Mukanda wa Tiyaku
5 Kindala, ivwenu enu mu jimvwama! Dilenu, mudikwate mukôndo mukonda dya wíndwa wanda kwiza kokwenu. 2 O jimbote jenu jabolo, o izwatu yenu a idi kutubamba. 3 O fuluja yanda jikinisa o ulu yenu ni phalata yenu yoso, yene yanda londekesa o kikuma kyenu ni kujikinisa o mikutu yenu. O jimbote ji mwabhake janda kala kala túya mu izuwa isukidilaku. 4 Talesenu! O akalakadi akalakala ku mabhya menu mwakambe kwafuta, a mudikola mu kubhinga kikwatekesu. O kudikola kwa akalakadi, kwabhixila kwa Jihova dya ifuxi. 5 Mungongo enu mwexile ni mwenyu wafuma, mwakexile mu kudya ni kukemba. Enu mwa* netene kala o kyama kyala phala kukijibha. 6 Enu mwafundisa ni kujibha o muthu wakambe kikuma. O kwila mwene kanda mi lungulukila?
7 Jiphange jami, kalenu ni mwanyu katé kyanda tukuluka Ngana. Talesenu kyebhi o kidimakaji kyakala mukinga o ibundu yambote itunda mu mavu. Mwene ukinga ni mwanyu woso katé kinoka o mvula ya dyanga ni yasukina. 8 Enu wenu, kalenu ni mwanyu, kolesenu o mixima yenu, mukonda o kutukuluka kwa Ngana kwazukama.
9 Jiphange jami, kanenu kuditenda* mudyenu phala ka mifundise. Talesenu! O Mufundixi wala kyá bhu mwelu. 10 Jiphange jami, yalungu ni kukolokota mu jiphaxi ni kukala ni mwanyu, kayelenu o phangu ya jipolofeta ja zwelele mu dijina dya Jihova. 11 Talesenu! Tutena kuzwela kwila o athu akolokota, azediwa.* Enu mwevu yalungu ni kukolokota kwa Jobe, mwejiya o mabesá a mubhana Jihova, mwamono we kwila Jihova o henda yê yadikota ni kwila, mukwa kulenduka.
12 Mu yoso yiyi, phange jami, kanenu kulôka. Ki mulokele o dyulu, né o ixi. Kanenu we kolokela kima kyosokyoso. Maji o kizwelu kyenu kya kwila “kyene” kikale kyene, “kana,” kana, phala Nzambi ka mifundise.
13 O kwila sayi muthu mudyenu wamutala hadi? Mwene akolokote mu kusamba. Sayi muthu mudyenu wasanguluka? A suluke mu kwimba mimbu ya kuximana. 14 O kwila sayi muthu mudyenu wamukata? Mwene exane o tufunga twa kilunga n’a musambele, a mu unde ni maji mu dijina dya Jihova. 15 O kusamba kuku kwa kixikanu, kwanda bhangesa o haxi* kudisanza, Jihova anga wanda mu balumuna. Kyenyiki, se mwene wate kituxi, o kituxi kyê anda mu loloka-kyu.
16 Kyenyiki, fisalenu mudyenu o ituxi yenu, disambelyenu mudyenu phala mudisanze. O musambu wa muthu wayuka wala ni kutena kwadikota.* 17 Elija wexile muthu kala etu oso, maji mwene wasambe ni kuswina kwoso phala kikunoke mvula. Anga mu mivu itatu ni mbeji jisamanu, mu ixi yenyóyo ki mwa nokene mvula. 18 Kyoso mwene kyasambe dingi, ku dyulu anga kusonoka mvula, o ixi anga ibhana idima.
19 Se muthu mudyenu a mu jimbidisa mu njila ya kidi, anga kukala dingi muthu u mubheka mu njila yiyi, 20 ijiyenu-kyu kwila, woso ubhangesa mukwa ituxi kuvutuka mu njila ya kidi, wamubhulula mukufwa,* mwene wamukwatekesa we ku muloloka o ituxi yê.