Ikalakalu ya Jipoxolo
21 Kyoso ki twadixisa, ni ku dilônga mu naviyu twayi ku Kozi. Mu kizuwa kya kayela, twayi ku Lode, kyoso ki twatundu kwenyóko, twayi ku Patala. 2 Kyoso ki twasange naviyu ya muya ku Fenixa, twa sambela mwenyomo, etu twayi. 3 Ku mbandu yetu ya kyasu, twamono o kikôlo* kya Xipele, maji twabhiti ngó, étu twayi ku Sídya. Anga twabhixila ku Tilu, kwene kwa katula o imbamba mu naviyu. 4 Twasoto o maxibulu, étu twa asange, twaxala kwenyóko sambwadi dya izuwa. Bhukaxi ka nzumbi ikôla, o jiphange adimuna Phawulu phala kaye mu Jeluzaleme. 5 Kyoso kya bhixila o kithangana kya kuya, twatundu, étu twa suluka kwenda o njila yetu. Ene oso kumoxi ni ahatu ni twana twâ, a tuxinjikila bhu kanga dya mbanza. Twa fukama ku ndundu ya musanza wa kalunga, twa sambe, 6 anga twa dilekela. Mu kusuluka twa dilongo mu naviyu, ene anga avutuka ku mabhata mâ.
7 Kyoso ki twazubha o njila yetu twayi ku Tilu, twabhixila katé ku Potolomayida. Kwenyóko twa menekena o jiphange, anga tukala nawu kizuwa kimoxi. 8 Mu kizuwa kya kayela twatundu, etu twabhixila ku Sezaleya. Kwenyóko, twabokona mu inzo ya Filipe o mukunji, watokalele ku sambwadi dya mayala,* anga tuxala nê. 9 Mwene wakexile ni kiwana kya ana ahatu makudi,* exile ni ujitu wa upolofeta. 10 Mu kubhanga-mu izuwa yavulu, kweza polofeta amwixana Akabu watundu ku Judeya. 11 Mwene watusange, wakwata o phonda ya Phawulu, wadikutu nayu o inama ni maku, yu wambe, wixi: “O nzumbi ikôla yambe kiki: ‘O diyala watokala o phonda yiyi, anda mu kuta we kyenyiki ku Jijudé mu Jeluzaleme. Ene anda mu bhakula ku athu akwa jixi jengi.’” 12 Kyoso kitwevu kiki, etu enyoso ni jiphange akexile-bhu, twa mu dyondela phala kabande mu Jeluzaleme. 13 Phawulu wa vutwila, wixi: “Mwa mu didila-hi? Mukonda dyahi mwa mesena ku ngizozesa?* Ijiyenu-kyu kwila, eme ngala polondo phala ku ngi kuta ni kufwa mu Jeluzaleme, mukonda dya dijina dya Ngana Jezú.” 14 Kuma ki twatena ku mu fidisa, ki twa mu jijidika* dingi, maji twa mwambela: “Ki bhite-phe kala kya mesena Jihova!”
15 Kyoso kya bhiti o izuwa yenyóyo, twa disokejeka, etu twamateka kwenda o njila katé ku Jeluzaleme. 16 Sayi maxibulu amukwá atokala ku Sezaleya, ayi kumoxi n’etu, ya atwambata mu inzo ya Menasome mukwa Xipele, weji tuzalela. Mwene wabhangele mbandu ku maxibulu adyanga. 17 Kyoso ki twa bhixila mu Jeluzaleme, o jiphange a tutambulula ni kisangusangu. 18 Mu kizuwa kya kayela, twayi kumoxi ni Phawulu ku disanga ni Tiyaku. O tufunga twoso twakexile kwenyóko. 19 Phawulu wa amenekena, yu wa atangela o ima ya bhangele Nzambi ku akwa jixi jengi, bhukaxi ka ukunji wê.
