Daniyele

4 “Sobha Nabukodonozolo watumikisa njimbu ku ifuxi ni ku athu oso mu ngongo. O njimbu yiyi yambe: O kutululuka kwenu kuvule, muzediwe! 2 Ni kusanguluka kwoso, ngi mitangela o ijimbwete ni madiwanu a ngibhangela Nzambi Sukeku. 3 O ijimbwete ni madiwanu mê onene. O utuminu wê unangenena. Mwene wanda tumina kate ku hádya ni hádya.*

4 “Eme Nabukodonozolo, ngatululukilyami monzo yami. O ima yexile mukwenda kyambote. 5 Maji sayi kizuwa kyoso ki ngexile muzeka mu hama yami, ngaloto nzoji ya ngikwatesa wôma. O isumwa ni ima i ngamono mu nzoji, ya ngikwatesa wôma. 6 Kiki kya ngibhangesa kutuma kwixana o jinjimu joso ja Babilonya phala ku ngilombolwela o nzoji.

7 “Kyenyiki, o akunji abhanga o ipheteka ya wanga ni akwa kuzambula we ni akwa Kaladeya,* kumoxi ni akwa kuzambula bhukaxi ka jithéthembwa, eza. Kyoso ki nga atangela o nzoji, ene alembwa ku ngitangela o dilombolwelu dyê. 8 Ku disukilu, kweza Daniyele a muluku o dijina dya Beltexazale mukonda dya dijina dya nzambi yami. Mwene wala ni kutena kwa jinzambi jikôla, éme nga mutangela o nzoji.

9 “‘Eye Beltexazale mutwameni wa akunji ene mubhanga o ipheteka ya wanga, ngejiya kyambote kwila wala ni kutena kwa jinzambi jikôla. Eme ngejiya we kwila, kikwala kikutu ki kubhonza ku kitungununa. Kyenyiki-phe, ngitangele o dilombolwelu dya isumwa i ngamono mu nzoji i ngaloto.

10 “‘Kyoso ki ngexile muzeka mu hama yami, mu nzoji ngamono muxi wadileka kyavulu mukaxi ka ngongo. 11 O muxi wakulu, wabhixila kate ku dyulu yu wadizande kyavulu. Kate bhwasuku o ngongo, athu oso atenene ku umona. 12 Mafwe mê abwingitile, wexile ni ibundu yavulu phala o athu ni yama. O yama ya mukáwu yexile musota kididi mu kilembeketa kyê. O jinjila jatele ikalanga mu jithangu jê.

13 “‘Kyoso ki ngexile muzeka mu hama yami, ngaloto nzoji. Mu nzoji, ngamono mukunji wexile mutunda ku dyulu. 14 O mukunji wadikola ni dízwi dyaswina, wixi: “Kokenu o muxi, batulenu o jithangu jê, lalumunenu o mafwe mê, o ibundu yê mu imwanga! O yama yabutamena mu kilembeketa kyê ni jinjila jatula mu jithangu jê, jilenge. 15 Maji o kixinji kixale ni jindanji jê mu mavu, mukaxi ka isasa ya mukáwu. Mu kizwikika lubhambu lwa felu ni lwa ngondo. O kixinji kyenyiki akibetese ku mbundu i lawuka ku dyulu. O kudya kwê kukale yangu mukwa ni yama. 16 O kilunjikyê a kilungulule, kikale mukwa ni kyama, kate ki kubhita sambwadi dya mivu.* 17 O kitumu a kibhana ku akunji phala ku kitula, athu oso n’ejiye kwila, o ungana wa Sukeku wabetakota o utuminu wa athu ndenge, ni kwila, se mwene wandala, u ubhana ku muthu woso-woso né mwene se ngadyama mwaxaxi ka athu.”

18 “‘Yiyi yene o nzoji i ngaloto, eme sobha Nabukodonozolo. Eye-phe u Beltexazale, ngitangele o dilombolwelu dyê, mukonda o jinjimu joso ja utuminu wami, alembwa. Maji eye utena ku kibhanga, mukonda wala ni kutena kwa jinzambi jikôla.’

19 “Bhenyobho, Daniyele a muluku o dijina dya Beltexazale, wadiwana. O ixinganeku yê yamateka ku mukwatesa wôma.

“O sobha wa mwambela: ‘Beltexazale, kana kwehela o dilombolwelu dya nzoji yiyi, ku kukwatesa wôma.’

“Beltexazale watambwijila: ‘Ngana yami, kingimesenene kwila, o nzoji yiyi i dikumbidila kokwé. Hinu yadikumbidila kwa yó a kuzembe.

20 “‘O muxi u wamono eye ngana, wakulu, wabhixila kate ku dyulu yu wadizande kyavulu kate bhwasuku o ngongo, athu oso atenene ku umona, 21 mafwe mê abwingitile, wexile ni ibundu yavulu phala o athu oso ni yama, o yama ya mukáwu yexile musota kididi mu kilembeketa kyê, o jinjila jatele ikalanga bhu jithangu jê, 22 o muxi yú, ulombolola éye mwene ngana, u sobha, mukonda eye wakulu, wadizande kyavulu, o kijingu kyé kyabhixila kate ku dyulu. O ungana wé wabhixila ku maxokololo a ixi.

