Jowele
2 “Xikenu o koloneta mu Ziyone!
Dikolyenu ni dízwi dyaswina ku mulundu wami ukôla, kala mwamuya mulwa ita.
Athu oso atungu mu ixi yiyi atekete,
Mukonda o kizuwa kya Jihova kyazukama! Ki kiza.
2 Kizuwa kya kuvunda kwavulu.
Kizuwa kya matuta ni kitombe kyadikota.
Kyedi kala mukengeji wa kamene, u mwikina o milundu.
Kwene kifuxi kyadikota kyala ni kutena,
Kikwexile luwa kifuxi kyadifu kiki, tunde xahulu.
Ki kwa kà kala we kifuxi kyengi,
Kutunda mwiji, kwiza mwiji.
3 Ku pholo yê kwala túbhya tubwikisa,
O ku dima dyê, mulengu uya ni kwawula.
O ixi yala ku pholo yê, yedi kala njaludi ya Edene,
Maji ku dima dyê kikangalakata kyahatu,
Séku kima kixala ni mwenyu.
4 O kidifwa kyê, mukwa ni jikabalu,
Ene alenga kala jikabalu ja ita.
5 O kinuminu kyê kyedi kala kya makalu a ita amutuka-tuka ku thandu a milundu,
Kala jibuya ja mulengu wa túbhya twamukwoha o yangu yakukuta,
Kyedi kala kifuxi kya nguzu kya mudisokejeka phala kuya mu ita.
6 O mundu wanda teketa ni wôma mukonda dyâ.
O jipholo joso janda londekesa kuluwala kwavulu.
7 Ene alwa ita kala mazonda,
Abanda o ilumbu kala masoladi,
Kala muthu mudyâ wendela mwene mu njila yê,
Ene kabhambuka o njila yâ, n’aditela kwengi.
8 Ene kadilundujula mudyâ,
Kala muthu ukala mu njila yê.
Se amoxi afwila ku sosa,
Axala-ku kamwangana.
9 Abokona mu jimbanza, amutuka o ilumbu.
Abanda mu jinzo, anga abokwena mu jinjanena kala miyi.
10 Bhu pholo yâ,* o ixi ya muteketa, o maulu a mutunguta,
O dikumbi dyaxiketela, o mbeji we yaxiketela,
O jithéthembwa kijamubhenya dingi.
11 Jihova wanda zwela ni dízwi dyaswina bhu pholo dya kifuxi kyê, mukonda o kifuxi kyê kyonene.
Mukonda Nzambi ukumbidila o kizwelu kyê, wala ni kutena.
Kuma, o kizuwa kya Jihova, kyadikota, ki kwatesa wôma wavulu.
Nanyi wanda tena kubhuluka?”
12 Jihova wambe: “Kyenyiki, vutukenu kokwami kindala ni muxima wenu woso,
Ni kujejuwala, kudila ni kuditenda.
13 Kimutokala kutandula ngo o izwatu yenu, maji dyelenu ni muxima woso.
Vutukenu kwa Jihova Nzambi yenu,
Mukonda mwene mukwa jihenda, ukokoloka mu kuthathamana, mukwa mwanyu, o henda yê yakalela-ku,
Kanda bhanga dingi yamesenene kubhanga ku mundu wê.
14 Nange mwene wanda lungulula o ibanzelu yê,
Wanda mibesowala,
Ni mutene kubhakula sata ya makudya ni sata ya mauholwa kwa Jihova Nzambi yenu.
15 Xikenu o koloneta mu Ziyone!
Bhanenu ngolokela ya kujejuwala. Dibhongololyenu mubhange kyônge kyakatunda.
16 Bhongololenu o mundu, mu azelesa.
Bhongololenu o adyakime akuka ni an’a ndenge ni tubwetele.
O ngayala atunde mu dixilu dyê, o dibhanga ditunde mu dixilu dyê dya ubhanga.
17 Énu mu akunji, mu jiselevende ja Jihova,
Didilenu bhwa zukama o mbalanda ni kalatódyu, mwixi:
‘Jihova tata, kwatela henda ku mundu wé,
Kwehele o mundu* wê ku usebhulula,
Kwehele o ifuxi ku utumina.
