Daniyele

9 Ku muvu wa dyanga wa Dályu mon’a Asuwelu, watokala ku mwiji wa akwa Medya, yó a musolele phala kukala sobha ya akwa Kaladeya, 2 kyene, mu muvu wa dyanga wa Dályu, eme ngi Daniyele mu kutokwesa mu madivulu, kya ngitetulukila kwila, Jeluzaleme yeji kala ngundu mu makwinyi asambwadi a mivu, kala kyazwela Jihova kwa polofeta Jelemiya. 3 Bhenyobho, ngazwata izwatu ya jisaku, ngadikungu uthôkwa, nga jejuwala, éme ngadyondela kwa Jihova o Nzambi yakidi mu musambu. 4 Ngasambe kwa Jihova Nzambi yami, nga mufisala o ituxi yetu, ngixi:

“Jihova tata, u Nzambi yakidi, u muthu wonene, ukwatesa wôma, yó ukumbidila o kikutu kyé, ubhanga mbote* kwa yó a kuzolo ni kwa yó abelesela o itumu yé, 5 twate kituxi, twatondala, twabhange ima yayibha; twa kubhukumukina, kitubelesela o itumu ni jingonge jé. 6 Kitubhana mátwi ku jiselevende jé, o jipolofeta, azwela ni jisobha jetu, o ilamba yetu, o jikuku jetu ni mundu wetu woso mu dijina dyé. 7 Jihova tata, eye u Nzambi yayuka, maji lelu jisonyi jatukwata. Kyene, etwenyoso tu akwa Izalayele, kikale o athu atungu mu Judá, o athu atungu mu Jeluzaleme, kixi yó ala bhwa zukama ni yó ala makanga mu jixi joso ji wa a mwangena, mukonda ki twa kubelesela.

8 “Jihova tata, jisonyi jatukwata mwene! Kikale o jisobha jetu, o ilamba ni jikuku jetu, jisonyi ja akwata mukonda twa kute kituxi. 9 Jihova Nzambi yetu, u mukwa kukwatela henda, u mukwa kuloloka, sumbala twa kubhukumukina. 10 Jihova Nzambi yetu, kitwatumaka o dízwi dyé, kitwabelesela o ijila i watubhana bhukaxi ka jiselevende jé, o jipolofeta. 11 O akwa Izalayele abhukumukina o Kijila kyé, a kubhana dikunda, katumaka o dízwi dyé. Kiki kyene kyabhangesa kutubhekela o mabhebhu ni mulôko wosoneke mu Kijila kya Mozé, o selevende ya Nzambi yakidi, mukonda twa kute kituxi. 12 Mwene* wakumbidila yakanena kubhanga kokwetu ni ku jinguvulu jexile mu tutumina,* wa tukastikala kyavulu. O kyabhange mu mbanza ya Jeluzaleme, kakibhange dingi mu kididi kyengi mu ngongo yoso. 13 Kala kyosoneke mu Kijila kya Mozé, o wíndwa woso yú weza ku thandu dyetu. Né kiki, twabhukumukina Jihova Nzambi, mukonda kitudyela o ituxi yetu, kitwaxikina o kidi.

14 “Eye u Jihova, wene mumona o ima i twene mubhanga, éye watubhekela o wíndwa yú! Mukonda Jihova Nzambi yetu, yoso u ibhanga ni kuyuka. Maji-phe, etu kitwatumaka o dízwi dyé.

