Kala Kyasoneka Matesu

25 “O Utuminu wa dyulu wa difwangana ni kwinyi dya ilumba,* akwata o tundeya twâ, anga atunda phala kudisanga ni ngayala. 2 Mudyâ, kitanu kyatobho, kitanu kyadimuka.* 3 O ilumba yatobho akwata o tundeya twâ, kambata dingi máji. 4 Maji o yadimuka, ambata máji mu jingalafa jâ, kumoxi ni tundeya twâ. 5 Kuma ngayala wakexile mu laleka, ene oso kilu kya akwata, yá azeka. 6 Mukaxi ka usuku-phe, o athu adikola, exi: ‘Ngayala yú wiz’ó! Ndenu mu disange n’ê.’ 7 O ilumba yoso abalumuka, anga asokejeka o tundeya twâ. 8 O ilumba yatobho atangela o ilumba yadimuka, exi: ‘Ku máji menu, tu bhanyenu-ku twofele, mukonda kwakambe ngó o tundeya twetu twanda jima.’ 9 O ilumba yadimuka, a avutwila, exi: ‘O máji utwala nawu, nange kanda soka phala etu enyoso. Mu kiki, ndenu kwa yó a mu sumbisa, ni mu sumbe tu máji phala enu.’ 10 Kyoso o ilumba yatobho kyayi mu sumba o máji, o ngayala wabhixila. O ilumba yakexile polondo, abokona ni mwene mu fesa ya ukaza. Anga o dibhitu, adijika. 11 Kyoso o ilumba ya mukwá kyabhixila, ene adikola, exi: ‘Ngana, Ngana, tu jikwile o dibhitu!’ 12 Mwene wa avutwila, wixi: ‘Ngi mi tangela o kidi kwila, ki ngi m’ijiya.’

13 “Kolokotenu-phe ni kudilanga, mukonda o kizuwa ni kithangana, ki mwa k’ijiya.

14 “Mukonda o Utuminu wa dyulu, wa difwangana ni diyala weji kuya ixi yengi. Mwene wixana o abhik’ê, u atuma kutambula konda ya jimbote jê. 15 Mwene ubhana talendu* jitanu ku mubhika wa dyanga, o wa kayadi, u mu bhana talendu jiyadi, o wa katatu u mu bhana imoxi. Kala muthu watambula kala kyasoko nayu, mwene anga uya ixi yengi. 16 O mubhika watambula jitanu, wayi ni lusolo mubhanga wenji ni kitadi kiki, anga u nganyala-ku dingi talendu jitanu. 17 O a mu bhana jiyadi, wa nganyala-ku we jiyadi. 18 Maji o a mu bhana talendu imoxi, wayi, wakande dikungu, anga usweka o kitadi kya ngana yê.

19 “Kyabhiti thembu yavulu, o ngana ya abhika wavutuka, anga ubhanga nawu jikonda. 20 O watambwile talendu jitanu, weza kwa ngana yê, yu wabheka jitanu ja mukwá, wixi: ‘Ngana, eye wa ngibhele talendu jitanu. Tala, nga nganyala-ku dingi jitanu.’ 21 O ngana yê wa mu tangela, wixi: ‘Kyawabha, mubhika wambote, wa fiyele! Eye wa londekesa ufiyele mu kulanga ima yofele. Nganda kubhana ima yavulu phala ku ilanga. Sanguluka kumoxi ni ngana yé.’ 22 O watambwile talendu jiyadi, weza, yu wambe, wixi: ‘Ngana, eye wa ngibhele talendu jiyadi. Tala, nga nganyala-ku dingi jiyadi.’ 23 O ngana wa mu tangela, wixi: ‘Kyawabha, mubhika wambote, wa fiyele! Eye wa londekesa ufiyele mu kulanga ima yofele. Nganda kubhana ima yavulu phala ku ilanga. Sanguluka kumoxi ni ngana yé.’