20 Kyoso kyazubha kwívwa o ima yiyi, ene amateka kuximana Nzambi, anga amwambela, exi: “Phang’yetu manu Phawulu, eye wejiya kwila mazunda a Jijudé axikana Ngana, ene mu kayela o Kijila kya Mozé ni kuswina kwoso. 21 Maji ene évukwila eye wa mu longa o Jijudé joso atungu mu jixi jengi kuxisa o Kijila kya Mozé, mu kwa tangela kwila katokala kusaya o twana twâ, mba kukamba kukumbidila o itumu yoxinde kyá. 22 Ihi i twanda bhanga ni maka enyá? Mukonda ene anda kwijiya kwila eye weza. 23 Mu kiki, bhanga o kima kitwanda kutendelesa: Twala ni kiwana kya mala ate kikutu kwa Nzambi. 24 Ambata o mayala yá, mu dizelese kala kituma o Kijila, dikila o ibhindamu yâ phala a bhute o ndemba yâ. Kyenyiki, athu oso anda mona kwila o ima ya mu kutatela, ya makutu ni kwila eye wa mu kwenda mwene kyambote ni kubelesela we o Kijila kya Mozé. 25 O athu akwa jixi jengi axikina Ngana, twa a sonekena o ima yatokala kubhanga kwila, atokala kulenga o ima yó satele o iteka, ni manyinga ni ku kamba kudya xitu ya yama ka izunzumuna o manyinga,* ni kulenga o undumbu.”*
26 Kyenyiki, mu kizuwa kya kayela Phawulu wambata o mayala, yu wa dizelesa kumoxi ni ene. Wabokona mu tembulu phala kutangela se thembu kuxi yeji bhwa o izuwa ya kudizelesa, ni kizuwa kya kubhakula o sata phala o mbote yâ.
27 Kyoso kexile mu bhwa kyá o sambwadi dya izuwa, o Jijudé atundile mu kibatu kya Azya, afunyisa o mundu, akwata Phawulu, 28 ya adikola, exi: “Enu akwetu mu akwa Izalayele, tu kwatekesyenu! Yú mwéne o diyala wene mu longa ku athu oso, ni mu ididi yoso ima yayibha yalungu ni mundu wetu, Kijila kyetu ni kididi kiki. Mwene wabheka we akwa Ngelexya mu tembulu, yu waxidisa o kididi kiki kikôla.” 29 Ene azwela kiki mukonda amonene Phawulu kumoxi ni Tolofimu mukwa Efezu, mu mbanza ya Jeluzaleme. Kyenyiki o athu abanzele kwila, Phawulu wa mwambatele mu tembulu. 30 Mu mbanza yoso anga mu kala kavwanza, athu avulu eza ni lusolo akwata Phawulu a mu koko bhu kanga dya tembulu. Mu kithangana kyenyókyo, o mabhitu a tembulu a ajika. 31 Kyoso kyakexile phala ku mu jibha, o kabhitangu ka kibuka kya masoladi watambula o njimbu kwila, mu mbanza ya Jeluzaleme mwala kavwanza kadikota. 32 Mu kithangana kyenyókyo mwene wongeka o masoladi ni jikabhitangu ja masoladi, anga ukulumuka ni lusolo bhwakexile o mundu. Kyoso o mundu kyamono o kabhitangu ni masoladi, kasuluka dingi ni kumubeta, amweha.
33 O kabhitangu wazukama bhwakexile Phawulu, wa mu kwata, yu wa tumu ku mu kuta ni malubhambu ayadi. Mwene anga wibhwidisa se nanyi wexile Phawulu ni ihi ya bhangele. 34 Maji sayi athu ku mundu akexile mudikola kiki, amukwá akexile mu dikola kyokyo. Mukonda dya kavwanza, o kabhitangu katenene kutendela kima. Kyenyiki watumu kwambata Phawulu ku mbonge ya masoladi. 35 Kyoso mwene kyabhixila bhu jixikata, o masoladi abhingile ku mwambata kuma o mundu wamesenene ku mubeta. 36 Mukonda kwexile athu akexile ku mu kayela ni kudikola, exi: “Mu jibhyenu!”
37 Kyakexile phala ku mwambata mu mbonge ya masoladi, Phawulu wambela o kabhitangu ka kibuka kya masoladi: “Nga mesena ku kutangela kima.” Mwene wambela Phawulu: “Mbé eye wejiya kuzwela o dimi dya Ngeleku? 38 K’eye o diyala o mukwa Ijitu wa bhukumukine o nguvulu, wambatele o midi jiwana ja ijibhangânga mu kikangalakata?” 39 Phawulu wa mu tambwijila: “Mu kidi eme ngi Judé, ngi mukwa Tálusu, mbanza ya fumana mu Silisya. Nga kudyóndo, ngehele ngi tangela kima ku mundu.” 40 Kya mwehela kuzwela, Phawulu wemana bhu xikata, yu wabhange kijimbwete ku mundu ni lukwaku. O mundu woso wadixibha, mwene anga uzwela nawu mu dízwi dya Hebalayiku, wixi: