Kala Kyasoneka Luka
18 Jezú anga wa atela kifika phala kwalonga kwila, ene atokala kusamba, sé kubhwila. 2 Mwene wambe: “Mu mbanza imoxi mwakexile mufundixi kakexile ni wôma wa Nzambi, né kuxila muthu. 3 Mwenyomo mwakexile we mutudi wa muhatu, mwene anga ukolokota muzwela ni mufundixi ni ku mutangela: ‘Batula kyambote o maka ungala nawu ni nguma yami.’ 4 Ithangana yavulu o mufundixi kamesenene kubatula o maka. Maji mu kusuka-ku, mwene waxinganeka mudyê, wixi: “Eme kingala ni wôma wa Nzambi, kingene we muxila muthu. 5 Kuma o mutudi yú wene mu ngi zukutisa kyavulu, nganda mubatula o maka ni kuyuka phala ka ngi zukutise dingi, katé kyanda ngi kuma.’” 6 O Ngana wambe, wixi: “Mwevu yazwela o mufundixi, sumbala wexile muthu wayibha? 7 Nzambi ukwatela we mwanyu ku jiselevende jê. Kyenyiki-phe, o kwila mwene kanda batula ni kuyuka o maka a jiselevende jê, ene ku mu dyondela usuku ni mwanya? 8 Ngi myambela kwila, mwene wanda batula o maka mâ ni lusolo ni kuyuka. O kwila kyoso o Mon’a muthu kyanda bhixila, wanda sanga mu ngongo kixikanu kyadifu kála kiki?”*
9 Mwene watele we kifika kya mukwá phala o athu akexile mu dyelela mu kuyuka kwâ, kakexile mu suwa akwâ: 10 “Kiyadi kya mala abandele mu tembulu phala kusamba: Umoxi wexile Falizewu, o mukwá wexile mukwa kutambula lubhaku. 11 O Falizewu wemana, anga umateka kusamba ku muxima wê, wixi: ‘Nzambi, nga kusakidila mukonda eme ki ngala kala o athu a mukwá: Ala miyi, akamba o kuyuka, akwa jiphánda, né mwene kala yú, o mukwa kutambula o lubhaku. 12 Ngene mu jejuwala* luyadi ku semana, ngibhana o dijimu dya ima yoso i ngitambula.’ 13 Maji o mukwa kutambula o lubhaku, wemana dikanga, mwene kamesenene né ngó kubhetula o mesu ku dyulu, maji ni kudibeta mu thulu, wambe: ‘Nzambi, ngi kwatele henda, eme ngi mukwa ituxi.’ 14 Ngi myambela kwila, o diyala didi mu kuvutuka kubhata, wa betakota mu kuyuka, o Falizewu ndenge. Mukonda woso udizangeleka, anda mu tulula. Woso-phe uditulula, anda mu zangeleka.”
15 O athu akexile we mu mu bhekela o twana twa ndenge, phala kwa akwata. Maji, o maxibulu kya kimono, amateka kubazela o athu. 16 Jezú watumu ku mu bhekela o twana bhu mbandu yê, yu wambe: “Ehelenu o twana twa ndenge kwiza kokwami, ki mwa afidise. Mukonda o Utuminu wa Nzambi watokala kwa yó ala kála ene. 17 Ngi mitangela o kidi kwila, woso ukamba kutambulula o Utuminu wa Nzambi kála mona ndenge, kanda bokona-mu.”
18 Sayi mutwameni wa Jijudé wa mwibhwidisa: “Mesene Yambote, ihi i nga tokala o kubhanga phala ngi tambule o mwenyu wakalelaku?” 19 Jezú wa mu tambwijila: “Mukonda dyahi wa mu ng’ixana Mesene Yambote? Kibhwala muthu wambote, maji Nzambi ngó.” 20 Eye wejiya o itumu yiyi: ‘Kana kuta phánda, kana kujibha, kana kunyana, kana kubhana umbangi wa makutu, xila tat’enu ni mam’enu.’” 21 O diyala wambe: “Tundé mu undenge wami, ngene mu kumbidila o itumu yiyi.” 22 Kyazubha ku mwivwa, Jezú wa mwambela: “Kima kimoxi kya kukambe. Ndé wa kà sumbise o jimbote joso jiwala naju, o kitadi u kibhane ku jingadyama, phala ukale ni jimbote ku dyulu, anga wize ni ukale u mukayedi wami.” 23 Kyoso mwene kyevu o maka enyá, waluwala kyavulu, mukonda wexile mvwama.
24 Jezú wa mutale, yu wambe: “Kwanda bhonza kyavulu phala o jimvwama kubokona mu Utuminu wa Nzambi! 25 Mu kidi, ki kibhonzo o kamelu kubhita bhu kadikungu ka nguya, maji kibhonza dingi phala o mvwama kubokona mu Utuminu wa Nzambi.” 26 O athu evu o maka enyá, ebhwidisa: “Se kyene, nanyi-phe utena kubhuluka?” 27 Jezú wambe: “O ima imona o athu kwila ki itena kubhita, kwa Nzambi itena.” 28 Phetele anga uzwela, wixi: “Talesa, twaxisa o ima yoso, etu twa kukayela.” 29 Jezú wa atangela, wixi: “Ngi mi ambela o kidi, sé-ku muthu waxisa dibhata, muhatu, jiphange, tata ni mama mba twana, mukonda dya Utuminu wa Nzambi, 30 ukamba kutambula dingi kyavulu mu thembu yiyi, o ku mundu* wobhe, o mwenyu wakalelaku.”
31 Mwene wexana o kwinyi ni kiyadi kya jipoxolo bhu mbandu, anga wa atangela: “Ivwenu! Mu Jeluzaleme mu twa mu banda, o ima yoso yasoneka o jipolofeta yalungu ni Mon’a muthu yanda dikumbidila. 32 Mwene anda mu bhakula bhu maku a athu akwa ifuxi, anda mu sebhulula, ku mu xongwena ni ku mu phamena mathe. 33 Kyoso kyanda zubha ku mubeta, anda mujibha, maji mu kizuwa kya katatu, anda mu fukununa.” 34 Maji o jipoxolo katendela o izwelu yiyi, mukonda o dilombolwelu a aswekela-dyu.
35 Kyoso Jezú kyazukama mu mbanza ya Jedikó, kwakexile kifofo ku mbandu’a njila, wakexile mubhinga jimola. 36 Kyevu o jibuya ja athu avulu akexile mu kwenda, mwene webhwidisa se ihi yakexile mubhita. 37 A mu tangela, exi. “Jezú dya Nazalé wa mubhita!” 38 Mu kyenyiki, mwene wadikola: “Jezú, Mon’a Davidi, ngi kwatele henda!” 39 O athu akexile ku pholo yê, amateka ku mubazela phala kudixibha. Maji mwene wadikola dingi ni dízwi dya swina, wixi: “Mon’a Davidi, ngi kwatele henda!” 40 Jezú-phe wimana, anga utuma phala ku mu bhekela o diyala. Kyoso o diyala kyazukama, Jezú wa mwibhwidisa: 41 “Wamesena ngi kubhanga ihi?” Mwene wa tambwijila: “Ngana, ngi jikule o mesu!” 42 Jezú wa mwambela, wixi: “Tona o mesu, utale! O kixikanu kyé kya kubhangesa o kudisanza.” 43 Mu kithangana kyenyókyo, mwene wamateka kumona, anga ukayela Jezú ni kuximana Nzambi. Athu oso we kya kimono, aximana Nzambi.