Kala Kyasoneka Matesu

11 Kyoso kyazubha kubhana o itendelesu ku kwinyi ni kiyadi kya maxibulu mê, Jezú watundu bhu kididi kyenyókyo, yu wayi mu boka ni kulonga mu jimbanza ja mukwa.

2 Mu kaleya, kyoso Nzwá kyevu yalungu ni ikalakalu ya Kidistu, mwene watumikisa o maxibulu mê, 3 phala ku mu ebhwidisa: “O kwila Éye Mwene Yó u twene ku mu kinga, inga tu kinga muthu wengi?” 4 Jezú wa avutwila, wixi: “Ndenu mwa tangele Nzwá o ima i mwa mu mona ni i mwa mu kwivwa: 5 O ifofo ya mu mona, o inema ya mu kwenda, o akwa mabhute a mwa saka, o afu o mátwi a mu kwívwa, o madifundu a mwa balumuna, o jingadyama a mwa tangela o njimbu yambote. 6 Wazediwa yó kasange kima ko kwami ki mu bhangesa kudibhukana.”

7 Kyoso ene kyavutuka, Jezú wamateka kutangela o mundu yalungu ni Nzwá, wixi: “Mwayile mu mona ihi mu mukáwu? Mwenge a u takujula ku kitembu? 8 Kyenyiki-phe, mwayile mu mona ihi? Diyala dya zwata izwatu ya katunda? O akwa kuta izwatu ya katunda atungu mu jinzo ja jisobha. 9 Mu kiki-phe, mukonda dyahi mwayi-ko? Phala kumona polofeta? Kyene, ngi mi ambela kwila mwene wa betakota, polofeta ndenge. 10 Yú mwéne a mu soneka, exi: ‘Talesa! Ngi tumikisa mukunji wami bhu pholo yé, wanda ku twamenena phala ku ku yudikila o njila!’ 11 Ngi mi tangela o kidi kwila, ku athu a avwala ku ahatu, kiluwa kumoneka muthu watúndu Nzwá dya Batizu. Maji o muthu wala ndenge mu Utuminu wa dyulu, wa betakota o Nzwá ndenge. 12 Tundé mu izuwa ya Nzwá dya Batizu katé lelu, o athu ene mu sota o Utuminu wa dyulu ni kuswina kwoso, o yó a di swinisa éne abokona-mu. 13 Mukonda o Jipolofeta ni Kijila kya Mozé, kyatange o ima yoso yeji bhita katé mu izuwa ya Nzwá; 14 Kikale se mu xikina mba kana, Nzwá mwéne Elija a mu kanene ku jipolofeta kwila weji kwiza. 15 Woso wala ni mátwi, évwe.

16 “O mwiji yú-phe ngi usokesa ni nanyi? Wasokela ni twana twa ndenge axikama mu itanda, adikola ku makamba mâ, 17 exi: ‘Etu twa mi xikila mbéndu maji enu ki mu xikina kukina; twa mi xikila mimbu ya malamba, maji enu ki mu di kwata mukôndo.’ 18 Kyene we kimoxi, Nzwá weza sé kúdya né kunwa, maji o athu amba kwila, ‘mwene wala ni dimonyo.’ 19 O Mon’a muthu weza mu kúdya ni kunwa, maji o athu amba kwila, ‘Talesenu! Diyala dya wabhela kúdya kyavulu ni kunwa vinyu, kamba dya akwa kutambula lubhaku ni dya akwa ituxi.’ Mu kiki-phe o unjimu a utongolola bhukaxi ka ibhangelu yê.

20 Kyenyiki, mwene wamateka kubazela o athu mu jimbanza mwa bhangele o madiwanu, mukonda ene kadyela o ituxi yâ: 21 “Lamba dyé Kolazine! Lamba dyé Betesayida! Mukonda se o madiwanu abhiti mu jimbanza jenu, abhitile mu jimbanza ja Tilu ni Sidónya, ene eji dyela kyá ukulu ni kuzwata izwatu ya jisaku ni ku dikunga uthôkwa. 22 Ngi mi ambela kwila, mu Kizuwa Kya Kufundisa, o divuwa dyenu dyanda betakota, o dya mbanza ya Tilu ni Sidónya ndenge. 23 Abha eye Kafalanawú, o kwila anda kuzangeleka katé ku dyulu? Wanda kuya Mw’alunga,* mukonda se o madiwanu abhiti momwé, abhitile mu Sodoma, yene yeji nangenena katé lelu. 24 Maji ngi mi ambela kwila, mu Kizuwa Kya Kufundisa, o divuwa dyenu dyanda betakota, o dya ixi ya Sodoma ndenge.”

25 Mu kithangana kyenyókyo Jezú wambe, wixi: “Tata, Ngana ya dyulu ni ixi, ngi kuximana bhu pholo ya athu oso, mukonda wa sweka o ima yiyi ku jinjimu ni kwa yó adimuka, eye wa ijidisa ku an’a ndenge. 26 Kyene, Tata, mukonda kyene kya kuwabhela ku kibhanga. 27 Ima yoso a ngi bhana-yu kwa Tata yami. Sé-ku muthu wejiya kyambote o mona kikale ngó o Tata, sé-ku we muthu wejiya kyambote o Tata kikale ngó o mona, ni yó woso o mona usola ku mwijidisa nê. 28 Zenu kokwami enu oso mwa bhwila ni enu mwa tohoka ni imbamba ya mi nemena, phala ngi mi nyohese. 29 Ditwikyenu o muhamba wami, mu dilonge ko kwami, mukonda nga batama, nga lenduka muxima, ni mu sange kutululuka ku myenyu yenu. 30 Mukonda o muhamba wami wa bhebhuluka,* o imbamba i ngi mi twika na-yu ki i neme.