Kala Kyasoneka Nzwá
7 Kyoso kyabhiti o ima yiyi, Jezú ukala mu Ngalileya, mukonda kamesenene kuya mu Judeya, kuma o Jijudé akexile musota ndunge phala ku mujibha. 2 O fesa ya Jijudé a ixana Fesa ya Jibalaka, yazukamene kyá. 3 O jiphange jê amwambela, exi: “Tunda bhabha ndé mu Judeya, phala o maxibulu mé amone we o ikalakalu i wa mubhanga. 4 Mukonda sé-ku muthu ubhanga kima mu kaswekele se wamesena kwila athu amwijiya. Se eye wa mubhanga o ima yiyi, dilondekese ku athu.” 5 Mu kidi, o jiphange jê kakexile ni kixikanu kwa mwene. 6 Kyenyiki Jezú wa ambela, wixi: “O kithangana kyami kiluwa kibhixila, maji phala enu kithangana kyoso-kyoso kibhana. 7 O mundu ki utena ku mizemba, maji wa ngi zembe eme, mukonda ngilondekesa kwila o ibhangelu yâ, yayibha. 8 Enu bandenu, eme ki ngandaya hanji mu fesa yiyi, mukonda o kithangana kyami kiluwa ki bhixila.” 9 Kyoso mwene kyazubha kwatangela o maka yá, uxala hanji mu Ngalileya.
10 O jiphange jê kyazubha kubanda mu fesa, mwene we wabande, maji mu kaswekele. 11 O Jijudé amateka ku musota mu fesa, ni kuzwela, exi: “Kwebhi kwala o diyala dyódyo?” 12 Mwaxaxi ka mundu, o athu akexile mu difwetela yalungu ni mwene. Amoxi akexile muzwela, exi: “Mwene muthu wambote.” Maji a mukwá, exi: “Kana, mwene wene mu nganala o athu.” 13 Sé-ku muthu wakexile muzwela yalungu ni mwene bhu pholo dya mundu, mukonda akexile ni wôma wa Jijudé.
14 Mu kaxi ka fesa, Jezú wayi mu tembulu, anga umateka o kulonga. 15 O Jijudé anga adiwana, ambe, exi: “Kyebhi o diyala didi wala ni kwijiya kwavulu kwa Mikanda Ikôla, se mwene kadilongo mu jixikola?”* 16 Kyenyiki Jezú wa atambwijila, wixi: “O maka u nga mulonga, ki ami-eme, maji atokala kwa yó wa ngitumu. 17 Se muthu umesena kubhanga o vondadi ya Nzambi, wanda kwijiya se o ima i nga mulonga yatokala kwa Nzambi, mba ya ngitokala eme. 18 Woso uzwela o ima yê mwene, usota kudifumanesa, maji woso wamesena kufumanesa yó wa mu tumu, mwene mukwa kidi, kamoneka makutu. 19 Mozé ka mibhana o Kijila? Maji sé-ku muthu mudyenu wa mu belesela o Kijila. Mukonda dyahi mwamesena ku ngi jibha?” 20 O mundu wa mu tambwijila, wixi: “Eye wala ni dimonyo. Nanyi wamesena ku kujibha?” 21 Jezú wa avutwila, wixi: “Eme nga bhange ngó kisumwa kimoxi, maji enu mwa diwana kyá. 22 Mukonda dya kyenyiki, Mozé wa mi tumina o kusaya, (sumbala o kusaya ki kwatundu kwa Mozé, maji ku jikuku jenu), enu-phe mu saya o twana twa mala mu kizuwa kya sábhalu. 23 Se muthu usaya o mon’a diyala mu kizuwa kya sábhalu, phala kaxibhake o Kijila kya Mozé, mukonda dyahi mwa ngi kwatela njinda, mu kusaka o diyala mu kizuwa kya sábhalu? 24 Kanenu kufundisa mu ima i mu mona, maji fundisenu ni kidi kyoso.”
