Ku Akwa Loma
9 Eme ngi mukayedi wa Kidistu. O kitongolwelu kyami, a mu kyendesa kwala o nzumbi ikôla, eme nga muzwela o kidi, ki nga mutanga makutu kyoso ki ng’amba kwila: 2 Ngala ni kikote kya dikota, o muxima wami wene mu ngi xixima jinga. 3 Se kya bhanene, ngeji sanduka kwa Kidistu, kala ngi muthu wayibha, phala o mbote ya jiphange jami, o jindandu jami mu xitu, 4 akwa Izalayele. Kuma Nzambi wa asolo, yu wa abhange an’ê, wa alondekesa o fuma yê, wate nawu kikutu, wa abhana o Kijila, o ikanenu ni ujitu wa ku mu sidivila. 5 Ku akwa Izalayele kwene kwatundu o jikuku jetu, kwene we kwa tundu Kidistu mu kidifwanganu kya muthu mu xitu. Nzambi, o Ngana ya ima yoso, a mu ximane katé ku hádya ni hádya. Kyene!*
6 Maji Nzambi kalembwa ku kumbidila o kikanenu kyê. Mukonda k’o athu oso atokala ku mwiji wa Izalayele, akwa Izalayele mwene. 7 Sumbala ene oso atokala ku mwiji* wa Mbalahamu, maji ene oso ki an’â Mbalahamu. Nzambi watangela Mbalahamu, wixi: “O yó anda mwixana mbutu yê, wanda kwijila bhukaxi ka Izake.” 8 Kiki kilombolola kwila, o ana atundu kwa Mbalahamu mu ukexilu wa xitu, ki an’â Nzambi. Maji o yó a avwala mukonda dya kikanenu kya Nzambi, éne o an’â* Nzambi. 9 Mukonda Nzambi wakanena, wixi: “Ku muvu wiza-mu mu kithangana kala kiki, nganda kwiza dingi, o Sala wanda kala kyá ni mona.” 10 Kiki kya bhitile we kyoso Bebeka kyemitine jingongo ni mwadi wê Izake, kukwetu. 11 Kuma o ana ande dya kwa vwala, ni kwila kabhangele luwa kima kyoso-kyoso kyawabha mba kyayibha, Nzambi wazwelele kyá se weji sola nanyi. Mukonda Nzambi mwéne wejiya se usola nanyi, maji kana mu ima i bhanga o muthu. 12 Nzambi wambela Bebeka, wixi: “O dikota wanda kala mubhika wa ndeng’yê.” 13 Kala kyosoneke mu Mikanda Ikôla, exi: “Ngazolo Jakobo, maji Izawú nga muzembe.”
14 O kwila twamba kuma Nzambi mukwa katombo? Kana! 15 Kuma Nzambi watangela Mozé, wixi: “Nganda lendukila woso nga mu solo, nganda kwatela henda woso nga mesena ku mu kwatela henda.” 16 O muthu ka mu solo mu vondadi mba mu nguzu yê,* maji mu henda ya Nzambi. 17 O Mikanda Ikôla yambe yalungu ni Falawó: “Nga kwehela kukala ku mwenyu phala bhukaxi ké, ngi londekese o kutena kwami ni kwijidisa o dijina dyami mu ngongo yoso.” 18 Kyenyiki, woso Nzambi wa mwandala, mwene u mu lendukila. Maji o muthu ukola o muxima, mwene u mwehela.
19 Sayi athu anda ngi ibhwidisa, exi: “Mukonda dyahi Nzambi umona itondalu ku athu? Nanyi utena ku mu fidisa kubhanga o vondadi yê? 20 Maji éye nanyi u muthu wa kime, phala kuzoka ni Nzambi? O kwila o kima kyobhange ni utuma kibhwidisa yó wa kibhange kwila, mukonda dyahi wa ngi bhange kiki?” 21 O kwila o ngumbi kala ni kutena kwa kutumina o utuma ni kubhanga nawu itutu yala ni valolo yavulu ni itutu ya kambe valolo? 22 Kyene we kyabhange Nzambi. Sumbala wamesenene kwidikisa o njinda ni kutena kwê, mwene walondekesa mwanyu wavulu kwa yó a mu bhekela o njinda, atokalele kubwika. 23 Nzambi wabhange kiki phala kulondekesa o fuma yê ku athu weji kwa lendukila, yó wa asokejeka phala kwa abhana o fuma yê. 24 Mwene watwixana, kana ngó mwaxaxi ka Jijudé, maji we ni mwaxaxi ka akwa jixi jengi. 25 Kala kya kisoneka mu divulu dya Hozeya, exi: “O yó ki mundu wami, nganda kwa exana ‘mundu wami.’ O yó ki nga muzolele nganda mwixana ‘kazola kami.’ 26 Mu kididi mwa ambela kwila, ‘enu ki mwala mu mundu wami,’ anda kwa exana ‘an’â Nzambi ya mwenyu.’”
27 Yalungu ni akwa Izalayele, Izaya wambe: “Sumbala akwa Izalayele avulu kala museke ku mbandu ya kalunga, maji athu ofele ngó anda bhuluka. 28 Mukonda Jihova wanda fundisa o athu mu ixi, mwene wanda bhanga kiki sé kulaleka.” 29 Izaya wakanene we, wixi: “Se Jihova dya ifuxi ka tubhanene mbutu, tweji difwangana ni akwa Sodoma, tweji sokela ni akwa Ngomola.”
30 Kyenyiki, ihi itwamba? O athu akwa jixi jengi éne alondekesa kixikanu, anga a amono kala athu ayuka, sumbala kabhangele nguzu phala kwa mona kala athu ayuka. 31 Maji akwa Izalayele sumbala abhangele yoso phala kukayela o Kijila kya kuyuka, alembwa ku kitumaka. 32 Mukonda dyahi alembwa? Mukonda ene amesenene ku kibhanga bhukaxi ka ikalakalu yâ, kana bhukaxi ka kixikanu. Ene anga adibhukana ku “ditadi dya kudibhukana.” 33 Kala kyosoneke mu Mikanda Ikôla, exi: “Talesenu! Ngitula mu Ziyone ditadi dya kudibhukana, ndanji ibhalesa o athu, maji woso u mu londekesa kixikanu kanda dyela.”