Amoji
3 “Enu mu akwa Izalayele, ivwenu o njimbu ya mitangela Jihova yalungu ni mwiji woso wakatula mu ixi ya Ijitu:
2 ‘Ku miji yoso mu ngongo ngamisolo* ngo enu.
Mukyenyiki, nganda mikastikala mukonda dya itondalu yenu yoso.
3 O kwila athu ayadi atena kwendela kumoxi, se kabakana?
4 O kwila o hoji izumé ngo mu muxitu, sé kukwata kima?
O kwila o kana ka hoji kazumé ngo mu ngenda yê, se kikakwata kima?
5 O kwila o njila itena kubwa bhu mubhetu wala bhoxi, se wene ka oleka?
O kwila o mubhetu wala bhoxi uzabuké ngo , se bhene kibhwabu kima?
6 Kyoso kyaxika o koloneta mu mbanza o athu kateketa?
Kyoso ki kubhita divuwa mu mbanza, ki Jihova wadibheka?
7 Mukonda o Ngana Jihova, Sukeku, kanaku kima kyabhanga,
Anga ukamba kwijidisa o kikutu kyê ku jiselevende jê, o jipolofeta.
8 Se o hoji izuma, nanyi ukamba kukala ni wôma?
Se Ngana Jihova, Sukeku uzwela, polofeta yebhi yanda dixibha?’
9 ‘Bhanenu o ngolokela yiyi mu jisabhalalu jakatunda jala ku Ajidode,
Ni mu jisabhalalu jakatunda jala ku Ijitu,
Mwixi: “Dibhongololyenu ku milundu ya Samadiya,
Talenu o izulukutu ya mubhita mu mbanza,
Ni wiyi wa athu mwenyomo.
10 Jihova wambe, wixi: “Ene kejiya kubhanga ima yambote.
Ene ezalesa o jisabhalalu jakatunda ni ima yatambula mu usweya wâ.”’
11 Kiki kyene kyambe Ngana Jihova, Sukeku:
‘Sayi nguma wanda kondoloka o ixi yé,
Anda kukatula o kutena kuwala-naku,
Anda kwambata o ima yoso yala mu jisabhalalu jé jakatunda.’
12 Kiki kyene kyambe Jihova:
‘Kala o mubhidi utambula o inama iyadi mba mbandu ya ditwi dya mbudi mu dikanu dya hoji,
Kiki kyene kyanda bhita ni akwa Izalayele,
Athu ofele ngo anda bhuluka bhu maku a jinguma jâ.
Yó ala ku Samadiya axikama ku jihama jâ jafwama ni ku yalu yâ yafwama.’*
13 ‘Ivwenu, tangelenu o dibhata dya Jakobo,’ kyene kyambe Ngana Jihova, Sukeku, o Nzambi ya ifuxi.
14 ‘Mu kizuwa ki nganda kastikala akwa Izalayele mukonda dya kubhukumuka kwâ,
Nganda bula we o jikalatódyu ja Betele,
Nganda batula o jingela ja kalatódyu, janda bwa bhoxi.
15 Nganda bula o inzo yotunge phala o kithangana kya mbambi ni inzo yotunge phala o kithangana kya mvula.
‘O jinzo jobhange ni mazu a nzamba nganda jibwika,
O jinzo jamakota* nganda jibwika we, kyene kyambe Jihova.”