Ikalakalu ya Jipoxolo
8 Sawúlu wa mwene kuma kima kyambote kujibha Xitevá.
Mu kizuwa kyenyókyo, o athu mu kilunga kya Jeluzaleme amateka kwa zukutisa kyavulu. Enyoso amwangana mu jimbanza ja Judeya ni Samadiya, maji o jipoxolo axalele mu Jeluzaleme. 2 Sayi mayala afiyele ambata o kimbi kya Xitevá phala ku kifunda, ene a mu didi kyavulu. 3 Kyenyiki, Sawúlu wamateka kuzukutisa o kilunga. Mwene wakexile mubokona mu jinzo joso, ni kukoka-mu mayala ni ahatu, ni kwa tumikisa mu kaleya.
4 Maji o athu a mwanganene akexile muboka o njimbu yambote ya mak’â Nzambi mu ididi mwakexile muya. 5 Filipe wakulumuka mu mbanza* ya Samadiya, anga umateka kwabokela yalungu ni Kidistu. 6 O mundu woso wakexile mu kwívwa Filipe, ni ku mubhana mátwi ni kumona o isumwa yakexile mubhanga. 7 Mukonda mu mbanza yenyóyo mwakexile athu avulu exile ni jinzumbi jayibha, jene ja kexile mudikola ni dízwi dya swina ni kutunda ku athu. A sake inema yavulu ni yó akexile mu tenguna. 8 Kyenyiki, o athu mu mbanza a sangulukile kyavulu.
9 Mu mbanza yenyoyo, mwakexile diyala amwixana Ximá, wexile mubhanga ima ya wanga. Mwene wabhangesele o mundu mu Samadiya kudiwana, mu kuzwela kwila wexile muthu wonene. 10 Athu oso akexile mu mwívwa, ni adyakime ni anandenge, akexile muzwela: “O diyala didi dyala ni kutena kwa dikota kwa Nzambi.” 11 Ene akexile ku mubhana mátwi mukonda mu thembu yavulu, mwene wakexile mwa bhangesa kudiwana ni ima ya wanga. 12 Maji ene axikinine Filipe kyoso kya abokela o njimbu yambote ya Utuminu wa Nzambi, ni ya dijina dya Jezú Kidistu. Anga mayala ni ahatu a abatizala. 13 Ximá waxikana we. Kyoso kya mu batizala wakexile mukwenda ni Filipe. Ximá wakexile mu diwana mu kumona o isumwa ni ikalakalu ya makota yakexile mubhita.
14 O jipoxolo mu Jeluzaleme kyevu kwila, akwá Samadiya axikina o mak’â Nzambi, atumikisa-ku Phetele ni Nzwá. 15 Ene a kulumuka-ku, ya asambe phala akwa Samadiya atambule we o nzumbi ikôla, 16 mukonda ka itambwile luwa, maji ene a abatizalele ngó mu dijina dya Ngana Jezú. 17 Phetele ni Nzwá atula o maku mâ kuthandu dyâ, anga atambula o nzumbi ikôla.
18 Kyoso Ximá kyamono kwila, o athu akexile mutambula o nzumbi ikôla mu kwatula o maku kuthandu dyâ ku jipoxolo, mwene wabhana kitadi ku jipoxolo. 19 Wa atangela, wixi: “Ngi bhanyenu we o kutena kuku, phala woso ngi mu tula o maku kuthandu dyê atambule we o nzumbi Ikôla.” 20 Maji Phetele wa mwambela: “Fwila ni kitadi kyé kya phalata, mukonda eye wabanze kwila, wejitena kusumba ni kitadi, o ujitu wabhana Nzambi mu kingoho. 21 Eye ki watokala kutambula o ujitu yú, mukonda bhu pholo ya Nzambi, eye wala ni muxima wayibha. 22 Kyenyiki, dyela o kituxi kyé, dyondela Jihova, nange mwene uloloka o kituxi kyala ku muxima wé, 23 mukonda eye wadibhange u ndulendule,* u mubhika wa kituxi.” 24 Ximá wa avutwila: “Ngi dyondelenu kwa Jihova, phala o ima yoso i mwazwela, ki ize kokwami.”
25 Kyazubha kubhana o umbangi ni kuzwela o maka a Jihova, ene avutuka mu Jeluzaleme, ni kuboka o njimbu yambote mu jisanzala javulu ja akwa Samadiya.
26 O anju ya Jihova yatangela Filipe: “Disokejeke, ndé ku mbandu ya lwiji, mu kikoka ki kulumuka ku Jeluzaleme katé ku Ngaza.” (Kiki kyene o kikoka kya kikangalakata.) 27 Kyenyiki Filipe wa disokejeka, yu wayi. Wadisange ni mutwameni* mukwa Itiyopya, wexile mukwatekexi wa Kandase, mvwale ya Itiyopya. Mwene wexile we mutambula konda ya jimbongo joso ja mvwale. O diyala didi wayile mu Jeluzaleme mubheza Nzambi. 28 Kyoso kyakexile muvutuka, waxikama mu dikalu dyê, wakexile mutanga ni dízwi dya swina o divulu dya polofeta Izaya. 29 O nzumbi ikôla yatangela Filipe: “Ndé, zukama bhwala o dikalu dyódyo.” 30 Filipe wayi ni kulenga bhu mbandu ya dikalu, wa mwívu kutanga ni dízwi dya swina o divulu dya polofeta Izaya. Filipe wa mwibhwidisa: “Wamutendela o ima i wamutanga?” 31 Mwene wa mu tambwijila: “Mu kidi, ngi tendela kyebhi se ki kwala muthu phala ku ngi lombolwela-yu?” Mwene wadyondela Filipe phala kusambela mu dikalu ni kuxikama bhwa kexile mwene. 32 O mbandu ya Mikanda Ikôla ya kexile mutanga mwene yenyiyi: “Mwene wedile kala mbudi a mu yambata phala ku ijibha. Kála o kambudi kya dixibha kyoso kya mubatula o ndemba, mwene kajikula o dikanu. 33 Kyoso kyakexile mu mu sebhulula, kamufundisa ni kuyuka. Nanyi wanda tanga o ima yalungu ni mwiji wê? Mukonda mwenyu wê wabatuka mu ngongo.”
34 O diyala* webhwidisa Filipe: “Nga kudyóndo ngi tangele: Bhabha o polofeta wa muzwela yalungu ni nanyi? Wa muzwela yalungu ni mwene, inga yalungu ni muthu wengi?” 35 Filipe wamateka o kuzwela, wa mu lombolwela o maka akexile mutanga mu Mikanda Ikôla. Mwene anga u mu bokela o njimbu yambote yalungu ni Jezú. 36 Kyoso kyakexile mu kwenda mu kikoka, ene a bhixila bhu kididi bhwa kexile menya, o diyala* wambe: “Talesa! Bhabha bhwala menya! Kima kyahi ki ngi fidisa ku ngi batizala?” 37 —— 38 Kyenyiki mwene watumu kwimanesa o dikalu ya atuluka. Kumoxi ni Filipe ene a kulumuka mu menya. Filipe anga u mu batizala. 39 Kyoso ene kyatundu mu menya, mu kithangana kyenyókyo o nzumbi ikôla ya Jihova yambata Filipe bhu kididi kyengi. O diyala ka mono dingi Filipe, maji wa suluka ni njila yê ni kusanguluka kwoso. 40 Filipe wayi mu mbanza ya Asdode, yu wasuluka mu kuboka o njimbu yambote mu jimbanza joso katé kyabhixila ku Sezaleya.