25 Kyenyiki, sayi athu akwa Jeluzaleme amateka kuzwela, exi: “Yú ki mwéne o diyala a mu mu sota phala ku mu jibha? 26 Talenu! Mwene wala bhabha, wa muzwela mwaxaxi ka mundu, maji ka mu mu bhanga kima. O kwila o atwameni etu axikina kwila mwéne Kidistu? 27 Etu twejiya kwebhi kwatundu o diyala didi, maji kyoso kyanda kwiza Kidistu, sé-ku muthu wanda kwijiya kwebhi kwatundu mwene.” 28 Kyoso kyakexile mulonga mu tembulu, Jezú wadikola ni dízwi dya swina, wixi: “Enu mwa ngijiya kyambote. Mwejiya we kwebhi ku nga tundu. Eme kingeza mu vondadi yami, maji o Yó wa ngi tumikisa muthu wa kidi, enu ki mwa mwijiya. 29 Eme nga mwijiya, mukonda ngi mukunji wê, mwéne wa ngi tumikisa.” 30 Kyenyiki, ene asoto ku mu kuta, maji sé-ku muthu watena ku mu kwata, mukonda o kithangana kyê, ki kya bhixile luwa. 31 Mu kiki, mwaxaxi ka mundu athu avulu a muxikana. Ene akexile muzwela: “Kyoso o Kidistu kyanda bhixila, o kwila wanda bhanga dingi madiwanu, o a mubhanga o diyala didi ndenge?”
32 O Jifalizewu evu o mundu kudifwetela o ima yiyi yalungu ni Jezú. Kyenyiki, akunji a makota ni Jifalizewu atumikisa alangidi* phala ku mu kuta.* 33 Jezú wambe, wixi: “Nganda kala hanji ni enu tu ithangana, ande dya kuya kwa Yó wa ngi tumu. 34 Enu mwanda ngi sota, maji ki mwanda ngi sanga, kwoso ku ngandaya, enu kimutena kuya-ku.” 35 Kyenyiki, o Jijudé adyambela mudyâ, exi: “Kwebhi kwamesena kuya o diyala didi, ku twanda lémbwa ku musanga? O kwila wandala kuya musota o Jijudé amwangana mwaxaxi ka Jingeleku ni kulonga o Jingeleku? 36 Ihi yamesena kuzwela mwene kyoso kyambe: ‘Enu mwanda ngisota, maji ki mwanda ngisanga, kwoso ku ngandaya, enu kimutena kuya-ku’?”
37 Mu kizuwa kya suku-ku, o kizuwa kyadikota kya fesa, Jezú wabalumuka, yu wazwela ni dízwi dya swina, wixi: “Woso wala ni dinyota, eze kokwami, n’a nwe o menya. 38 Woso u ngixikana eme, ‘ku muxima wê, kwanda fwafwa menya a mwenyu,’” kála kyosoneke mu Mikanda Ikôla. 39 Maji, mu kuzwela kiki mwene wakexile muzwela yalungu ni nzumbi ikôla yeji tambula yó a muxikana, kuma ene ka itambwile luwa, mukonda Jezú katambwile luwa o ungana wê. 40 Amoxi mwaxaxi ka mundu evu o izwelu yiyi, amateka kuzwela, exi: “Yú mwéne o Polofeta a mu kanene.” 41 Amukwá akexile muzwela, exi: “Yú mwéne o Kidistu.” Maji amoxi, exi: “O kwila Kidistu wanda kwijila ku Ngalileya? 42 O Mikanda Ikôla ki izwela kwila, Kidistu wanda kwijila mu mwiji wa Davidi, ni mu sanzala ya Beleme, mwa vwalela Davidi?” 43 O mundu anga udiwanuna mukonda dya mwene. 44 Amoxi mudyâ amesenene ku mukuta,* maji sé-ku muthu watenene ku mukwata.
45 Kyenyiki, o alangidi avutuka ku akunji a makota ni ku Jifalizewu, ene anga a ebhwidisa: “Mukonda dyahi ki mweza-nê?” 46 O alangidi atambwijila, exi: “Kiluwa tumona muthu ulonga kála yó!” 47 O Jifalizewu ambe, exi: “O kwila enu wenu a mi nganala? 48 O kwila sayi mutwameni wetu mba wa Jifalizewu wa mu xikina? 49 Maji o athu yá, ka axikina kwa Nzambi, mukonda ene kejiya o Kijila kya Mozé.” 50 Nikodemu, yó wayile muzwela ni Jezú, watokalele we ku Jifalizewu, wa atangela, wixi: 51 “O kwila mu Kijila kyetu, o muthu atena ku mu fundisa sé kudyanga hanji ku mwívwa ni kwijiya yoso yabhange?” 52 Ene a mu vutwila, exi: “Eye we u mukwa Ngalileya? Tokwesa mu Mikanda Ikôla ni umone kwila, sé-ku polofeta wanda tunda mu Ngalileya.”*