Ku Akwa Loma
16 Ngi mi ijidisa phang’yetu ya muhatu Febe, wa mu sidivila mu kilunga kya Senkeleya. 2 Mu tambululyenu kala kyene mu tambulula yó a asolo kwa Ngana. Mu kwatekesyenu mu ima yoso ya bhindamena, mukonda mwene wakwatekesa jiphange javulu, katé mwene n’eme.
3 Menekenenu Pidisila ni Akila, akalakadi ni akwetu mwa Kidistu Jezú. 4 Ene ate o myenyu yâ* mu ilwezu mukonda dyami. Eme ni jiphange joso mu ilunga ya yó ki Jijudé, twasakidila kyavulu. 5 Menekenenu we o kilunga kyene mu dyongeka mu inzo yâ. Menekenenu phang’yetu ya kazola Epênetu, ubhanga mbandu ku athu adyangele kukala maxibulu a Kidistu ku kibatu kya Azya. 6 Menekenenu Madiya, yó wakalakala kyavulu phala o mbote yenu. 7 Menekenenu Andoloniku ni Juniya o jindandu jami, athu u nga kexile nawu mu kaleya. O jipoxolo a ejiya kyambote, ene ala kyá thembu yavulu mu kukayela Kidistu, eme ndenge.
8 Menekenenu Ampidiyatu, kamba dyami dya kazola mwa Ngana. 9 Menekenenu Lubanu, mukalakadi ni mukwetu mwa Kidistu. Menekenenu we kamba dyami dya kazola Xitake. 10 Menekenenu Apele, selevende ya fiyele ya Kidistu. Menekenenu we o mwiji wa Alixitóbulu. 11 Menekenenu Helodiyá ndandu yami. Menekenenu oso atokala ku mwiji wa Nadisizu ala mwa Ngana. 12 Menekenenu Tidifena ni Tidifoza, ahatu akalakala ni kuswina kwoso mwa Ngana. Menekenenu we phang’yetu ya kazola Pelesida, mukonda mwene wene mu kalakala ni kuswina kwoso mwa Ngana. 13 Menekenenu Lufu, o selevende a mu solo kwa Ngana, ni many’â wa dibhange we mam’etu. 14 Menekenenu Asinkilitu, Felengonde, Helemeze ni Pataloba, Heleme ni jiphange ala nawu kumoxi. 15 Menekenenu Filôloko, Judya, Nelewu ni phang’yê ya muhatu, ni Odimpa, ni mundu woso wa Nzambi* ala nawu kumoxi. 16 Dimenekenyenu mudyenu ni jinzobole.* O jiphange joso mu ilunga ya Kidistu a mi menekena.
17 Phange jami, kindala ngi mitangela kwila dilangyenu ku athu ene mu bheka ku diwanuna, ni kuzozesa o kixikanu kya akwâ, mukonda ene alonga ulongelu wa makutu. Disandulyenu mwaxaxi ka athu yá. 18 Athu enyá ki abhika a Ngana yetu Kidistu kana, ene abhika a jihânji jâ. Ene a nganala akwâ, ni izwelu yâ yambote, ni kwa ximana mu mangonya. 19 Athu oso a m’ijiye kwila mu akwa kutumaka, eme nga sanguluka kyavulu mu kwijiya o maka enyá. Nga mesena kwila mu kala mu jinjimu mu ima yambote, maji mu ima yayibha mu kale mu yôwa. 20 Kwa kambe ngó, o Nzambi mukwa kubhana o kutululuka wanda sasujula Satanaji bhoxi dya inama yenu. O ngalasa ya Ngana yetu Jezú, ikale ni enu.
21 Timote mukalakadi ni mukwetu, kumoxi ni jindandu jami, Lusiyu, Jasono ni Sosipata a mi tumikisa o umenekenu.
22 Eme Télesyu, ngasoneka o mukanda yú, ngi mi tumikisa o umenekenu mwa Ngana.
23 Ngayu wa ngizalela, wavu o inzo mwene mu dyongeka o kilunga, wa mi tumikisa o umenekenu. Elastu mukwa kubhaka o kitadi* kya mbanza, ni phang’yê Kwálutu, a mi tumikisa we o umenekenu. 24 ——
25 Nzambi utena ku mi swinisa, bhukaxi ka njimbu yambote i nga mu boka, ni bhukaxi ka njimbu yalungu ni Jezú Kidistu. O njimbu yenyiyi, a itukulula bhukaxi ka ikutu ya Nzambi a ibhakele mu jithembu ja xahulu. 26 Maji kindala a tulondekesa nayu ni ku tu ijidisa bhukaxi ka Mikanda yasoneka o Jipolofeta. O Nzambi yetu yakalela-ku, wa tumu kwijidisa ku akwa jixi jengi phala o athu atumake bhukaxi ka kixikanu. 27 O Nzambi, imoxi-élele wejiya o ima yoso, atambule fuma bhukaxi ka Jezú Kidistu, katé ku hádya ni hádya. Kyene!*