Kala Kyasoneka Luka

19 Jezú wabokona mu Jedikó, anga ukala mubhita mu mbanza yenyóyo. 2 Mwenyomo mwakexile diyala mvwama, amwixana Zakewu. Mwene wexile mutwameni wa akwa kutambula o lubhaku. 3 Wa mesenene kyavulu kumona Jezú, maji katenene mukonda dya kifuxi, kuma wa butile. 4 Mwene walenge ni lusolo ku pholo, wahabe ku muxi wa mufiku, mukonda Jezú weji bhita kwenyóko. 5 Kyoso Jezú kyabhixila bhu kididi kyenyókyo, watale bhulu yu wambe: “Zakewu, tuluka, mukonda lelu nganda kala mu inzo yé.” 6 Kyenyiki, Zakewu watuluka ni lusolo, anga u mu tambulula kubhata dyê ni kusanguluka. 7 Kyoso o athu kyamono kiki, amateka kudikalanganza ni kuzwela: “Mwene wayi phala ku mu zalela mu inzo ya mukwa ituxi.” 8 Bhenyobho Zakewu wemana, yu watangela Ngana, wixi: “Ngana, nganda bhana kaxaxi ka jimbote jami ku jingadyama. Muthu woso nga mu nyana o kitadi kyê mu ku mu dingila, nganda mu futa luwana.” 9 Jezú anga u mwambela: “Lelu o kubhuluka kweza mu inzo yiyi, mukonda eye we u mon’a Mbalahamu. 10 Kuma o Mon’a muthu weza musota ni kubhulula, o athu ajimbidila.”

11 Kyoso o maxibulu kyakexile mu kwívwa o ima yiyi, Jezú wa atela kifika kyengi mukonda azukamene ku Jeluzaleme. Ene akexile mu banza kwila o Utuminu wa Nzambi weji tukuluka kyá. 12 Mwene wambe, wixi: “Sayi diyala mon’a ngana, wayi ixi ya dikanga phala kutambula usobha, n’a vutuke. 13 Mwene wexana dikwinyi dya abhik’ê, wa abhana dikwinyi dya mabele a phalata.* Anga wa ambela, wixi: ‘Bhangenu wenji ni kitadi kiki, katé kinganda vutuka.’ 14 Maji o akwá ixi yê a muzembele, anga atumikisa akunji phala ku mu tangela: ‘Ki tu mesena kwila eye ukala u sobha yetu ni ku tu tumina.’

15 “Kyazubha kutambula o usobha,* mwene wavutuka anga wixana o abhika atambwile o kitadi,* phala kwijiya yoso ya nganyala mu wenji wâ. 16 Kyenyiki, o mubhika wa dyanga wa muzukama, yu wambe: ‘Ngana, kukitadi ki wa ngibhele kwa dibandekesa dikwinyi dya mabele amukwá.’ 17 Mwene wa mwambela: ‘Kya wabha, u mubhika wambote! Kuma walondekesa ufiyele mu kima kyofele, wanda tumina dikwinyi dya jimbanza.’ 18 O wa kayadi wa muzukama, yu wambe: ‘Ngana, ku kitadi ki wa ngibhele, kwa dibandekesa kitanu kya mabele amukwá.’ 19 Mwene wambela we o mubhika yú, wixi: ‘Eye we wanda tumina mbanza jitanu.’ 20 Maji o mukwá, weza yu wambe: ‘Ngana kitadi kyé kiki, nga kiswekele mu mulele. 21 Eme ngakexile ni wôma, mukonda eye u muthu wabhonzo. Ukatula bhu wakambe o kubhaka, ubhongolola bhu wakambe o kukuna.’ 22 O ngana wa muvutwila, wixi: ‘Eye u mubhika wayibha! Ngi kufundisa mu izwelu yé. Mbé wejidile kwila, ngi muthu wabhonzo, ngikatula bhu nga kambe o kubhaka, ngi bhongolola bhu nga kambe o kukuna? 23 Mukonda dyahi-phe ki wate o kitadi* kyami mu inzo ya kubhaka kitadi ni ngi kitambule ni kibandekesu kyoso kingeji vutuka?’

