O Mukanda wa Juda
1 Eme Juda, mubhika* wa Jezú Kidistu, phange ya Tiyaku, nga sonekena yó a asolo kwala Nzambi, o Tata. Mwene wa azolo, wa alanga mukonda atokala kwa Jezú Kidistu.
2 Nzambi amizole kyavulu, o kutululuka kwê ni henda ya mikwatela, ivule dingi kokwenu.
3 Enu akwetu, ngamizolo, sumbala ngabhange yoso phala ku mi sonekena yalungu ni kubhuluka kwetu kutwala naku, maji ngamono kwila ngabhingi ku mi sonekena phala mukolokote mu kuzokela o kixikanu kyabhana Nzambi kwa yó, a asolo kwala mwene. 4 Mukonda mukaxi kenu mwamoneka athu a atangele mu Mikanda Ikôla kwila eji kwafundisa; ene athu abhumu, o henda ya Nzambi yetu a ikiti uhabu,* aditunu o mesene ni Ngana yetu, Jezú Kidistu.
5 Né mwene mwejiya o ima yoso yiyi, ngamesena ku mi lembalesa kwila, Jihova wabhulwile o mundu wê mu ixi ya Ijitu, maji ku pholo wabwikisa oso akambele o kixikanu. 6 O jianju ja kambele kuxila o ujitu wâ, ja xisa o kididi kya atokala, a ji kwika mu kitombe kwala Nzambi, ku malubhambu makolo, phala o kizuwa kyadikota kya kufundisa. 7 Kyene kyabhiti we ni akwa Sodoma ni Ngomola, ni jimbanza ja azukamene, adibhakwile mu maundumbu* ni mu jihânji ja kubhanga maufusa, enyá a atumbula kala kijimbwete phala etu, mukonda dya kwabwikisa ni túbhya.
8 Kyene kimoxi we, athu enyá mu mixima yâ akala mubanza ngó mu ima yayibha, ni kuxidisa o mikutu yâ ni maufusa, kaxila o maungana, alongolola yó atambula maujitu kwa Nzambi. 9 Maji kyoso Mingedi o alukanju* kyazokele ni Dyabhu mukonda dya kimbi kya Mozé, kasotele ku mulebhula, maji wa mwambele, wixi: “Jihova a kubazele.” 10 Mu kidi, o athu yá azwela kyayibha yalungu ni yoso yakambe kwijiya. Maji ima yoso a itendela mu ixinganeku yâ kála kibhanga o yama ki yene mu xinganeka, yéne o ima yene mu dixidisa nayu.
11 Lamba dyâ! Mukonda akayela o njila ya Kayini, atexikila mu kutondala kwa Balamu wa bhindamenene o nganyu mukonda dya lwimbi lwa kitadi. A abwikisa mukonda dya kulongolola o athu akexile ku pholo kála kya longolwele Kolá, yu wabwika. 12 Athu yá, kyakala mu kudya ni kunwa kumoxi ni enu mu jifesa ja ukamba, adibhanga kala matadi koxi a menya. Abhidi a didikila ni kudisuwa ngó ene; edi kala matuta ma bhebhuluka makambe menya, a ambata ku kitembu; edi kala mixi ki yene mu kwima ibundu mu kithangana kyatokala, ya kukuta, yovuze ni jindanji.* 13 Edi kala mabhuku ma musanza wa kalunga atakula bhukanga o kifulu kya ibhangelu ya jisonyi; edi kala jithéthembwa ja jimbidila o njila, anda jitakula mu kididi kyavundu kinéne, katé ku hádya ni hádya.
14 Enoko, o muthu wa kasambwadi ku mwiji wa Adá, wakanene we yalungu ni ene, wixi: “Talesenu! Jihova weza ni makwinyi a jimidi ja jianju jê, 15 phala kufundisa athu oso, ni kubalakala o athu akambe ku muxila mukonda dya imbamba yoso yayibha yabhange, ni malebhu oso akwa ituxi a xongwena nawu Nzambi.”
16 Athu yá, akwa kudizumina ni kudikalanganza mukonda dya ima yala nayu ku mwenyu, akayela o jihânji jâ, akala mu dizangeleka ni kuximana o athu mu mangonya, phala kutambula o nganyu.
17 Enu akwetu, ngamizolo, lembalalenu o maka madyangele kutanga* o jipoxolo ja Ngana yetu Jezú Kidistu, 18 kyoso kyexile ku myambela, exi: “Mu izuwa isukidilaku kwanda kala athu akwa kuxongwena, enda ni kukayela o jihânji jâ jayibha.” 19 Enyá, abheka kudimwanga, abhanga o ima kála o yama, o nzumbi ikôla ya Nzambi kala nayu. 20 Phange jami jakazola, swinenu ni kukolesa dingi o kixikanu kimwala nakyu, mwenda ni kusamba jinga mukutena kwa nzumbi ikôla ya Nzambi, 21 phala mukale mu henda ya Nzambi, kyoso ki muya ni kukinga o kulenduka kwa Ngana yetu Jezú Kidistu, katé kya mibhana o mwenyu wakalelaku. 22 Oso ala ni jiphata, mu akwatela henda; 23 mu abhulula ni kwasunga mu túbhya. Amukwá mwakwatela jinga henda, maji dilangyenu. Zembenu o ituxi, katé mwene ni izwatu yâ, yakwata o maxaka* ma jihânji jâ jayibha.
24 Nzambi yó utena ku milanga phala ki mudibhale, mwimane nzanza bhu pholo ya kubhenya kwê ni kusanguluka kwadikota. 25 Kwa Nzambi imoxi Mubhuludi wetu bhukaxi ka Jezú Kidistu Ngana yetu, atambule o fuma, ni kutumina, ni kutena, ni kijingu, tundé xahulu, lelu, katé ku hádya ni hádya. Kyene.