Ikalakalu ya Jipoxolo
1 Tiyófilu, nga dyangele kusoneka yalungu ni ima yoso yamateka kubhanga Jezú ni kulonga, 2 katé o kizuwa kya mwambata ku dyulu, kyoso kyabhana o itendelesu bhukaxi ka nzumbi ikôla ku jipoxolo jê jasolele. 3 Kyazubha kutala o hadi, mwene wa a tukulukila lwavulu phala kudilondekesa ni kidi kyoso kwila wakexile ku mwenyu. Ene a mumono mu makwinyi awana a izuwa, yu wazwela yalungu ni Utuminu wa Nzambi. 4 Kyoso mwene kya dyongekele ni ene, wa atendelesa, wixi: “Ki mutunde mu Jeluzaleme, maji kolokotenu mu kukingila o kima kya mi kanena o Tata, kala ki nga mi tangele kyá, 5 mukonda Nzwá wa mi batizala ni menya, maji kwakambe ngó tu izuwa, anda mi batizala ni nzumbi ikôla.”
6 Kya dyongekele dingi lwa mukwá, ene a mwibhwidisa: “Ngana, o kwila mu kithangana kiki kyene ki wanda bheka dingi o utuminu mu Izalayele?” 7 Mwene wa atambwijila: “O kwijiya o jithembu mba o ithangana yaxindi Tata u kutena kwê,* kikwa mi tokala enu. 8 Maji kyoso o nzumbi ikôla ki yanda kwiza kuthandu dyenu, mwanda tambula kutena ni kukala mu jimbangi jami mu Jeluzaleme, mu Judeya yoso, mu Samadiya, katé ni ku maxokololo a jixi.” 9 Kyazubha o kuzwela o ima yiyi, kyoso kyakexile hanji mu mutonginina, mwene a mwambata ku dyulu, anga dituta di muvungina. Mu kyenyiki ene katena dingi ku mumona. 10 Kyoso ene kyakexile mutala Jezú kubanda ku dyulu, mu kithangana kyenyókyo ku mbandu yâ kwatukuluka mala ayadi ni izwatu yazele. 11 Ene ambe: “Enu mu akwa Ngalileya, mukonda dyahi-phe mwemana ni kutalela ku dyulu? O Jezú yú, a mwambata mwaxaxi kenu, wanda vutuka mu ukexilu kala ki mwa mumono kuya ku dyulu.”
12 Kyenyiki, mu kutunda ku Mulundu wa Midiva ene avutuka mu Jeluzaleme. O mulundu wazukamene ni mbanza ya Jeluzaleme, o dikanga dyê dyexile dya kilómetulu kimoxi.* 13 Kyoso ene kyabhixila, abande mu inzo yathandu, mwa azalela. Akexile mwenyomo, Phetele, Nzwá, Tiyaku, Mandele, Filipe, Tomé, Matulu,* Matesu, Tiyaku mon’â Lufewu, Ximá o muthu waswina ni Juda mon’â Tiyaku. 14 Ene oso anga akolokota mu kusamba kumoxi ni ahatu amukwá ni Madiya many’a Jezú ni jiphange ja Jezú.
15 Mu izuwa yenyóyo, Phetele wemana bhukaxi ka jiphange (o athu akexile-bhu atenesene hama ni makwinyi ayadi), yu wambe: 16 “Enu akwetu phange jami, bhukaxi ka Davidi, o nzumbi ikôla yakanena yalungu ni Juda, yó wendesa o athu akutile Jezú. Kiki kyatokalele kubhita phala kudikumbidila o ima yosoneke mu Mikanda Ikôla. 17 Mwene wakexile mwaxaxi ketu, a musolele we phala kubhanga mbandu mu ukunji yú. 18 (O diyala didi wasumbu kibhela ni kitadi kya mangonya, o mu kibhela kyenyókyo mwene mwa lawukila ni mútwe bhoxi. O mukutu wê wabaze,* o mídya yoso yatundu. 19 Athu oso mu Jeluzaleme eza mu kwijiya o maka enyá, mukonda dya kiki, o kididi kyenyókyo mu dízwi dyâ akixana Aseledama, kilombolola “Kibhela kya Manyinga.”) 20 Kuma kyosoneke mu divulu dya Jisálamu: ‘Dibhata dyê dixale ngundu, ki mukale muthu utunga-mu,’ ni kwila ‘muthu wengi u mu bhingane mu kikalakalu kyê kya kafunga.’ 21 Kyenyiki, kwabhingi kwila muthu umoxi wakexile n’etu kyoso Ngana Jezú kyakexile mubhanga o ikalakalu yê* mwaxaxi ketu 22 (tundé o kizuwa kya mu batizala kwa Nzwá, katé o kizuwa kya mwambata ku dyulu), ukale mbangi ya difukunukinu dyê kumoxi n’etu.”
23 Ene anga exana kiyadi kya mala: Zuze amwixana Balasaba, a mwijidile we mu dijina dya Justu, ni Matiya. 24 Ene asambe, exi: “Jihova, éye wejiya o mixima ya athu oso, londekesa se ku kiyadi kya mala yâ, nanyi wa musolo 25 phala kutambula o ukunji yú, ni kikalakalu kya kukala poxolo, kyaxisa Juda yó wasoto o njila yê.” 26 Ene atela jisólote phala bhu kiyadi kyâ asole-bhu muthu umoxi. Ene asolo Matiya, mwene anga ubhanga mbandu ku kwinyi ni umoxi dya jipoxolo.