Mukanda wa Dyanga ku Akwa Kolindu

13 Né mwene se ngi kala ni uhete wa kuzwela mu madimi a athu ni a jianju, maji ngi kamba o henda, nga difwangana ngi ngunga mba ngoma ibhanga jibuya javulu. 2 Se ngi kala ni uhete wa kuzwela kala polofeta ni kutongolola o ikutu yoso ya Nzambi, se ngi kala ni kwijiya kwoso ni kixikanu kya dikota ki ngi bhangesa kusondolola milundu, maji ngi kamba o henda, kingala ni valolo.* 3 Né mwene se ngi bhana o jimbote jami joso phala kukwatekesa akwetu ni kubhakula we o mukutu wami phala kudizangeleka, maji se ngi kamba o henda, kinga mubhanga kima.

4 O mukwa henda, mukwa mwanyu,* wa batama. O mukwa henda, ki mukwa difuba. Ka dizangeleka, ki mukwa ukumbu, 5 kene mu bhanga ufusa,* kene musota ngó o mbote yê, kakala ni njinda ni lusolo. Kene mubanza mu ima yayibha.* 6 Kene mu sanguluka ni ima yayibha, maji usanguluka ni kidi. 7 Kyoso kya dibhana ni ibhidi, mwene kazoza, uxikina mu ima yoso, ukingila mu ima yoso, ukolokota mu ima yoso.

8 O henda ki yanda bhwa. Maji o uhete wa kuzwela kala polofeta, wanda bhwa, o uhete wa kuzwela madimi avulu* wanda bhwa we, o kwijiya kwanda bhwa we. 9 Mukonda ki twejiya o ima yoso, o maka we a upolofeta twa ejiya ngó mbandu. 10 Maji kyoso kyanda kwiza o kima kyatenena, o ima ki yatenena yanda bhwa. 11 Kyoso ki ngexile ngi mon’a ndenge, ngakexile mu zwela kala ngi mon’a ndenge, ngakexile mubanza kala ngi mon’a ndenge ni kuxinganeka kala ngi mon’a ndenge. Maji kuma nga kulu kyá, o ifwa ya undenge, nga ixisa kyá. 12 Kindala twa mu mona o ima mu lumwenu lwa fefetela,* maji ku hádya twanda mona kyambote o ima.* Kindala ki ngejiya kyambote o ima, maji ku hádya nganda ijiya kyambote, kala eme kya ngijiya kyambote kwa Nzambi. 13 Kindala kwaxala ima itatu: O kuxikana, o kudyelela ni henda, maji o ya betakota o henda.