Daniyele

7 Ku muvu wa dyanga wa utuminu wa Belexazele, sobha ya Babilonya, Daniyele wamono isumwa mu nzoji. Mwene wasoneka o nzoji ya loto. Maka oso wa asoneka mwene. 2 Daniyele wambe:

“Mu isumwa i ngamono mu usuku, ngamono kitembwe kyakexile mutunda mu jimbandu jiwana ja ngongo, kyakexile mubhuka o menya a musanza wa kalunga. 3 Mu musanza wa kalunga mwexile mutunda yama iwana yonene, ki idifu.

4 “O kyama kya dyanga kyedile kala hoji, kyexile ni mabhabha a holokoko. Ngayi ni kutala kate kya kivuza o mabhabha, a kibalumuna, akimika ni inama iyadi kala muthu. O ukexilu wê wa kyama a ulungulula, a mubhana kilunji kya muthu.

5 “Kwamoneka dingi kyama kyamukwa kya kayadi, kyadifu ni ulusu. Kyene kyazangula kinama kimoxi, kyakwata jimbanji jiyadi ni mazu, a kyambela, exi: ‘Balumuka! Dya xitu yavulu.’

6 “Ngasuluka ni kutala, kwamoneka kyama kyamukwa, kyadifu ni ingo. Maji kyakexile ni mabhabha awana ku dikunda kala mabhabha a njila. O kyama kiki kyexile ni mítwe iwana, kyatambula ungana wa kutumina.

7 “Mukusuluka, ngamono dingi kyama kyengi kya kawana, kikwatesa wôma, kyakexile ni nguzu yavulu, kyexile we ni mazu amakota a felu. Kyene kyexile mudya ni kusasujula yoso ya mukondolokele. O ima yexile mu subhuka, wakexile mu idyota-dyota. Kyene kikidifu ni yama yamukwa i ngadyangele o kumona. Kyexile ni dikwinyi dya jingela. 8 Kyoso ki ngayi ni kutala kyambote o jingela, kwamoneka dingi lungela* lwamukwa, lwofele. Ku jingela jadyanga avuza-ku jitatu, ni bhukale kididi phala o lungela lwofele. Ngamono we kwila, o lungela lulu lwexile ni mesu kala a muthu, ni dikanu dyexile muzwela ni ukumbu.

9 “Ngasuluka ni kutala kate kyatula yandu. O Yó Wene-ku Tunde Xahulu anga uxikama. O izwatu yê yazelele kala neve, o ndemba yê mukwa ni ndemba ya mbudi. O kyandu kyê kyedile kala mulengu wa túbhya, o malola a kyandu kyê, mukwa ni túbhya twamuzukuta. 10 Bhu pholo yê bhu kunguluka túbhya mukwa ni ngiji. Jimidi ni jimidi ja jianju jexile mu mukalakalela, mazunda ni mazunda a jianju emanene bhu pholo yê. O Mufundixi* wamateka kufundisa, ajikula madivulu.

11 “Mukonda dya izwelu ya ukumbu ya lungela, ngasuluka ni kutala kate kyajibha o kyama, ya akibhana phala kukyoha mu túbhya. 12 O yama yamukwa a itambula o ungana, a yehela kukala ku mwenyu kate mu thembu yatokala.

13 “Ngasuluka ni kutala mu kisumwa, ngamono muthu wexile mutunda ku matuta. Amwehela kubokona, ya a mwambata kwa Yó Wene-ku Tunde Xahulu. 14 A mubhana ungana, kijingu ni utuminu phala o athu a ifuxi ni madimi moso a musidivile. O utuminu wê unangenena, kanda ubwika. Mwene wanda tumina kate ku hádya ni hádya.

15 “Bhenyobho, o ima i ngamono mu kisumwa ya ngikwatesa wôma, ngabhuwama. 16 Eme ngazukama ku anju imoxi ku jianju jemanene-bhu phala kwibhwidisa o dilombolwelu dya ima i ngamono. Mu kusuluka, mwene wa ngitambwijila yu wa ngijimbulwila o dilombolwelu dya ima i ngamono, wixi:

17 “‘O yama iwana yonene yiyi, kifwa, sobha jiwana janda moneka mu ngongo. 18 Maji o yó a asolo kwa Nzambi Sukeku, anda tambula o utuminu. Anda kala ni ungana, anda tumina kate ku hádya ni hádya.’

19 “Kyenyiki, ngamesenene kwijiya dingi yalungu ni kyama kya kawana, mukonda kikyadifwile ni yama yamukwa. Kyexile mukwatesa wôma wavulu, kyexile ni mazu amakota a felu. Kyexile we ni yala ya ngondo. Kyexile mudya ni kusasujula yoso ya mukondolokele. O ima yexile musubhuka wexile mu idyota-dyota. 20 Ngamesenene kwijiya we yalungu ni dikwinyi dya jingela jexile ku mútwe wa kyama kiki. Ngamesenene we kwijiya dingi yalungu ni lungela lwofele lwamoneka, lwabhangesa kuvuza jingela jitatu ku jingela jadyanga. O lungela lulu, lwexile ni mesu ni dikanu dyexile muzwela ni ukumbu. Lwene lwabetakota o lwamukwa ndenge.

21 “Ngasuluka ni kutala o lungela lwofele lwexile mulwa ita ni yó a asolo, maji lwexile mu atolola, 22 kate kyabhixila Yó Wene-ku Tunde Xahulu, yu wabatula o dimanda dya lungu ni yó a asolo kwa Nzambi Sukeku ni kwila, o kithangana kya yó a asolo phala kutambula o utuminu kyabhixila.

23 “O yó wa ngitangela o dilombolwelu, wambe: ‘O kyama kya kawana ki wamono, kilombolola utuminu wa kawana wanda kala mu ngongo. Wene wanda ditungula ku mautuminu amukwa. Wanda lwa ita, wanda bwika yoso yanda sanga mu ngongo. 24 O dikwinyi dya jingela, jilombolola dikwinyi dya jisobha janda moneka ku utuminu yú. Ku dima dyâ, kwanda kwiza dingi sobha yengi, wanda ditungula ku jisobha ja dyanga. Wanda tolola sobha jitatu. 25 Mwene wanda zwela ima yayibha kwa Sukeku, wandaya ni kuzukutisa yó a asolo kwa Sukeku. Wanda sota kulungulula o kijila ni jithembu jaxindi Nzambi phala kubhita o ima yiyi. O yó a asolo, anda ku abhakula bhu maku mê kate kyanda tenesa mivu itatu ni kaxaxi.* 26 Maji o mufundixi wamateka o kufundisa, a mutambula o ungana, ya a mubwika kate kya mujikinisa.

27 “‘O utuminu ni ungana ni kutena kwoso mu ngongo, a kubhana ku athu akôla, yó a asolo kwa Sukeku. O utuminu wâ unangenena, o jinguvulu joso jandaya ni ku asidivila ni ku abelesela.’

28 “Yiyi yene o ima i ngevu ni ima i ngamono mu kisumwa. Yene ya ngikwatesa wôma, ya ngibhuwamesa. Maji ima yoso yiyi nga ibhake ku muxima wami.”