Kisumwa Kyalondekesa Kwa Nzwá
6 Eme ngamono kyoso o Kambudi kya jikula o kidimbu kya dyanga ku sambwadi dya idimbu, anga ngivwa anju imoxi ya tokala ku jianju jiwana kudikola ni dízwi dya difu ni kinuminu kya nzaji, yene yambe: “Ndé!” 2 Anga ngimona kabalu kazele. O yó wa sambela-ku wakwata mufula. Mwene a mubhana kitundu, anga utunda mu kutolola o jinguma jê ni kuzubha o ita.
3 Kyoso o kambudi kya jikula o kidimbu kya kayadi, ngevu o anju ya kayadi kudikola: “Ndé!” 4 Anga kutunda kabalu kakusuka. O yó wa sambela-ku a mubhana o ungana wa kubheka ita mu ngongo ni kubhangesa o athu kudijibha mudyâ. Mwene a mubhana we xibhata yadikota.
5 Kyoso o kambudi kya jikula o kidimbu kya katatu, ngevu o anju ya katatu kudikola: “Ndé! Anga ngimona kabalu kaxikatela. O yó wa sambela-ku wakexile ni pezu bhu lukwaku. 6 Anga ngivwa kala dízwi dya mutunda mwaxaxi ka jianju jiwana, dyambe: “Kilu imoxi ya tiliku mu denádyu* dimoxi ni kilu jitatu ja sevada mu denádyu dimoxi. Kana kuzanga o máji ni vinyu.”
7 Kyoso o kambudi kya jikula o kidimbu kya kawana, ngevu dízwi dya anju ya kawana kudikola: “Ndé!” 8 Ngamono kabalu kazeluluka. O wa sambela-ku amwixana Kufwa, kudima dyê kwa mukayela o Mbila.* Ene atambula o ungana wa kutumina o mbandu ya kawana ya ngongo, phala kujibha ni xibhata yalebha, ni nzala, ni mabhebhu ajibha, ni yama ya muxitu.
9 Kyoso o kambudi kya jikula o kidimbu kya katanu, ngamono bhoxi dya kalatódyu, o manyinga a athu a ajibhile mukonda dya mak’â Nzambi ni mukonda dya umbangi wabhele. 10 Ene adikola ni dízwi dyaswina, exi: “Katé bhebhi, Ngana Sukeku, ukôla, u Nzambi ya kidi, wanda kamba kufundisa o athu atungu mu ngongo ni kubhana kaxtiku kwa yó a tujibhile?” 11 Kala muthu mudyâ watambula kizwatu kyazele kyalebha, a atangela n’a nyohe dingi bhofele katé kyanda tenesa o konda ya jiselevende ni akwâ, ni jiphange jâ ala phala kwajibha kala kya jibhile ene.
12 Ngamono kyoso o kambudi kya jikula o kidimbu kya kasamanu. Anga kubhita kitungutu kya ixi, o dikumbi dyavundu kala mulele waxiketela,* o mbeji yoso yakusuka kala manyinga. 13 O jithéthembwa ja dyulu ja lawuka mu ngongo, kala kibhita ni muxi wa mufiku kyoso kya ubhuka ku kitembu kyadikota, anga ulaukisa o jifiku ja wisu. 14 O dyulu dya sondoloka kala mukanda wadifuta-futa, o milundu yoso ni ikolo a isondolola bhu ididi yâ. 15 Kyenyiki, o jisobha ja ngongo, ni makota, ni jikabhitangu ja masoladi, ni jimvwama, ni athu ala ni fuma, ni abhika oso ni athu ala ni ufôlo, adisweka mu jingenda ni moxi a matadi ala ku milundu. 16 Ene akexile mudyonda o milundu ni matadi, exi: “Lundumukenu kuthandu dyetu, mu tusweke bhupholo ya Yó waxikama ku kyandu ni mukonda dya njinda ya Kambudi, 17 kuma o kizuwa kyadikota kya njinda yâ kyabhixila, nanyi wanda tena kwimana?”