15 “Ni kidi kyene, eye u Jihova Nzambi yetu, wakatula o mundu wé mu ixi ya Ijitu ni kutena kwa lukwaku lwé, kiki kyafumanesa o dijina dyé kate lelu. Maji etu twate kituxi, twabhange ima yayibha. 16 Ngakudyondo u Jihova, wene mubhanga o ima yoso ni kuyuka, sondolola o njinda yé yadikota yala ku thandu dya mbanza ya Jeluzaleme, o mulundu wé ukôla. Kuma, mukonda dya ituxi yetu ni ituxi ya jikuku jetu, o athu oso a tukondoloka a musebhulula o mbanza ya Jeluzaleme, a musebhulula we o mundu wé. 17 Kyenyiki, Nzambi yetu, ivwa o musambu ni kudyonda kwa selevende yé. Bhangesa kwila, o kididi kyé kikôla kyaxala ngundu, kiwabhe dingi mukonda dya dijina dyé, eye u Jihova. 18 Nzambi yami, bheteka o mátwi wívwe! Tona o mesu, umone o kubhondalala kwetu, umone we kyebhi kyala o mbanza yambata o dijina dyé. Twamudyonda kokwé, ki mukonda dya ibhangelu yetu yayuka, maji mukonda dya henda yé yadikota i wa tukwatela. 19 Jihova tata, ivwa! Tuloloke, Jihova tata. Eye Jihova tata, tusuwe, tukwatekese, mukonda o dijina dyé a ditumbula mu mbanza yé ni mwaxaxi ka mundu wé.”

20 Kyoso ki ngexile hanji muzwela ni kusamba mu kufisala o kituxi kyami ni kituxi kya mundu wami wa Izalayele, ni kudyonda kwa Jihova Nzambi yami, yalungu ni mulundu wê ukôla, 21 kyene mwene, kyoso ki ngexile hanji musamba, Ngabidiyele, o diyala di ngamwene mu kisumwa, wazukama, eme ngatohokele kyavulu mu ngoloxi mu ola ya kubhakula o jisata. 22 Mwene weza mu ngitetulukisa o ima yejibhita, wixi:

“Daniyele, eme ngeza phala ku kutetulukisa o ima yanda bhita, kala ki wamono mu kisumwa. 23 Kyoso ki wamateka o kudyonda, ngatambula njimbu. Kindala ngeza phala ku kutudila o njimbu yiyi, mukonda a kuzolo kyavulu. Kyenyiki-phe, ivwa kyambote o maka u nganda kutangela, o kisumwa ki kutetulukile.

24 “O mundu wé ni mbanza yé ikôla, a ixindila makwinyi asambwadi a jisemana, phala kujima o ikuma ni ituxi, ni kuloloka o itondalu. Phala kubheka o kuyuka kwa kalelaku ni kulondekesa kwila o isumwa ni ikanenu yanda dikumbidila, ni kubhakula o Kididi Kikôla Kinene, kwa Nzambi.* 25 Eye watokala kwijiya kwila, tunde kyanda bhana o kitendelesu kya kutunga dingi Jeluzaleme, kate o wijilu wa Mexiya,* o Mutwameni, kwanda bhita sambwadi dya jisemana ni makwinyi asamanu ni kiyadi kya jisemana. O mbanza ya Jeluzaleme anda itunga dingi ni kididi bhu bhitila athu avulu, ni mulombo wadikota wanda ukondoloka. Maji anda itunga mu kithangana kya jihadi.

26 “Mu kubhita makwinyi asamanu ni kiyadi kya jisemana, o Mexiya anda mujibha, kanda mumona dingi.*

“O ifuxi ya mutwameni wa keza-ku, yanda bwika o mbanza ni kididi kikôla. O dizubhilu dyanda kwiza kala diluvyu. Kwanda kala jinga ita kate ku disukilu. Kala kyambe Nzambi, kwanda kala kibwikilu.

27 “Mwene wanda bhangesa kwila, o kikutu kinangenena dingi mu semana imoxi phala o mbote ya athu avulu. Kyoso semana ki yanda bhixila bhukaxi, o jisata ja ibhaku ni maujitu anda jibhwisa.

“O yó wanda bheka o kibwikilu wanda kwijila ku thandu a mabhabha a kisunji kibhekela o kibwikilu. O kima kyoxinde anga a kilundulula we ku thandu a yó wabheka o kibwika, kate kyabwikisa yoso.”