu mudyenu mu ngongo, adixikinisa mu kima kyoso-kyoso kyabhinga, o Tata yami wene ku dyulu wanda kwa bhana-kyu. 20 Mukonda bhwoso bhu bhongoloka kiyadi mba kitatu kya athu mu dijina dyami, bhene bhu ngi kala mwaxaxi kâ.”
21 Phetele wa mu zukama, yu wa mu ibhwidisa, wixi: “Ngana, lukuxi lu nga tokala kuloloka phang’yami, se mwene ungita kituxi? O kwila sambwadi dya jiveji?” 22 Jezú wa mu tambwijila, wixi: “Eme ki ngi kutangela kwila lusambwadi, maji makwinyi a sambwadi ni sambwadi dya jiveji.
23 “Mukonda dya kiki, o Utuminu wa dyulu atena ku usokesa ni sobha wamesenene kubhanga jikonda ni abhik’ê. 24 Kyoso mwene kyamateka kubhanga o jikonda, a mu bhekela mubhika wamudi dikongo dya kwinyi dya midi ya jitalendu.* 25 Kuma kexile ni kitadi phala kufuta, o ngana yê watumu ku mu sumbisa mwene, o muhatu wê ni an’ê, ni ima yoso yakexile nayu, phala kufuta o dikongo. 26 Mu kiki-phe o mubhika wa mu fukamena, anga u mu dyondela, wixi: ‘Ngi kwatele henda, nganda kufuta o dikongo dyoso.’ 27 Kuma o ngana henda ya mu kwata, wa mwehela kuya, anga u mu loloka o dikongo. 28 O mubhika watundu anga udisanga ni mubhika ni mukwâ wamudi o dikongo dya hama ya denádyu, anga u mu kwata, u mu xina bhu xingu, wixi: ‘Ngi fute o dikongo dyami.’ 29 Mubhika ni mukwâ wa mu fukamena anga u mu dyondela, wixi: ‘Ngi kwatele henda, nganda kufuta o dikongo dyé.’ 30 Maji mwene waditunu. Mu kiki, watumu ku mu ta mu kaleya, katé kyeji mu futa o dikongo. 31 Kyoso o abhika ni akwâ kya mono o kima kya bhiti, a luwala kyavulu, mu kiki ayi kwa ngana ku mu tangela yoso ya bhiti. 32 Mu kyenyiki, o ngana yê wa mwixana, yu wa mu tangela, wixi: ‘Eye u mubhika wayibha! Eme nga kuloloka o dikongo dyé kyoso ki wa ngi dyondela. 33 Eye we ki watokalele kukwatela henda ya mubhika ni mukwenu, kála ki nga kukwatela henda?’ 34 Mukonda dya kiki, o ngana yê njinda ya mu kwata, anga utuma kumuta mu kaleya,* katé kyanda futa o dikongo dyoso. 35 Kyene we kyanda mibhanga Tata yami ya dyulu, se muthu mudyenu ukamba kuloloka phang’yê ni muxima woso.”