Jowele
1 Jihova watendelesa Jowele* mon’a Petuwele, kuzwela kiki:
2 “Ivwenu, enu mu adyakime,
Ivwenu kyambote enwenoso mwatungu mu ngongo.
O kwila kwabhitile kya kima kala kiki mu izuwa yenu?
O kwila kyabhitile kya mu izuwa ya jikuku jenu?
3 Tangelenu-kyu an’enu,
O an’enu a kitangele o twana twâ,
Ene akitangele we ku miji ya keza-ku.
4 O idima yenu anda idya ku dituta* dya mahoho.* O yanda subhuka-ku, anda idya ku dituta dya kayadi dya mahoho.
O yanda xisa o dituta dya kayadi dya mahoho, anda idya ku mahoho akambe o mabhabha.
O yanda xisa o mahoho akambe o mabhabha, anda idya ku mahoho ofele.
5 “Phaphumukenu enu mu jihôlwa, dilenu!
Ditendyenu enwenoso mwene munwa o vinyu,
Mukonda o vinyu* ya ubhe a mikatula-yu mu kanu.
6 Mukonda kweza mahoho anzungule edi kala kifuxi mu ixi yami, kifuxi kyala ni kutena, o kuvula kwê katena ku kukwata konda.
O mazu ni jinganzwanzwa jê, jadifu ni ja hoji.
7 O kifuxi kiki kyabwikisa o muxi wami wa muvidi, o muxi wami wa mufiku wa ukitula kixinji,
Wa ikatula o ibalabala yu wa itexi,
O jithangu ja ubhe wa jikatula o ibalabala.
8 Ditende kala kiditenda o kilumba wate izwatu ya jisaku,*
Mukonda dya kufunda mwadi wê.
9 Mu inzo ya Jihova kimwala dingi jisata ja makudya, kimwala we jisata ja uholwa.
O akunji, o jiselevende ja Jihova, a luwala kyavulu.
10 O idima mu mábhya a idi, o mavu kabhana dingi idima,
Mukonda o kudya a kubwikisa, o vinyu ya ubhe yakukuta, o máji abhu.
11 O idimakaji jisonyi ja akwata, o akwa kukuna o mixi ya mividi a muditenda,
Mukonda dya tiliku ni sevada,
Kuma o idima ku mabhya yadiboto.
12 O muxi wa muvidi wakukuta,
O muxi wa mufiku walela.
O muxi wa lomá, o dyaye ni muxi wa masá wa kukuta,
Kifwa, o mixi yoso ya mukáwu,
Mukonda o kusanguluka kwa mundu kwakituka jisonyi.
13 Zwatenu izwatu ya jisaku, dilenu énu mu akunji,
Ditendyenu, énu mwa musidivila bhu kalatódyu.
Bokonenu mu tembulu, mubhite o usuku woso ni izwatu ya jisaku, énu mu jiselevende ja Nzambi yami,
Mukonda séku dingi muthu wa mubheka jisata ja kudya ni jisata ja mauholwa mu inzo ya Nzambi yenu.
14 Bhanenu ngolokela ya kujejuwala, dibhongololenu mubhange kyônge kyakatunda.
Ongekenu o adyakime ni athu oso a ixi yiyi,
Mu inzo ya Jihova Nzambi yenu, dyondelenu o kikwatekesu kya Jihova.
15 Wawé o kizu’okyo!
O kizuwa kya Jihova kyazukama,
Kyanda kwiza kala kibwika kya mutunda kwa Muteni-wa-Yoso!
16 Mu inzo ya Nzambi kimwala dingi kukemba ni kusanguluka,
Kikusubhuka dingi kudya.
17 O jimbutu* jâ jakukuta, jadiboto.
O ididi yâ ya kubhakela-mu o kudya yaxala itutu ya hatu.
Kuma o idima ku mábhya yakukuta, o iphuka* yâ a ilundumuna.
18 Kate ni ibhaku ya mudikola!
O jingombe jamunyunga-nyunga ngo mukonda kijisange yangu phala kudya!
O jimbudi ja mutala hadi.
19 Nganda dyondela kokwé eye u Jihova,
Mukonda o túbhya twabwikisa o yangu,
O mulengu wabwikisa o mixi yoso mu mukáwu.
20 Kate ni yama ya muxitu ya mudikola kokwé,
Mukonda o jifixi ja menya ja kukuta,
O túbhya twabwikisa o yangu.”