Kala Kyasoneka Máluku

6 Mwene watundu kwenyóko, anga uya mu mbanza yê kumoxi ni maxibulu mê. 2 Mu kizuwa kya Sábhalu, mwene wamateka kulonga mu dilombe,* o athu akexile mu mwivwa adiwana ni ulongelu wê, ya ambe, exi: “Kwebhi o diyala didi kwa dilongela o ima yoso yiyi? Mukonda dyahi a mu bhana o unjimu yú? Nanyi wa mu bhana o kutena kwa kubhanga o madiwanu yá? 3 Ki mwenyú o musongi wa mabaya,* mon’a Madiya, phang’ya Tiyaku, Zuze, Juda, ni Ximá? O jiphange jê ja ahatu, ki twala nawu kumoxi bhabha?” Mu kiki, ene ka mu xikina. 4 Jezú-phe wa ambela, wixi: “O polofeta katambula kijingu mu ixi yê, ku jindandu jê ni ku bhata dyê.” 5 Mukonda dya kiki, mwene kabhange dingi madiwanu avulu mu kididi mwenyómo, maji wasake ngó amoxi ku jihaxi, mu ku atula o maku mê kuthandu dyâ. 6 Mwene wadiwana mukonda dya ene kukamba o kixikanu. Mwene anga unyunga mu jisanzala joso ni kulonga.

7 Mwene wexana o kwinyi ni kiyadi kya jipoxolo, anga wa atumikisa kiyadi-kiyadi, yu wa abhana o kutena kwa kukaya o jinzumbi jayibha. 8 Mwene wa atendelesa we phala kambate mbolo, mbwenga, kitadi* mu phonda mu kwenda o njila, maji kikale ngó o mbangala. 9 Maji wa atendelesa phala kuta jihayi* ni kwila kambate izwatu iyadi.* 10 Mwene wa atangela dingi, wixi: “Inzo yoso-yoso i mu bokona, kalenu mwenyomo, katé ki mutunda mu mbanza yenyóyo. 11 Kididi kyoso-kyoso mwa kamba ku mi tambulula mba ku m’ívwa, mu kutunda mwenyomo, kukumunenu o fufuta ku inama yenu, phala kikale umbangi kwa ene.” 12 Ene ayi, ya aboko kwila, o athu atokalele kudyela o ituxi yâ. 13 Ene akexile mukaya madimonyo, ni ku waya máji ku jihaxi javulu ni kwa saka.

14 Sobha Helode wevu o ima yoso yiyi, mukonda o dijina dya Jezú dya fumana, o athu akexile mu zwela, exi: “Nzwá dya Batizu wafukunuka mw’alunga, mukonda dya kiki, wa mubhanga o madiwanu yá.” 15 Amukwá-phe akexile mu zwela, exi: “Mwéne Elija.” A kamukwá hanji, exi: “Polofeta wadifu ni jipolofeta jokulu.” 16 Maji Helode kyevu yalungu ni Jezú, wambe, wixi: “Nzwá, yó nga mubatwile o mútwe, mwéne wafukunuka mw’alunga.” 17 Kuma Helode watumine kukwata Nzwá, yu wa mu kasele mu kaleya, mukonda dya Helodiya, muhatu wa phang’yê Filipe, kuma Helode wa kazalele ni mwene. 18 Mukonda Nzwá wakexile mu tangela Helode, wixi: “Kikôla, eye kukala ni muhatu wa phang’yé.” 19 Mukonda dya kiki, Helodiya wa mu bhakele phonzo, yu wa mesenene ku mu jibha, maji katenene. 20 Mukonda Helode wakexile ni wôma wa Nzwá, kuma wejidile kwila, mwene wexile muthu wayuka, ukôla, yu wakexile mu zokela Nzwá. Kyoso mwene kyakexile mu kwívwa Nzwá kuzwela, wakexile ku mu ívwa ni kusanguluka. Mu kiki, kejidile ihi yeji bhanga ni mwene.

21 Maji kyoso kyabhixila o kizuwa kya Helode kutenesa mivu, mwene wabhange fesa phala o ilamba, ni jikabhitangu ja masoladi, ni mayala afuma a Ngalileya. 22 O mon’a Helodiya weza, yu wakini, anga Helode ni athu oso akexile-nê mu fesa,* a sangulukile kyavulu. O sobha watangela o kilumba, wixi: “Bhinga yoso i wamesena, eme nganda kubhana-yu.” 23 Helode wa mu lokela, wixi: “Yoso i u ngi bhinga, katé mwene o mbandu ya utuminu wami, nganda kubhana-yu.” 24 O kilumba watundu, wayi mu kwibhwidisa many’â, wixi: “Ihi i nga tokala kubhinga?” Many’â wa mu tambwijila: “Bhinga o mútwe wa Nzwá dya Batizu.” 25 Mu kithangana kyenyókyo, mwene wayi ni lusolo kwa sobha, anga u mu bhinga, wixi: “Nga mesena kwila, ngi bhane kindala kiki, o mútwe wa Nzwá dya Batizu bhu dilonga dyonéne.” 26 Sumbala kiki kya luwalesa kyavulu o sobha, maji mwene ka mesenene kudituna o kima kyabhingi o kilumba, mukonda dya kulôka kwê ni dya yó akexile-nê kumoxi.* 27 Mu kithangana kyenyókyo, mwene watumu disoladi ubhanga mbandu ku alangidy’ê, phala kubheka o mútwe wa Nzwá. Mwene wayi, anga ubatula o mútwe wa Nzwá mu kaleya, 28 anga ubheka o mútwe bhu dilonga dyonéne. O disoladi wa ubhana ku kilumba, anga o kilumba wa ubhana kwa many’â. 29 Kyoso o maxibulu a Nzwá kya k’ivu, ayi mutakana o kimbi kyê, ya a mufundu.