24 Kyenyiki, wambela o athu akexile bhenyobho, wixi: ‘Mutambulyenu o kitadi kyala nakyu, mu kibhane kwa yó wala ni dikwinyi.’ 25 Ene ambela o Ngana, exi: ‘Ngana, mwene wala kyá ni dikwinyi dya mabele!’ 26 Maji mwene wa atangela: ‘Ngi myambela kwila, woso wala ni kima anda mubhana dingi, maji woso kala ni kima, katé mwene ni kima kyofele kyala nakyu, anda mutambula-kyu. 27 Ngi bhekelyenu we o jinguma jami jiji, kamesenene kwila ngi kala ngi sobha yâ. Mu ajibhe bhu pholo yami.’”

28 Kyazubha kuzwela o ima yiyi, mwene wasuluka ni njila yê mu kubanda mu Jeluzaleme. 29 Kyoso kyazukama mu sanzala ya Betefaje ni ya Betanya, ku Mulundu wa Midiva, mwene watumikisa kiyadi kya maxibulu mê, 30 yu wa atangela: “Ndenu mu sanzala i mwa mumona, kyoso ki mwanda bhixila, mwanda sanga-mu jumendu yókute, kiluwa muthu u isambela. Mu ijituna, mwize nayu bhabha. 31 Maji se bhukala muthu u m’ibhwidisa: ‘Mukonda dyahi mwa mu ijituna?’ Mutangelyenu kwila, ‘o Ngana wa ibhindamena.’” 32 O maxibulu a atumu, ayi, anga asanga o jumendu kála kyatangele mwene. 33 Kyoso ene kyakexile mu jituna o jumendu, o athu avu o jumendu, ebhwidisa o maxibulu, exi: “Mukonda dyahi mwa mujituna o jumendu?” 34 Ene atambwijila: “O Ngana wa ibhindamena.” 35 Ene ayambata kwa Jezú, ate o izwatu yâ kuthandu dya jumendu, mwene anga u sambela-ku.

36 Kyoso Jezú kyakexile muya ni kwenda, o athu akexile muzala o izwatu yâ mu njila. 37 O kyazukama mu njila ikulumuka ku Mulundu wa Midiva, o maxibulu oso amateka kusanguluka ni kuximana Nzambi ni mázwi aswina mukonda dya madiwanu amwene. 38 Ene akexile muzwela, exi: “A taneku yó wiza kala Sobha mu dijina dya Jihova! O kutululuka kukale ku dyulu. O fuma ikale kwa Nzambi ku dyulu!” 39 Sayi Jifalizewu jakexile mw’axaxi ka mundu a mwambela: “Mesene, bazela o maxibulu mê, n’a dixibhe.” 40 Maji mwene wa avutwila: “Ngi mi tangela kwila, se ene adixibha, o matadi anda dikola.”

41 Kyoso mwene kyazukamene, watale o mbanza, yu wa didi, 42 anga u zwela, wixi: “Wawé, tamanu se wa tongolwele o ima yeji kubhekela o kutululuka. O kiki-phe, o ima yiyi yosweke ku mesu mé. 43 Mukonda kwanda kwiza izuwa, o jinguma jé janda kukondoloka ni mixi yosonge ni ku kuxita* mu jimbandu joso. 44 Ene anda kubwikisa kumoxi ni twana twé, kanda xisa bhabha ditadi dimoxi kuthandu dya mukwá, mukonda kweza o kithangana kya ku kufundisa,* maji eye ki wa kitongolola.”

45 Mwene anga ubokona mu tembulu, wamateka kukaya o athu akexile mu sumbisa, 46 yu wazwela: “Kyosoneke: ‘Inzo yami yanda kala inzo ya kusamba,’ maji enu mwa ibhange kididi kya kuswamena-mu miyi.”

47 Izuwa yoso mwene wasuluka mu kulonga mu tembulu. Maji o akunji a makota, ni jimesene ja kulonga o Kijila ni atwameni a ifuxi akexile musota ndunge phala ku mujibha. 48 Ene-phe ka isange, mukonda o mundu woso wakexile mu mwivwa kyambote.