Zakadiya
1 Ku muvu wa kayadi wa utuminu wa Dályu, ku mbeji ya kanake, Jihova wambela polofeta Zakadiya,* mon’a Belekiya, mon’a Idu, wixi: 2 “Jihova wakwatela njinda yavulu ku jitata jenu.
3 “Tangela o mundu: ‘Jihova dya ifuxi wambe: ‘“Vutukenu kokwami.’ Kyene kyambe Jihova dya ifuxi, ‘eme we nganda vutuka kokwenu. Kiki kyene kyambe Jihova dya ifuxi.”’
4 “‘Kimukayele o phangu ya jitata jenu, mukonda o jipolofeta a atangele, exi: “Jihova dya ifuxi wambe kiki: ‘Ngamidyondo, ehenu o ibhangelu yenu yayibha.’”’
“‘Maji ene kabhana mátwi, kévu o izwelu yami.’ Kiki kyene kyambe Jihova.
5 ‘“Kidi kwila o jitata jenu jafu, o jipolofeta kala we dingi ku mwenyu, 6 maji o izwelu yami ni jingonge jami ji ngabhana ku jiselevende jami, o jipolofeta, jabhixila ku jitata jenu. Kyenyiki, ene avutuka kokwami, ya ambe: ‘Yoso yaxinganeka Jihova dya ifuxi kutubhanga kala kyatokala o wendelu wetu ni kutubhanga kala kyafwama o ibhangelu yetu, yene mwene yatubhange.’”
7 Mu kizuwa kya makwinyi ayadi ni kiwana, mu mbeji ya dikwinyi ni kamoxi, kifwa, o mbeji ya sebate,* ku muvu wa kayadi wa utuminu wa Dályu, polofeta Zakadiya mon’a Belekiya, mon’a Idu, watambula o njimbu yatundu kwa Jihova. 8 Zakadiya wambe, wixi: “Mu usuku, ngamono kisumwa. Kwakexile diyala wasambela ku kabalu ka kusuka. Mwene wemanene bhukaxi ka isasa yexile mu honga. Ku dima dyê kwakexile jikabalu ja kusuka, jakolo ya kyangu kya kukuta, ni jikabalu jazele.”
9 Kyenyiki, nga mwibhwidisa: “Ngana yami, yá ananyi?”
O anju yakexile muzwela n’eme ya ngitambwijila: “Nganda kutangela se yá, ananyi.”
10 O mayala emanene bhukaxi ka isasa, ambe exi: “Yá ene a atumu kwa Jihova phala kunyunga o ixi.” 11 Ene ambela o anju ya Jihova yakexile bhukaxi ka isasa, exi: “Twanyungu o ixi, twamono kwila mu ixi mwatululuka, mwabatama.”
12 Kyenyiki, o anju ya Jihova yambe: “Jihova dya ifuxi tata! Wanda dituna kate bhebhi kukwatela henda ku mbanza ya Jeluzaleme ni jimbanza ja Judá, o jimbanza ji wakwatela njinda mu makwinyi a sambwadi a mivu yoso yiyi?”
13 Jihova watambwijila o anju yexile muzwela n’eme ni izwelu yambote, iswinisa. 14 Mukusuluka, o anju yakexile muzwela n’eme ya ngambela: “Tangela o mundu: ‘Jihova dya ifuxi wambe: “Nganda zokela o mbanza ya Jeluzaleme ni Ziyone. Nganda jizokela mwene ni nguzu yami yoso. 15 Ngala ni njinda yavulu ya ifuxi yatungu ni kutululuka. Mukonda kingakwatela njinda yavulu ku mundu wami, maji o ifuxi yiyi ya atatesa kyavulu.”’
16 Jihova wambe: ‘“Jeluzaleme nganda ikwatela dingi henda. O inzo yami, anda itungulula dingi mwenyomo.” kyene kyambe Jihova dya ifuxi. “O atungi anda zonga ni mukolo, o mbanza yoso ya Jeluzaleme.”’
17 “Tangela o mundu: ‘Jihova dya ifuxi wambe kiki: “O jimbanza jami janda kwizala dingi ni ima yambote. Jihova wanda konda dingi o malamba a Ziyone, wanda sola dingi Jeluzaleme.”’”
18 Kyabhiti o ima yiyi, ngabhetula o mesu bhulu, ngamono jingela jiwana. 19 Ngebhwidisa o anju yakexile muzwela n’eme, ngixi: “O jingela jiji jilombolola ihi?” Mwene watambwijila: “O jingela jiji, jene jamwanganesa Judá, Izalayele ni Jeluzaleme.”
20 Bhenyobho, Jihova wa ngidikisa mayala awana akwa kukalakala ni jifelu. 21 Eme ngebhwidisa: “O mayala yá a mukwiza mubhanga ihi?”
Mwene wa ngambela, wixi: “O mayala yá o jingela jamwanganesa Judá, jabhangesa kwila kibhukale muthu utena kubhetula o mútwe wê. O mayala yá a mukwiza mukwatesa wôma ni kubwika o jingela ja ifuxi yaleka o jingela jâ phala kubhânga ni ixi ya Judá ni kumwanganesa o athu atungu-mu.”