30 O jipoxolo a bhongolokela kwa Jezú, ya a mu tangela o ima yoso ya bhangele ene, ni yoso yalongele. 31 Mwene wa atangela, wixi: “Zenu, tuyenu ku mukáwu ubheka wetu, ni tu nyohe bhofele.” Mukonda athu avulu akexile mu kwiza ni kuya kwa ene, ene kakexile ni kithangana né ngó phala kudya. 32 Mu kiki, asambela mu ulungu, ya ayi ubheka wâ ku mukáwu. 33 Kyoso kya tundu, o athu a amono, avulu a k’ijidile. O athu endela bhoxi ni lusolo, ene atundile mu jimbanza joso, anga a dyanga o kubhixila. 34 Kyoso kyatuluka mu ulungu, mwene wamono mundu wavulu, anga wa akwatela henda, mukonda edile kala jimbudi ja kambele o mubhidi. Anga umateka kwalonga ima yavulu.

35 Kuma o dikumbi dya fwile kyá, o maxibulu mê a mu zukama anga a mu ambela, exi: “Mumu, mu mukáwu mu twala, o dikumbi dyafu kyá. 36 Sula-wu, phala aye mu madyembu ni mu jisanzala ja zukama, n’a sumbe kúdya.” 37 Mwene wa avutwila: “Bhanenu-wu kúdya.” Ene anga a mwibhwidisa: “O kwila twatokala kuya mu sumba jimbolo jita hama jiyadi ja madenádyu, anga tu a bhana-ju, n’a dye?” 38 Mwene wa a ebhwidisa: “Mbolo jikuxi ji mwala naju? Ndenu mu tale!” Kyoso kyatale, a mu tambwijila, exi: “Mbolo jitanu, ni mbiji jiyadi.” 39 Mwene watumu o athu oso kuxikama mu ibuka-ibuka, mu yangu ya wisu. 40 Kyenyiki ene axikama mu ibuka ya hama, ni ya makwinyi atanu. 41 Mwene kya kwata o jimbolo jitanu ni mbiji jiyadi, watale ku dyulu, yu wasambe.* Mwene wabukujula o jimbolo, anga u jibhana ku maxibulu mê phala ku jiwanena ku athu, yu wa wanena we o mbiji jiyadi ku athu oso. 42 Oso adi, ya ekuta, 43 anga abhongolola kwinyi ni kiyadi kya inda yezala ni ibhasu ya jimbolo, ni jimbandu ja jimbiji ja subhuka. 44 Oso adi o jimbolo, atenesa midi jitanu ja mala.

45 Mu kithangana kyenyókyo, kyoso mwene kyakexile mu sula o mundu, mwene watumu o maxibulu mê kudilônga mu ulungu, ni ku mu twamenena ku sambwa, mu kubhita ku Betesayida. 46 Kyoso kyazubha kulekela o mundu, mwene wayi ku mulundu mu samba. 47 Mu usuku, o ulungu wakexile mu kaxi ka musanza wa kalunga, maji mwene wakexile ubheka wê ku mulundu. 48 Kyoso kyamono kwila, ene katenene kwendesa o ulungu mukonda dya kitembu, wayi mu disanga nawu mu kilangidilu kya kawana kya usuku,* mu kwendela kuthandu a menya, maji wedile kala weji kwa somboka. 49 Kyoso kya mu mono kwendela kuthandu a menya, ene azwela, exi: “Kiki kisunji!” Anga adikola. 50 Ene oso a mu mono, anga akala ni wôma. Mu kithangana kyenyókyo, mwene wa atangela, wixi: “Swinenu! Eme mwéne, ki mu kale ni wôma.” 51 Mwene wadilôngo mu ulungu, anga o kitembu ki batama. Mu kiki, ene adiwana kyavulu, 52 mukonda kakexile mu tendela luwa o dilombolwelu dya jimbolo, o mixima yâ yakolele hanji mu kutongoloka.

53 Kyoso kyazubha o kuzawuka, abhixila mu mbanza ya Jenezalé, anga a kwika o ulungu kwenyóko. 54 Maji kyoso kyatuluka mu ulungu, o athu a mwijiya kyambote. 55 Ene ende mu jisanzala joso ja mbanza, ya amateka kubheka o jihaxi mu ipoya, bhwoso bhu evwile kwila Jezú bhwene bhwala. 56 Kabasa kididi mwa bokonene, kikale mu jisanzala, mu jimbanza, ni mu madyembu, o athu akexile mu tula o jihaxi mu itanda, ya akexile mu mu dyondela phala kwa ehela ku mu kwata ngó ku kizwatu kyê. Oso akexile mu kwata ku kizwatu kyê, akexile mu disanza.