Hozeya
7 “Kyoso kingila ngisaka Izalayele,
O itondalu ya Efalayíme, itukuluka,
Ngimona we o kuyibha kwa Samadiya.
Mukonda ene abhanga o ima ni mangonya,
O miyi abokona mu jinzo, a nyana o ima, a nyana we o ima ya athu mu ikoka.
2 Maji ene adijimbi kwila kinganda jimba o ima yoso yayibha yabhange.
O ibhangelu yâ yayibha ya akondoloka,
Séku kima kyabhanga ene, kingitena ku kimona.
3 Ene asangulukisa o sobha ni usweya wâ,
Ene asangulukisa o ilamba ni makutu mâ.
4 Ene oso akwa jiphanda,
Adifwangana ni dijiku dyawika o mubhangi’a jimbolo,
Mwene weha kuphopheka o makala, kyoso kyafungisa o fuba ya tiliku ni menya ni felemendu, kate ki inana.*
5 Mu kizuwa kya fesa ya sobha yetu, o ilamba akatele.
Ene exile ni njinda yavulu mukonda dya kunwa vinyu.
Sobha wabhange ukamba ni akwa kusebhulula.
6 Ene azukama kwa mwene ni mixima ya mulekujuka kala dijiku* dya túbhya.
O mubhangi’a jimbolo, uzeka usuku woso,
Mukamene dijiku diwama kala mulengu wa túbhya.
7 Ene oso atema kala dijiku dya túbhya,
Ene abwika o atwameni’â.*
Jisobha jâ joso jadibhale,
Séku muthu udikola kokwami mu kubhinga kikwatekesu.
8 Efalayíme wadibundu ni athu atokala ku ifuxi yengi.
Efalayíme wedi kala mbolo yabhi ngo mbandu imoxi, mukonda ka ibhilula.
9 O akwa jixi jengi, a mukatula o kutena kwê, maji-phe, mwene kakijiya.
O mútwe wê wedi kya phé ni jimvi, maji walembwa kukijiya.
10 Akwa Izalayele alondekesa kwila athu ayibha, mukonda dya ukumbu wâ,
Maji né mwene ni ima yoso yiyi, ene kavutuka kwa Jihova Nzambi yâ,
Mba a musota.
11 Akwa Efalayíme kala ni kilunji, edi kala pomba yatobho.
Ene abhinga kikwatekesu ku akwa Ijitu ni ku akwa Asídya.
12 Kididi kyoso-kyoso kyaditela, nganda ku atakwila o wanda wami.
Nganda ku abwisa bhoxi kala jinjila.
Nganda ku akastikala kala ki ngatendelesa kya o kifuxi.
13 Lamba dyâ, mukonda a ngilenge!
A abwike mukonda a ngibhukumukina!
Eme ngamesenene kya ku abhulula, maji ene atange makutu alungu n’eme.
14 Ene kexile mukwiza mu ngibhinga kikwatekesu ni muxima woso,
Sumbala ene exile muditenda mu jihama jâ.
Ene exile mudisema jiphoko ku mikutu yâ, phala kubhinga tiliku ni vinyu ya ubhe.
Ene a ngibhukumukina.
15 Sumbala nga abazela ni ku aswinisa,
Maji a ngilungulukila.
16 Ene alungulula o ukexilu wâ, maji kakibhange phala kubhanga ima yambote,*
Kexile athu a ku adyelela kala kibhita ni mufula wakambe o nguzu.
O ilamba yâ, anda ku ijibha ni xibhata, mukonda dya ima yayibha yazwela.
Mukyenyiki, ene anda ku axongwena mu ixi ya Ijitu.”