Mukanda wa Kayadi ku Akwa Kolindu
2 Kyoso ki ngandaya ku mikunda dingi, ki ngamesena ku mi luwalesa. 2 Mukonda se ngi mi luwalesa, nanyi wanda ngi sangulukisa? Enu mwéne nga mi luwalesa. 3 O ima i ngasoneka, nga i sonekena, phala ki ngi kale ni dilamba mukonda dya yó eji ngi sangulukisa, mukonda nga dyelela kwila, o ima i ngi sangulukisa i mi sangulukisa we enu. 4 Eme nga mi sonekena ni malamba ni kikote ku muxima, ni masoxi avulu. Ki nga mi sonekena phala ku mi luwalesa, maji nga bhange kiki phala mwijiye kuma nga mizolo kyavulu.
5 Se sayi muthu wa mibhekela malamba, mwene ka ngi luwalesa eme kana, maji wa mi luwalesa enu. Eme ki ngamesena kuzwela kyavulu yalungu ni maka enyá. 6 O kibazelu kyabhana o jiphange ku diyala didi kya musoko kyá. 7 Maji kindala mwatokala ku mu loloka ni muxima woso ni ku mu swinisa, phala o kikote kyê ki ki mubhangese kubhwila.* 8 Kyenyiki, nga midyóndo, mu londekesenu kwila mwamuzolo. 9 Eme nga mi sonekena we phala kumona se mwene mu tumaka o ima yoso. 10 Se mu loloka o muthu mu kima kyoso-kyoso, eme we ngi muloloka. Mu kidi, o kima ki ngaloloka (se nga loloka kituxi) nga ki bhange phala o mbote yenu, bhu pholo ya Kidistu, 11 phala Satanaji ka tutolole,* mukonda o jindunge* jê twa j’ijiya kyambote.
12 Kyoso ki ngabhixila ku Tolowade phala kuboka o njimbu yambote yalungu ni Kidistu, kwa ngi monekena ikalakalu yavulu* mu sidivisu ya Ngana, 13 maji o muxima wami watolokele mukonda ki ngasange phang’yami Titu. Mu kyenyiki, nga dilekela ni jiphange kwenyóko, éme ngayi ku Masedonya.
14 Maji tusakidila Nzambi utwendesa kumoxi ni Kidistu. Kiki kyadifu ni athu asanguluka ni kikowe kyatambula. O kwijiya kwa Nzambi kwa difwangana ni dizumba dinuha kyambote, mwene u mwanga o dizumba didi ku athu oso, bhukaxi ka kikalakalu kyetu! 15 Mukonda bhu pholo ya Nzambi twala tu dizumba dya Kidistu dinuha kyambote, mwaxaxi ka yó ala mu njila ya kubhuluka ni yó ala mu njila ya kufwa. 16 Phala yó ala mu njila ya kufwa, dizumba dya kufwa, dibhekela kalunga, maji phala yó ala mu njila ya kubhuluka, dizumba dya mwenyu, dibhekela mwenyu. Nanyi wafwama kubhanga o kikalakalu kiki? 17 Etu twafwama mwene. Mukonda etu kitwene mu sumbisa* o mak’â Nzambi, kala kyene mubhanga athu avulu. Maji twene muzwela ni kidi kyoso, kuma tu maxibulu a Kidistu. Etu twala tu akunji a Nzambi, twene mubhanga o kikalakalu kiki bhu pholo yê.