23 “‘O sobha wamono mukunji, muthu ukôla wexile mutunda ku dyulu, wexile muzwela, wixi: “Kokenu o muxi! Mu ubwika! Maji o kixinji kixale ni jindanji jê mu mavu, mukaxi ka isasa ya mukawu. Mu kizwikika lubhambu lwa felu ni lwa ngondo. O kixinji kyenyiki, a kibetese ku mbundu i lawuka ku dyulu, kudya kwê kukale yangu mukwa ni yama, kate ki kubhita o sambwadi dya mivu.” 24 Sobha ngana yami, o dilombolwelu dya nzoji dyenyidi: Kiki kitumu kya Nzambi Sukeku, kyanda dikumbidila kokwé ngana yami, u sobha. 25 Eye ngana, mwaxaxi ka athu anda kukaya-mu, wa kà tunga ni yama ya mukáwu, anda kubhana yangu phala kudya mukwa ni jingombe. O mbundu i lawuka ku dyulu yanda kubetesa, kate ki kubhita sambwadi dya mivu anga uxikina kwila, o ungana wa Sukeku wala kota, o mautuminu a athu ndenge, mwene u ubhana ku muthu woso-woso, né mwene se ngadyama mwaxaxi ka athu.

26 “‘Kuma atumu kuxisa o kixinji kya muxi ni jindanji jê, eye ngana, o utuminu anda kuvutwila-u dingi kyoso ki wanda xikina kwila ku dyulu kwala muthu utumina. 27 Kyenyiki sobha, xikina o kayula kami, kute dingi kituxi, bhanga ima yambote. Kwatekesa o jingadyama, kana kubhanga ima yayibha. Se kyene ki ubhanga, wanda kala ku mwenyu mu mivu yavulu, wanda zediwa we.’”

28 Ima yoso yiyi yabhiti ni sobha Nabukodonozolo.

29 Mu kubhita kwinyi ni kiyadi kya jimbeji, o sobha wayi ni kwimajana ku ditala dya inzo yê mu mbanza ya Babilonya. 30 O sobha wayi ni kuzwela, wixi: “Yiyi yene o mbanza yadikota ya Babilonya i ngatungu phala o inzo ya sobha ikale mwenyomo. Nga itungu ni nguzu ni kutena kwami, phala o kijingu kyami kiye ni kufumana.”

31 Kyoso sobha kyayi ni kuzwela, kwatundu dízwi ku dyulu, dixi: “O njimbu yiyi phala eye sobha Nabukodonozolo: ‘O ungana a kutambula-wu. 32 Eye ngana, mwaxaxi ka athu anda ku kaya-mu, wanda tunga ni yama ya mukáwu. Anda kubhana yangu phala kudya mukwa ni jingombe, kate ki kubhita sambwadi dya mivu anga uxikina kwila, o ungana wa Sukeku wala kota o mautuminu a athu ndenge, ni kwila mwene u ubhana ku muthu woso-woso né se ngadyama mwaxaxi ka athu.’”

33 O izwelu yiyi ya dikumbidila mu kithangana kyenyokyo. Nabukodonozolo mwaxaxi ka athu a mukaye-mu, wamateka kudya yangu mukwa ni jingombe, o mukutu wê a ubetesa ku mbundu ilawuka ku dyulu, kate ndemba yê ki yalebhelela kala ndemba ya holokoko, o yala yê yalebhelela mukwa ni yala ya jinjila.

34 O sobha wambe, wixi: “Kyoso kyabhiti o sambwadi dya mivu eme Nabukodonozolo ngabhetula o mesu, ngatale ku dyulu, anga ngikala dingi ni kilunji. Kyenyiki, ngasakidila Sukeku, ngaximana yó wene ku mwenyu, nga mubhana kijingu, mukonda o utuminu wê unangenena. O ungana wê wanda nangenena, kutunda mwiji kwiza mwiji. 35 O athu oso mu ngongo mu ku asokesa ni Nzambi, kingoho. Mwene ubhanga yoso yamesena ni kifuxi kya dyulu ni athu mu ngongo, séku muthu utena ku mufidisa mba ku mwibhwidisa: ‘Ihi i wa mubhanga?’

36 “Mu kithangana kyenyokyo, o kilunji kyami kyeza kiwa. Ngatambula dingi o ungana wami ni kijingu kyê kyoso, ngafumana dingi. O jikabhitangu ni ilamba amateka dingi kwiza mu ngibhinga kayula. Ngamateka dingi kutumina ni kutambula kijingu, ki ngexile-nakyu m’ukulu, ndenge.

37 “Kindala, eme Nabukodonozolo ngisakidila, ngiximana o Sobha ya dyulu, mukonda o ibhangelu yê yoso yakidi, o jinjila jê jayuka. O yó adizangeleka, mwene u atulula.”