Phala katusebhulule, anga ebhula: “O Nzambi yâ yala kwebhi?”’
18 Jihova wanda langa kyambote o jimbanza mwatungu o jiselevende jê,
O mundu wê wanda ukwatela henda.
19 Jihova wanda tambwijila o mundu wê, wixi:
‘Nganda mitumikisa kudya, vinyu ya ubhe ni máji,
Enu mwanda dya, mwanda kwikuta,
Kinganda myehela dingi kumisebhulula mwaxaxi ka ifuxi.
20 Nganda kaya o dituta dya mahoho dya mukwijila ku mbandu ya thunda,
Nganda dimwanga mu kikangalakata kyahatu.
O mahoho ala kupholo, nganda kwatakula ku musanza wa kalunga,* ku mbandu kutundila o dikumbi,
O mahoho ala kudima, nganda kwatakula ku musanza wa kalunga,* ku mbandu kufwila o dikumbi.
O dizumba dyabolo dya mahoho dyanda banda.
O kibuzu kyanda suluka ni kubanda,
Mukonda, Nzambi wanda bhanga ima ya madiwanu.’
21 Eye-phe u ixi, kukale ni wôma.
Kemba, sanguluka, mukonda Jihova wanda bhanga ima ya madiwanu.
22 Enu we mu yama ya muxitu, kimukale ni wôma,
Mukonda mu ididi ya kwingila o ibhaku mwanda kala yangu ya wisu,
O mixi yanda kwima ibundu,
O muxi wa mufiku ni muxi wa muvidi yanda kwima ibundu yavulu.
23 Enu mu an’a Ziyone, sangulukenu mukonda dya ima yanda bhanga Jihova Nzambi yenu,
Mukonda mwene wanda mibhana mvula yasoko, o mvula yadyanga ya kudinji,
Wanda mibhana mvula yavulu,
O mvula ya dyanga ya kudinji ni yasukina-ku, ya kungulula musoke, kala kyabhangele m’ukulu.
24 O ididi yenu ya kubhyatela yanda kwizala ni kudya kwambote,
O ididi yenu ya kubhangela o vinyu ni máji, yanda kwizala* we.
25 Nganda mifuta yoso i mwadibotesa mu mivu yoso yiyi,
Yadi o dituta dya kayadi dya mahoho, o mahoho akambe o mabhabha, o mahoho ofele ni dituta dya dyanga dya mahoho,
O kifuxi kyami kyadikota ki ngamitumikisa.
26 Enu mwanda dya mwene, mwanda kwikuta,
Mwanda ximana o dijina dya Jihova Nzambi yenu,
Wa mibhangela o ima ya madiwanu.
O mundu wami nuka dingi anda ukwatesa jisonyi.
27 Enu mwanda kwijiya kwila, eme ngala mwaxaxi ka Izalayele,
Mwanda kwijiya we kwila, éme ngi Jihova Nzambi yenu, séku Nzambi yengi!
O mundu wami kanda ukwatesa dingi jisonyi kate ku hádya ni hádya.
28 Mukubhita o ima yiyi nganda bhana o kutena kwami* ku athu oso,
O twana twenu twa mala ni twa ahatu, twanda zwela kala jipolofeta,
O mayala akuka kya mwaxaxi kenu, anda lota jinzoji,
O minzangala yenu yanda mona isumwa.
29 Nganda bhana o kutena kwami,
Kate mwene ku abhik’ami a mala ni a ahatu, mu izuwa yenyoyo.
30 Nganda bhanga madiwanu ku dyulu ni mu ngongo,
Kwanda kala manyinga, túbhya ni dixi dyavulu diya ni kubanda.
31 Ande dya kwiza o kizuwa kyadikota kya Jihova, ki kwatesa o wôma,
O dikumbi dyanda kituka kitombe, o mbeji yanda kituka manyinga.
32 Woso udikola mu dijina dya Jihova, wanda bhuluka.
Mukonda ku mulundu wa Ziyone ni mu Jeluzaleme, kwanda kala yó anda bhuluka, kala kyambele Jihova, wixi:
O yó anda bhuluka, a mu a exana kwa Jihova.”