Kala Kyasoneka Nzwá
20 Mu kizuwa kya dyanga kya semana,* Madiya dya Manda, wa dimeneka ku mbila, anga umona kuma o ditadi adikatula bhu mwelu wa mbila. 2 Mwene wayi ni lusolo mutangela Ximá dya Phetele ni dixibulu dya mukwá a mu zolele kwa Jezú. Wa atangela, wixi: “O Ngana a mukatula mu mbila, kitwejiya kwebhi kwa mutula.”
3 Kyenyiki, Phetele ni dixibulu dya mukwá ayi ku mbila. 4 Kiyadi kyâ amateka kulenga kumoxi, maji o dixibulu dya mukwá wa xisa Phetele mu kulenga, yu wa dyanga kubhixila ku mbila. 5 Mwene wabhetama, wazongola mu mbila yu wamono o milele bhoxi, maji kabokona. 6 Ximá dya Phetele wakexile mu mukayela, wabhixila we, wabokona mu mbila yu wamono o milele ya linyu yaxala bhoxi. 7 O mulele a utudile ku mútwe wa Jezú, ki wakexile dingi bhenyobho ni milele ya mukwá, maji wokute bhu mbandu yengi. 8 O dixibulu dya mukwá yó wa dyangele o kubhixila ku mbila, wabokona we, wamono yu waxikina mu ima ya mutangele. 9 Kiki kyabhiti mukonda ene kexile mutendela luwa o maka osoneke mu Mikanda Ikôla kwila, mwene atokalele ku mu fukununa mwaxaxi ka madifundu. 10 O maxibulu anga avutuka ku mabhata mâ.
11 Maji Madiya anga ukala bhu kanga dya mbila ni kudila. Wabhetama ni kuzongola mu mbila, 12 yu wamono anju jiyadi ni izwatu yazele bhu kididi bhwatudile o kimbi kya Jezú, imoxi ya xikamene bhu kididi kyakutula o mútwe, o ya mukwá ku mbandu yakutula o inama. 13 Ene a mwibhwidisa: “Muhatu, wa mu didila-hi?” Mwene wa a tambwijila: “O Ngana yami a mwambata, kingejiya kwebhi kwa mutula.” 14 Kyoso kyazubha kuzwela o ima yiyi, mwene wasakuka, anga umona Jezú wemana bhenyobho, maji kejidile kwila yó wexile Jezú. 15 Jezú wa mwibhwidisa: “Muhatu, wa mu didila-hi? Wa musota nanyi?” Mwene wabanze kwila wexile o mukalakadi wa jaludim, mu kiki, Madiya wa mwambela: “Ngana, se éye wa mwambata ngi tangele kwebhi ku wa mutula, ni ngi mwambate.” 16 Jezú wa mwambela: “Madiya!” Mwene wasakuka, yu wa mwambela mu dimi dya Hebalayiku: “Laboni!” (kiki kilombolola “Mesene!”) 17 Jezú wa mutangela: “Kana ku ngi kwata, mukonda ki ngabande luwa kwa Tata yami. Maji ndé ku jiphange jami, wa atangela, wixi: ‘Ngandaya kwa Tata yami ni Tata yenu. Kwa Nzambi yami, Nzambi yenu.’” 18 Madiya dya Manda wayi, watangela o maxibulu, wixi: “Ngana nga mu mono!” Anga wa a jimbulwila yoso ya mutangele Jezú.
19 Mu kizuwa kya dyanga kya semana, mu ngoloxi, o mabhitu a kididi mwa dyongekele o maxibulu a ajikile, mukonda dya wôma wa Jijudé. Jezú wamoneka mwaxaxi kâ, yu wambe: “O kutululuka kukale ni enu!” 20 Kyazubha kuzwela kiki, walondekesa o maku mê, ni mbanji yê. Kyenyiki, o maxibulu asanguluka mu kumona Ngana yâ. 21 Jezú wa atangela dingi: “O kutululuka kukale ni enu! Kala o Tata kya ngi tumikisa, eme wami, ngi mi tumikisa.” 22 Kyoso kyazubha kuzwela o ima yiyi, wabhusu kuthandu dyâ, wa atangela: “Tambulenu o nzumbi ikôla. 23 Se mu loloka o ituxi ya muthu, Nzambi wa iloloka kyá, maji se mu kamba kuloloka ituxi ya muthu, Nzambi kanda iloloka.”
24 Maji Tomé, a mwixanene Jingongo, watokalele ku kwinyi ni kiyadi kya jipoxolo, kakexile-bhu kyoso Jezú kya atukulukila. 25 O maxibulu amukwá a mutangela: “O Ngana, twa mumono!” Maji mwene wa ambela: “Se ngi kamba kumona o itote ya jipheleku mu maku mê, ni kuta-mu o mulembu wami, ni kuta o maku mami bhu mbanji yê, kinganda xikina.”
26 Kyabhiti dinake dya izuwa, o maxibulu a dyongekele dingi, Tomé bhwene bhwakexile. Sumbala o mabhitu a ajikile, Jezú watukuluka mwaxaxi kâ, wambe: “O kutululuka kukale ni enu!” 27 Jezú anga utangela Tomé: “Ta o mulembu wé bhabha, utale o maku mami, sununa o lukwaku lwé u lutule bhu mbanji yami. Kana kukala ni phata,* xikana!” 28 Tomé wa muvutwila: “Ngana yami, Nzambi yami!” 29 Jezú wa mwambela, wixi: “Eye waxikina mukonda wa ngi mono? Azediwa yó a kambe ku ngimona, maji né kiki axikina.”
30 Sayi dingi madiwanu avulu abhangele Jezú bhu pholo ya maxibulu mê, ka asoneka mu mukanda yú. 31 Maji o mikanda yiyi yosoneke phala muxikane kwila Jezú mwéne o Kidistu, o Mon’a Nzambi. Ni kwila mu kuxikana, mukale ni mwenyu wakalelaku bhukaxi ka dijina dyê.