Kisumwa Kyalondekesa Kwa Nzwá
9 O anju ya katanu yaxiki o koloneta yê. Anga ngimona thethémbwa yatundu ku dyulu yalawuka mu ngongo, anga a ibhana o sabhi ya dikungu dyazongo. 2 Yene yajikula o dikungu dyazongo, mu dikungu mwatundu dixi. O dixi dya difwanganene ni dixi dya kidijiku kya túbhya, o dikumbi ni dyulu* dya vundile ni dixi dyakexile mutunda mu dikungu dyazongo. 3 Mu dixi mwatundu mahoho adimwange mu ngongo yoso. O mahoho atambula ungana kala o ungana watambula o jimvwanga ja ngongo. 4 Anga a ambela phala kabhange kima kyoso-kyoso kyayibha ku yangu ya ixi, ku itulu ni ku mixi, maji abhanga ngó kyayibha kwa yó akambe o kidimbu kya Nzambi bhu mabhômo mâ.
5 O mahoho katambula ungana wa kujibha o athu, maji atambula ngó o ungana wa kwatalesa hadi mu jimbeji jitanu. O hadi yiyi ya difwangana ni hadi itala o muthu kyoso kya mu numata ku mvwanga. 6 Mu izuwa yenyoyo, o athu anda sota o kufwa maji kanda kusanga, o athu anda mesena kufwa maji o kufwa kwanda kwalenga.
7 O mahoho adifwanganene ni jikabalu jo yudike phala o ita. Ku mítwe yâ, kwexile ima ya difwile ni itundu ya ulu, o jipholo jâ j’edile kala ja mayala, 8 maji o ndemba yâ ya difwanganene ni ndemba ya ahatu, o mazu mâ, a difwanganene ni mazu a jihoji. 9 O mahoho akexile ni ivunga thulu ya felu, o jibuya ja mabhabha mâ jedile kala jibuya ja makalu a mwasunga ku jikabalu, kyoso ki jiya ni lusolo mu ita. 10 O mikila yâ inumata kala jimvwanga, o kutena kwâ kwa kutalesa hadi ku athu ku jimbeji jitanu kwala ku mikila yâ. 11 Ene ala ni sobha, o sobha yâ o anju ya dikungu dyazongo. O dijina dyê mu dimi dya Hebalaiku amwixana Abadoni,* mu dimi dya Ngeleku amwixana Apodiyoni.*
12 Dilamba dya dyanga dyabhiti kyá. Talesenu! Kwa mukwiza dingi malamba ayadi.
13 O anju ya kasamanu yaxiki o koloneta yê. Anga ngivwa dízwi dya mutunda mukaxi ka jingela jala mu kalatódyu ka ulu kala bhu pholo ya Nzambi. 14 O dízwi dyambela o anju ya kasamanu yakwatele o koloneta, dixi: “Jituna o jianju jiwana j’okute bhu mbandu ya ngiji yadikota ya Ewufalate.” 15 O jianju jiwana josokejeke phala o ola, o kizuwa, o mbeji ni muvu, a ji jituna phala kujibha mbandu ya katatu ya athu.
16 Ngevu o konda yâ, o kifuxi kya jikabalu kyatenesa hama jiyadi ja mazunda. 17 Mu kisumwa kingamono, o jikabalu ni yó asambela-ku akexile ni ivunga thulu yakusuka kala túbhia, ya azulu, yazeluluka kala xôfidi. O mítwe ya jikabalu yexile kala mítwe ya jihoji, mu makanu mâ, mwakexile mutunda túbhia, dixi ni xôfidi. 18 O mabhebhu atatu a jibha mbandu ya katatu ya athu enyá: o túbhya, o dixi ni xôfidi yakexile mutunda mu makanu a jikabalu. 19 O kutena kwa jikabalu kwala mu makanu ni ku mikila yâ, mukonda o mikila yâ, yedi kala jinyoka yene yala ni mitwe. O mikila yene italesa hadi ku athu.
20 O yó kafu ku mabhebhu yâ, kadyela o ibhangelu ya maku mâ. Ene asuluka mu kubheza o madimonyo ni iteka ya ulu, ya phalata, ya ngondo, ya matadi ni ya mabaya ki itena kumona, né kwívwa né kwenda. 21 Ene kadyela o ujibhangânga wâ, o uloji wâ, o maundumbu* ni wiyi wâ.