Ku Akwa Loma
1 Eme Phawulu ngi mubhika wa Kidistu Jezú, a ng’ixana phala kukala poxolo, angisolo we phala kuboka o njimbu yambote ya Nzambi. 2 Tundé ukulu, Nzambi wakanena o njimbu yiyi yambote mu Mikanda Ikôla, bhukaxi ka jipolofeta jê. 3 O njimbu yiyi yalungu ni Mon’ê, watundu ku mwiji* wa Davidi. 4 Twejiya kwila mwene Mon’â Nzambi, mukonda bhukaxi ka kutena kwa nzumbi yê ikôla, Nzambi wa mu fukununa bhukaxi ka madifundu, (yú mwéne Jezú Kidistu Ngana yetu. 5 Bhukaxi ka mwene, Nzambi u tulondekesa o ngalasa yê. Kyene Jezú kya ngisolo kukala ngi poxolo, phala ku kwatekesa o athu akwa jixi jengi kukala ni kixikanu, kubelesela ni kuxila o dijina dyê. 6 Enu wenu amisolo mwaxaxi ka jixi jenyiji phala mu kayele Jezú Kidistu.) 7 Eme nga musoneka o mukanda yú phala oso ala mu Loma a azolo kwa Nzambi, yu wa exana phala kukala athu o sole:*
O ngalasa ya Nzambi Tata yetu ni kutululuka kwê ni kwa Ngana Jezú Kidistu, kukale ni enu.
8 Kya dyanga, ngisakidila Nzambi bhukaxi ka Jezú Kidistu mukonda dyenu, kuma athu oso mu ngongo a muzwela yalungu ni kixikanu kyenu. 9 Nzambi yó nga mu musidivila ni muxima wami woso mu kuboka o njimbu yambote yalungu ni Mon’ê, mwene mbangi yami ya kwila, kingene mufula ku mitumbula mu misambu yami, 10 ni kudyondela Nzambi, phala se kibhana ngitena kuya mu mikunda, se Nzambi wa kyandala. 11 Ngamesena kyavulu ku mimona, phala ku mi swinisa mu nzumbi, ni mukale ni kixikanu kyakolo, 12 kifwa, phala tu diswinise mudyetu, bhukaxi ka kixikanu kyami ni kixikanu kyenu.
13 Jiphange jami, ngamesena mwijiya kwila, mu ithangana yavulu nga mesenene ku mikunda. Nga mesenene kwiza kwenyóko phala kuboka ni ngimone o mbote ya kikalakalu kyetu, kala ki twa mumona we mu jixi jengi, maji sayi kima kya ngifidisa. 14 Eme ngala ni dikongo ku Jingeleku, ni ku akwa jixi jengi,* ni ku jinjimu ni ku yôwa. 15 Ngandala we kyavulu ku mibokela o njimbu yambote, enu oso mwala ku Loma. 16 Kingala ni jisonyi ja kubokela o njimbu yambote, mukonda yéne o kutena kwa Nzambi, kwa kubhulula woso wala ni kixikanu, kya dyanga o Jijudé, anga kukayela o Jingeleku. 17 Mukonda o kuyuka kwa Nzambi a kulondekesa kwa yó ala ni kixikanu. O kuyuka kuku, kukolesa o kixikanu kyâ, kala kyósoneke mu Mikanda ikôla kwila: “O muthu wayuka, wanda bhuluka mukonda dya kixikanu kyê.”
18 Tundé ku dyulu Nzambi ulondekesa o njinda yê, ku ima yoso yayibha ibhanga o athu. Mukonda ene afidisa o athu kwijiya o kidi. 19 Ene atena kwijiya o ima yoso yalungu ni Nzambi, kuma mwene wa alondekesa-yu. 20 Mukonda o idifwa yê yakambe kumoneka ku mesu, tutena ku imona mu ibhangelu yê yala mu ngongo. Tu tena kwijiya o idifwa yê, mu kutokwesa o ima yabhange mwene. O ima yiyi ilondekesa o kutena kwê kwa kalelaku, ni kwila mwéne Nzambi. Mu kiki, o athu katena kudituna o ima yiyi. 21 Sumbala ene ejidile Nzambi maji ka mubhana kijingu kala Nzambi yâ, né ngó ku musakidila. O ixinganeku yâ, yakituka ixinganeku yayibha, o mixima yâ yakolo, yala mwavundu. 22 Sumbala ene amba kwila jinjimu, abhiluka yôwa. 23 Muveji dya kuximana Nzambi katena kufwa, ene aximana o iteka yobhange mu kidifwanganu kya athu atena kufwa, ni jinjila, ni yama yendela ni inama iwana, ni yama idihuha ni mala bhoxi.
24 Kyenyiki, Nzambi wa ehela kukayela o jihânji jayibha jala ku mixima yâ, ene anga axidisa o mikutu yâ ni ima ya jisonyi. 25 Ene abhilula o kidi kya Nzambi mu makutu, abheza o kima kyobhange kwa Nzambi muveji dya kubheza o Mubhangi, yó atokala ku muximana katé ku hádya ni hádya. Kyene.* 26 Mukonda dya kiki, Nzambi wa ehela mu jihânji ja ufusa. O ahatu axisa o ukexilu wakuzeka ni mala, ya a ulungulula mu ukexilu wengi ki watokala. 27 O mayala we axisa o ukexilu wakuzeka ni ahatu, ya aswina mu lwimbi lwâ mu kubhanga ufusa ni mala ni akwâ. Maji ene anda tambula o kaxtiku kâ, mukonda dya ibhangelu yâ yayibha.
28 Kuma ene aditunu kwijiya Nzambi mu kidi, Nzambi wa ehela kwila asuluke mu ixinganeku yâ yayibha, phala abhange o ima ki yatokala. 29 Ene ezalele ni kubhukumuka kwoso, usweya, lwimbi, kuyibha, difuba, ujibhangânga, jimvunda, makutu, ni kutalesa hadi ku akwâ, akwa jimbwembwe.* 30 Akwa kutatela makutu, a zembe Nzambi, akwa izala, akwa ukumbu, akwa kudizangeleka, afunya jindunge jayibha, akwa kubhukumukina o jitata, 31 akamba kutendela o ima, ka kumbidila yakanena, akambe kuzola o athu ni kulondekesa o henda. 32 Sumbala ejiya o kitumu kyayuka kya Nzambi kwila, o athu a bhanga o ima yiyi a tokala kufwa, ene kasuluka ngó mu kubhanga o ima yiyi, maji aswinisa we yó abhanga o ima yiyi.