Ajewu
2 Mu kizuwa kya makwinyi ayadi ni kamoxi ku mbeji ya kasambwadi, Jihova wazwela dingi ni polofeta Ajewu, wixi: 2 “Ngakudyondo, ebhwidisa Nzolobabele o nguvulu ya Judá, mon’a Salatiyele, ni mukunji wadikota Jozuwé mon’a Jehozadake ni mundu woso, wixi: 3 ‘Nanyi mwene mudyenu wamulembalala o kuwabha* kwokulu kwa inzo* yiyi? Kindala mwa mu imona kyebhi? O kwila o inzo yiyi yasokela ni yokulu mu kuwabha?’
4 Jihova wambe: “‘Maji eye Nzolobabele, swina. Eye we Jozuwé, u mukunji wadikota, mon’a Jehozadake, swina.’
Jihova wambe: “‘Enu mu mundu wa ixi yiyi, swinenu, mukalakale.’
“‘Mukonda eme ngala n’enu,’ kyene kyambe Jihova dya ifuxi. 5 ‘Lembalalenu kwila, kyoso ki mwatundu ku Ijitu, ngakanena ku myendesa ni kutena kwami. Kimukale ni wôma.’”
6 “Mukonda Jihova dya ifuxi wambe kiki: ‘Lwamukwa dingi, kwa kambe ngo bhofele, nganda tungutisa o maulu, o ixi, o musanza wa kalunga ni mavu akukuta.’
7 “‘Nganda tungutisa o ifuxi yoso. O ima yavalolo ya ifuxi yoso, yanda bokona mu inzo yiyi. O inzo yiyi nganda ifumanesa dingi, o yokulu ndenge’, kyene kyambe Jihova dya ifuxi.
8 “‘O phalata ni ulu ya ngitokala,’ kyene kyambe Jihova dya ifuxi.
9 Jihova dya ifuxi wambe kiki: “‘O fuma ya inzo yiyi ya kà beta-kota, o ya inzo yokulu ndenge.’
“Nganda bheka kutululuka mu kididi kiki,” kyene kyambe Jihova dya ifuxi.
10 Mu kizuwa kya makwinyi ayadi ni kiwana, ku mbeji ya kavwa, ku muvu wa kayadi wa utuminu wa sobha Dályu, Jihova wazwela dingi ni polofeta Ajewu, wixi: 11 “Jihova dya ifuxi wambe kiki: ‘Ngakudyondo, ebhula o akunji ihi yamba o kijila: 12 “Se kukala diyala wambata xitu yosatele mu kizwatu kyê, o kizwatu kyê anga kitula ku mbolo, ku makunde, ku vinyu, ku máji mba ku kudya kwoso-kwoso, o kwila o kudya kuku kwanda kituka we kima kikôla?”’”
O akunji atambwijila: “Kana!”
13 Mu kyenyiki, Ajewu wa ebhwidisa: “Se muthu wakasana mukonda dya kukwata ku kimbi, anga ukwata kima ku makudya yá, o kwila o kudya kwakwata kwanda kasana?”
O akunji atambwijila: “Kyene! Kwanda kasana mwene.”
14 Ajewu wambe-phe: “‘Kyene we kyala o mundu yú ni kifuxi kiki bhu pholo yami.’ Kyene kyambe Jihova: ‘Kikale o ikalakalu ya maku mâ ni yoso yabhakula bhabha, yakasana.’*
15 “‘Maji ngamidyondo, ivwenu o* izwelu yiyi, tunde lelu kate ku hádya: Ihi yexile mubhita ande dya kumateka kutunga dingi o tembulu ya Jihova? 16 Kyoso o muthu kyexile muya bhu kididi kya kutula o idima,* se wexile mu kingila kubhongolola makwinyi ayadi a izongelu, wexile musanga ngo dikwinyi. Kyoso muthu kyexile muya mu kididi kya kubhanga o vinyu, phala kukatula makwinyi atanu a jimbinda, wexile musanga ngo makwinyi ayadi. 17 Eme ngamikastikala mu ikalakalu yoso ya maku menu, mu kumibhekela mwanya watema kyavulu, mofu ni mvula ya matadi, maji né ngo muthu umoxi mwaxaxi kenu kavutuka kokwami,’ kyene kyambe Jihova.
18 “Lelu, mu kizuwa kya makwinyi ayadi ni kiwana, kya mbeji ya kavwa, ate o kaboko ka tembulu ya Jihova. Xinganekenu mu maka yá: 19 Mu ididi yenu ya kubhaka o kudya,* kimwala jimbutu. O muxi wa muvidi, wa mufiku, wa lomá ni wa mudiva, yene yoso ki ibhana ibundu. Maji tunde lelu, nganda mibesowala.’”
20 Mu kizuwa kya makwinyi ayadi ni kiwana, mu mbeji ya kavwa, Jihova wazwela ni Ajewu lwa kayadi, wixi: 21 “Ambela Nzolobabele nguvulu ya Judá: ‘Nganda tungutisa o maulu ni ixi. 22 Nganda bwikisa o yandu ya jisobha. O kutena kwa mautuminu a ifuxi nganda ku ubhwisa-ku. Nganda bwikisa o makalu a ita ni yó endela-mu ni jikabalu. O yó endela mu jikabalu anda dijibha mudyâ ni xibhata.’”
23 Jihova dya ifuxi wambe kiki: “‘Mu kizuwa kyenyokyo, eye Nzolobabele mon’a Salatiyele, nganda kubhangesa kukala u nela ya sineta,’ kyene kyambe Jihova, ‘mukonda éye nga kusolo,’ kyene kyambe Jihova dya ifuxi.”