O Mukanda wa Kayadi wa Phetele
1 Eme Ximá dya Phetele, ngi mubhika ni poxolo ya Jezú Kidistu, nga mu sonekena yó ala ni kixikanu kya katunda kyasokela ni kixikanu kyetu, bhukaxi ka kuyuka kwa Nzambi yetu ni kwa Mubhuludi wetu Jezú Kidistu:
2 O ngalasa ya Nzambi ni kutululuka, kukale ni enu bhukaxi ka kwijiya kwa Nzambi ni kwa Ngana yetu Jezú. 3 Bhukaxi kakutena kwê, Nzambi watubhana* o ima yoso i tu kwatekesa ku mubheza mwene ngó, mukonda dya kwijiya kwa kidi kwalungu ni Yó wa twixana ku fuma yê ni mumbote yê. 4 Mukonda dya ima yiyi, mwene watubhana* ikanenu yambote, phala bhukaxi ka ikanenu yiyi, enu mukale mu kidifwanganu kya Nzambi mukonda mwalenge o ukexilu wayibha wa mundu yú a ufunyisa ku jihânji jayibha.
5 Mukonda dya kyenyiki, bhangenu yoso phala ku kixikanu kyenu mu bandekeseku o mbote, o ku mbote mu bandekeseku o kwijiya, 6 o mu kwijiya mu bandekeseku o kuditumina Jihânji, o kuditumina jihânji mu bandekeseku o kukolokota, o mu kukolokota mu bandekeseku o kuxila Nzambi, 7 o mu kuxila Nzambi, mu bandekeseku o kudizola ni jiphange, o mu kudizola ni jiphange, mu bandekeseku o henda ku athu oso. 8 Mukonda se mukala ni idifwa yiyi, anga yene ivula, enu mwanda tena kukala ni ibhangelu yambote yalungu ni kwijiya kwa Ngana yetu Jezú Kidistu. Kyenyiki, kimwanda bhwila, kimwanda kamba we kwima ibundu.
9 Mukonda woso wakambe o ima yiyi, wala kifofo, mwene wajika o mesu mê ku mukengeji,* wa dijimbi kwila o ituxi yê yokulu a mu lolokayu kyá. 10 Kyenyiki phange jami, swinenu mu ku dikwatenena mu kixanu kyenu, kuma amisolo kwa Nzambi, mukonda se mu kolokota mu kubhanga o ima yiyi, ki mwanda bhwila, kimwanda zoza mu kixikanu kyenu. 11 Mu kubhanga kiki anda myehela kubokona ni fuma mu Utuminu wakalelaku wa Ngana yetu ni Mubhuludi, Jezú Kidistu.
12 Mukonda dya kiki, ngamesena ku mi lembalesa o ima yiyi, sumbala enu mwa ijiya kya, ni kwila, mwakolo kya mu ilongesu yakidi i mwa dilongo. 13 Kuma ngala hanji mubalaka* yiyi, ngamono kwila kima kyambote ku mi dimuna ni ku mi lembalesa. 14 Mu kwijiya kwila, kwakambe ngó bhofele, o balaka yami anda ikatula, kala kya ngi ijidisa Ngana yetu Jezú Kidistu. 15 Nganda bhanga yoso, phala kyoso kinganda mi xisa, mutene kulembalala* o ima yoso yiyi.
16 Etu ki twa mi ijidisa o kutena ni kutukuluka kwa Ngana yetu Jezú Kidistu bhukaxi ka misoso ya makutu ijila ku jindunge ja muthu wosowoso, kana. Maji etu twala tu jimbangi, mukonda twa mwene o fuma yê ni mesu metu. 17 Kuma mwene watambula o kijingu ni fuma kwa Nzambi, o Tata, kyoso Nzambi bhukaxi ka kubhenya kwê, kya mwambela, wixi: “Yú mwene Mon’ami wakazola, eme nga mu xikina.” 18 Kyene, etu twevu o izwelu yiyi kutunda ku dyulu, kyoso ki twakexile kumoxi ni mwene ku mulundu ukôla.
19 Kyenyiki, tu dyelela dingi mu izwelu ya jipolofeta, enu mwa mubhanga kyambote mu kutonginina o izwelu ya jipolofeta, yedi kala kandeya ka mwikina mu kididi kya vundu, (katé kyanda moneka o dikumbi anga o thethémbwa ya kamene itukuluka) kumixima yenu. 20 Maji ejiyenu-kyu kwila, kikwala maka a upolofeta ala mu Mikanda Ikôla, atundu mukanu dya muthu wosowoso. 21 Mukonda o maka a upolofeta, kejila mu vondadi ya muthu, maji o athu azwela o maka atundu kwa Nzambi, bhukaxi* ka nzumbi ikôla.