24 “Mu kusuka-ku, o mubhika watambwile talendu imoxi, weza, yu wambe, wixi: ‘Ngana, eme ngejiya kwila, eye u muthu wabhonzo! Mukonda ukanza bhu wakambe o kukuna, ubhongolola bhu wakambe o kukuwa. 25 Mu kiki, wôma wa ngi kwata, eme nga sweka o kitadi bhoxi. O kitadi kyé kyenyiki.’ 26 O ngana-phe wa mu vutwila, wixi: ‘Eye u mubhika wayibha, u kimonya! Mbé wa kijidile kwila, ngi kanza bhu nga kambe kukuna, ngi bhongola bhu nga kambe kukuwa? 27 Hinu o kitadi* kyami wa kibhana ku jingeji,* mu kuvutuka, ngeji kitambula ni kibandekesu.

28 “Mu kiki, mu tambulyenu o talendu yala nayu, mu ibhane kwa yó wala ni dikwinyi. 29 Mukonda woso wala ni kima anda mu bhana dingi, mwene wanda kala ni ima yavulu. Maji woso kala ni kima, katé mwene ni kima kyofele kyala nakyu, anda mu tambula-kyu. 30 O mubhika ka sidivila kima, mu texyenu bhu kanga kwa vundu. Kwenyóko, kwene kwanda kala o kudila kwê ni kudikokota ku mazu.’

31 “Kyoso o Mon’a muthu kyanda kwiza ku fuma yê, kumoxi ni jianju joso, mwene wanda xikama ku kyandu kyê, kya ungana. 32 O ifuxi yoso yanda bhongoloka bhu pholo yê, mwene anga wanda kwa tungula, kála o mubhidi kya tungula o jimbudi mu jihombo. 33 Mwene anga wanda tula o jimbudi ku mbandu yê ya kadilu, o jihombo ku mbandu yê ya kyasu.

34 “O Sobha wanda tangela o athu ala ku mbandu yê ya kadilu, wixi: ‘Zenu, enu oso a mi besowala kwa Tata yami, mu lundule o Utuminu wo yudike phala enu, tundé ku dimatekenu dya ngongo. 35 Kuma ngexile ni nzala, enu mwa ngi bhana kúdya, ngexile ni dinyota, enu mwa ngi bhana menya. Ngexile ngi musonyi, enu mwa ngi zalela, 36 ngexile ni thuxi,* enu mwa ngi zwika. Nga katele, enu mwa ngi lange, ngexile mu kaleya, enu mwa ngi kundu.’ 37 Mu kiki-phe, o athu ayuka anda mu vutwila, exi: ‘Ngana, thembu kuxi twa ku mwene ni nzala, etu twa kubhana kudya? Mba wakexile ni dinyota, etu twa kubhana menya? 38 Thembu kuxi ki twa ku mwene u musonyi, etu twa kuzalela? Mba twa ku mwene ni thuxi, etu twa kuzwika? 39 Kizuwa kyebhi ki twa ku mwene wakate, mba mu kaleya, etu twa ku kundu?’ 40 O Sobha wanda kwa tambwijila, wixi: ‘Ngi mi tangela ni kidi kyoso kwila, kima kyoso-kyoso ki mwa bhangela umoxi ku tu ndenge tutu twa jiphange jami, mwa ngi bhangela-kyu eme.’

41 “Mu kiki, mwene wanda tangela yó ala ku mbandu yê ya kyasu, wixi: ‘Tundenu bhu mbandu yami, enu a mi balakala kwa Nzambi ku mi takula mu túbhya tu nangenena, two yudike phala Dyabhu ni jianju jê. 42 Mukonda nga kexile ni nzala, maji ki mwa ngi bhana kudya, nga kexile ni dinyota, enu ki mwa ngi bhana menya. 43 Ngexile ngi musonyi, maji enu ki mwa ngi zalela, ngexile ni thuxi, enu ki mwa ngi zwika. Ngexile mu kata ni mu kaleya, maji ki mwa ngi tambula konda.’ 44 Bhenyobho ene anda mu vutwila, exi: ‘Ngana, thembu kuxi ki twa ku mwene ni nzala ni dinyota, mba u musonyi, ni thuxi, kukata, mba mu kaleya, etu twa kambe ku ku kwatekesa?’ 45 Mwene-phe wanda kwa tambwijila, wixi: ‘Ngi mi ambela o kidi kwila, kima kyoso-kyoso ki mwa kambe ku kibhangela umoxi ku tu ndenge tutu, twa jiphange jami, mwa kambe ku ngi bhangela-kyu eme.’ 46 Athu yá anda kwa bwikisa,* maji o athu a yuka, anda tambula o mwenyu wakalelaku.”