Ikalakalu ya Jipoxolo
17 Kyenyiki atundu, abhiti ku Amfipole ni ku Apoloniya, anga abhixila mu Tesalónika. Mwenyomo mwakexile dilombe* dya Jijudé. 2 Kuma kyene o kifwa kyê, Phawulu wabokona mu dilombe* yu wazwela ni athu akexile mwenyomo, mu kwa kwatekesa kutendela o Mikanda Ikôla mu jisábhalu jitatu. 3 Mwene wakexile mu kwa lombolwela ni kwa londekesa bhukaxi ka Mikanda Ikôla kwila, kyafwamene Kidistu kutala hadi, kufwa ni ku mu fukununa mw’alunga, wixi: “O yú mwéne o Kidistu, yú mwéne Jezú u nga mu mibokela-nê.” 4 Mukonda dya kiki, sayi athu mudyâ axikana Ngana, anga adibunda kumoxi ni Phawulu ni Sila. Mundu wavulu wa Jingeleku exile abhezi a Nzambi axikana we, ni ahatu avulu afuma, kyene we kyabhange.
5 Maji o Jijudé njinda ya akwata. Kyenyiki, exana mayala ayibha akexile mu nyunga-nyunga mu kitanda, adisokejeka mu kibuka, ya amateka kubhanga kavwanza mu mbanza. Ene abokona mu inzo ya Jasono mu kusota Phawulu ni Sila phala kwabheka bhukanga, bhwakexile o mundu. 6 Kuma ene kasange Phawulu ni Sila, akoko Jasono ni jiphange ja mukwá, katé ku atwameni a mbanza, exi: “O mayala ene mubhekesa o kavwanza mu jixi joso eza we mumu, 7 o Jasono wa atambulula kubhata dyê kala ajitu. O mayala yá, a mu bhukumukina o ijila ya Sézalu mu kuzwela kwila, kwala sobha yengi, o dijina dyê Jezú.” 8 Kyoso o mundu ni atwameni a mbanza kyevu o ima yiyi, a thandanganya kyavulu. 9 Ene kyazubha kutambula o lubhaku bhu maku a Jasono ni ku akwâ, a eha.
10 Mu usuku o jiphange atumikisa Phawulu ni Sila ku Beleya. Kyabhixila kwenyóko, abokona mu dilombe* dya Jijudé. 11 O akwa Beleya amesenene dingi kudilonga, o akwa Tesalónika ndenge, mukonda axikina o mak’â Nzambi ni muxima woso. Ene akexile mutokwesa o Mikanda Ikôla izuwa yoso, phala kumona se o maka akexile mudilonga exile mwene a kidi. 12 Avulu mudyâ axikana Ngana, kwexile ahatu avulu afuma, ni mayala amukwá akwa Ngelexya axikana we. 13 Maji kyoso o Jijudé jatungile mu mbanza ya Tesalónika kyevu kwila, Phawulu wexile we muboka o mak’â Nzambi ku Beleya, ayi kwenyóko phala kufunyisa ni kubhekesa kavwanza ku mundu. 14 Mu kithangana kyenyókyo o jiphange ambata Phawulu katé ku ndundu ya kalunga, maji Sila ni Timote axala ku Beleya. 15 O yó axinjikila Phawulu a mwambata katé ku Atena. Phawulu wa atangela phala Sila ni Timote a musange ni lusolo lwoso, ene anga avutuka.
16 Kyoso Phawulu kyakexile mwakinga mu mbanza ya Atena, mwene wa thathamene kyavulu mukonda o mbanza yoso yezalele ni iteka. 17 Bhukaxi ka Mikanda Ikôla, mwene wamateka kukwatekesa o Jijudé ni athu amukwá exile mubheza Nzambi mu dilombe.* Izuwa yoso mwene wakexile we muzwela ni athu mu kitanda. 18 Maji sayi jindongixi akwa Epikulu ni Jistoyiku amateka kuzoka-n’ê. Sayi yá akexile muzwela: “O diyala didi wa mu sabhula ihi?” Amukwá, exi: “Nange mwene muboki wa jinzambi ja jixi jengi.” Ene akexile muzwela kiki, mukonda Phawulu wakexile muboka o njimbu yambote yalungu ni Jezú ni difukunukinu dya madifundu. 19 Kyenyiki a mukwata, a mwambata ku Aleyopagu,* a mwibhwidisa, exi: “O kwila utena ku tutangela o ulongelu wa ubhe u wa mulonga? 20 Mukonda wa mu tutangela ima ya mu tu sasumukisa, etu twandala kwijiya ihi ilombolola o ima yenyiyi.” 21 Mu kidi, o akwa Atena ni akwa jixi jengi* atungile mwenyomo, mu kithangana kya kunyoha kexile mubhanga dingi kima kya mukwá, kikale ngó kudikunda jinjimbu ja ubhe. 22 Phawulu wemana mwaxaxi ka Aleyopagu, yu wambe:
“Enu mu akwa Atena, ngimona kwila, mwa betakota mu kuxila o jinzambi, o athu mu jimbanza ja mukwá ndenge. 23 Kyoso ki ngakexile mubhita ni kutala kyambote o ima i mwene mubheza, ngamono kalatódyu k’osoneke kiki: ‘Kobhakule kwa Nzambi twakambe ku Mwijiya.’ O yó mwa mu mubheza sé ku mwijiya, mwéne nga mu mibokela-n’ê. 24 O Nzambi wabhange o ngongo ni yoso yala-mu, Mwéne o Ngana ya dyulu ni ixi, mwene katungu mu jitembulu jobhange ku athu, 25 kabhingi muthu u mu kwatekesa, kala wabhindamena kima, mukonda mwene ubhana ku athu oso mwenyu ni kubhwima ni ima yoso. 26 Bhukaxi ka muthu umoxi mwene wabhange o ifuxi yoso mu ngongo, phala kutunga mu ixi. Wa axindila o jithembu ni jimbambe ja madyembu mweji tunga o athu, 27 phala ene asote Nzambi. Se aswina mu ku musota, anda musanga, mukonda sé-ku muthu wa mukala dikanga. 28 Mukonda dya mwene twala ku mwenyu, twene mukwenda, etu twalaku, kala kyambe amoxi ku jingimbidi jenu, exi: ‘Etu we twala tu an’ê.’
29 “Kuma tu an’â Nzambi, ki twatokala kubanza kwila o Nzambi wa difwangana ni ulu, phalata, mba ditadi dyosonge ku muthu wala hete. 30 Mu kidi Nzambi ka suwu o jithembu jenyojo kyoso o athu kyakambele o ku mwijiya, maji kindala mwene wa mutangela o athu mu ngongo yoso n’a dyele o ituxi yâ. 31 Mukonda bhukaxi ka muthu wa musolo, mwene waxindi kizuwa phala kufundisa ni kuyuka o athu oso atungu mu ngongo. Mwene walondekesa ku athu oso kwila kiki kidi, mu ku mufukununa mw’alunga.”
32 Kyoso o athu kya mwívu kuzwela yalungu ni difukunukinu dya madifundu, sayi yá amateka ku mu xongwena, amukwá ambe, exi: “Twanda ku kwívwa dingi kuzwela yalungu ni maka enyá.” 33 Kyenyiki Phawulu watundu-mu, 34 maji amoxi adibundu kumoxi ni mwene, ya axikana Ngana. Mwaxaxi kâ mwakexile Diyonizyu watokalele mu inzo ya kufundisa ya Aleyopagu, ni muhatu amwixana Damali, ni amukwá dingi.