Kala Kyasoneka Luka

24 Mu kizuwa kya dyanga kya semana,* ene adimeneka ku mbila, ambata o ima inuha kyambote ya sokejekele. 2 Maji ene amono kwila, o ditadi dyakexile bhu mwelu, adisetula-bhu. 3 Kyoso kyabokona mu mbila, kasange-mu o kimbi kya Ngana Jezú. 4 Kya sasumuka hanji ni ima yiyi, bhu mbandu yâ, bhwa atukulukila mayala ayadi akexile ni izwatu ibhenya. 5 O ahatu wôma wa akwata, abhetamena o jipholo bhoxi, o mala anga azwela: “Mukonda dyahi mwa musota mw’axaxi ka madifundu, yó wala ku mwenyu? 6 Mwene kàla bhabha, a mu fukununa. Lembalalenu ya mi tangele mwene, kyoso ki mwakexile mu Ngalileya 7 kwila o Mon’â muthu eji mu bhakula ku akwá ituxi, ni ku mu jibha ku taka,* ni ku mu fukununa mu kizuwa kya katatu.” 8 Kyenyiki-phe, o ahatu alembalala o izwelu ya Jezú, 9 anga atunda mu mbila, ya ayi mutangela o ima yoso yiyi ku kwinyi ni umoxi dya jipoxolo ni ku athu amukwâ. 10 O ahatu azwela o ima yiyi, exile Madiya dya Manda, Nzwana ni Madiya many’â Tiyaku. O ahatu amukwá akexile nawu, atangela we o ima yiyi ku jipoxolo. 11 Maji ene kaxikina o ima yazwela o ahatu. Abanze kwila ene akexile ni masambi-sambi.

12 Phetele-phe wabalumuka, yu wayi ni kulenga katé ku mbila. Mu kuzongola, wamono ngó malasola a linyu. Kyenyiki wavutuka kubhata, ni ku dibhwidisa se ihi yabhiti.

13 Mu kizuwa kyenyókyo, maxibulu ayadi akexile muya mu sanzala a ixana Emawú. Mu kutunda mu Jeluzaleme phala kuya mu sanzala yiyi, o dikanga dyexile kwinyi ni umoxi dya jikilómetulu.* 14 Ene akexile mu dizwelesa yalungu ni ima yoso yiyi yabhiti.

15 Kyoso kyakexile hanji mu dizwelesa, Jezú wa azukama anga umateka kwenda nawu kumoxi, 16 maji ene kejidile se mwene nanyi. 17 Mwene wa a ebhwidisa: “Maka-hi u mwa muzwela?” Ene emana, ni kuluwala. 18 Sayi dixibulu a mwixana Keleyofa, wa mu tambwijila: “O kwila eye u mukwá ixi yengi watungu ubheka wé mu Jeluzaleme, wakambe kwijiya* o ima yabhiti mwenyomo mu izuwa yiyi?” 19 Mwene wa ebhwidisa: “Ima yahi?” Ene a mu tambwijila: “Ima yalungu ni Jezú, mukwá Nazalé. Bhu pholo ya Nzambi ni ya athu, mwene wa dilondekesa kala polofeta wexile ni kutena bhukaxi ka ibhangelu ni izwelu yê, 20 maji o akunji etu a makota ni adyakime, a mu balakala o kufwa, ya a mu phaphela ku taka.* 21 Maji etu twa dyelele kwila o diyala didi mwéne weji bhulula Izalayele. Tundé we kyabhiti o ima yoso yiyi, lelu o kizuwa kya katatu kyá. 22 Sayi ahatu mudyetu a tu bhangesa kudiwana, mukonda a dimeneka ku mbila, 23 maji kasange o mukutu wê, avutuka azwela kwila, bhwa atukulukila jianju jambe kwila mwene wala ku mwenyu. 24 Kyenyiki, sayi athu akexile kumoxi n’etu ayi ku mbila, ya asange o ima yoso kala kya atangela o ahatu, maji ene kamono Jezú.”

25 Mwene anga wa ambela, wixi: “Enu mwakambe o kutongoloka, mwa kokoloka kuxikina o ima yoso yazwelele o jipolofeta! 26 O kwila Kidistu katokalele kutala o hadi yoso yiyi, n’a tambule o ungana wê?” 27 Mwene wamateka kwa jimbulwila o ima yasoneka Mozé ni Jipolofeta ja mukwá yalungu ni mwene, kala kyosoneke mu Mikanda Ikôla.

28 Ene anga azukama bhu sanzala yakexile muya, mwene wedi kala weji kwa somboka. 29 Maji ene ajiji ni ku mutangela n’a xale nawu, exi: “Xala bhabha n’etu, mukonda ngoloxi kyá, o dikumbi dya mufwa kyá.” Mukonda dya kiki, mwene wabokona phala kukala nawu. 30 Kyoso kya kexile mudya,* mwene wakwata o mbolo, wasakidila Nzambi, wabukula o mbolo yu wamateka kwa bhana-yu. 31 Kyenyiki o mesu mâ ma jikuka, anga amona kwila Jezú. Maji mwene wa jimuka ku mesu mâ. 32 Anga a dyambela mudyâ, exi: “O maka mê a tula ku mixima yetu, kyoso mwene kyakexile mu tu lombolwela kyambote o Mikanda Ikôla mu njila!” 33 Mu kithangana kyenyókyo ene abalumuka, avutuka mu Jeluzaleme, ya asange o kwinyi ni umoxi dya jipoxolo, ni yó adyongeka nawu kumoxi, 34 anga azwela: “Mu kidi, Ngana a mu fukununa, yu wa tukulukila Ximá!” 35 Kyenyiki, ene azwela o ima yabhitile mu njila, ni kyebhi kyeza mu kwijiya Jezú kyoso kya mumono kubukula o mbolo.

36 Kyoso kyakexile hanji muzwela o ima yiyi, Jezú watukuluka mw’axaxi kâ, yu wa ambela, wixi: “O kutululuka kukale ni enu.” 37 Maji ene adiwana, ya akexile ni wôma, abanzele kwila amono nzumbi. 38 Mwene wa a ebhwidisa, wixi: “Mukonda dyahi mwa sasumuka? Mukonda dyahi mwala ni phata ku mixima yenu? 39 Talenu o maku mami ni inama yami, kuma éme mwéne. Ngi kwatyenu, mukonda o nzumbi ki ikala ni xitu ni ifuba kala eme.” 40 Kyoso kyazwela kiki, mwene wa alondekesa o maku ni inama. 41 Maji ene kakexile hanji mu xikina, mukonda dya kusanguluka kwavulu ni kudiwana. Maji mwene wa ambela, wixi: “O kwila mwala ni kama phala kúdya?” 42 Ene anga a mubhana ka mbandu ka mbiji yózuze, 43 mwene wa katambula, yu wa kadi bhu pholo yâ.

44 Mwene wa atangela, wixi: “Yiyi yene o izwelu yami i nga mi tangela kyoso ki ngakexile kumoxi ni enu, kuma ima yoso yosoneke yalungu n’eme mu Kijila kya Mozé, ni mu madivulu a Jipolofeta, ni mu Jisálamu yatokala kudikumbidila.” 45 Mwene wa akwatekesa kutendela kyambote o dilombolwelu dya Mikanda Ikôla, 46 yu wa ambela, wixi: “Kyosoneke kwila, Kidistu wanda tala hadi, anga mu kizuwa kya katatu wanda fukunuka mw’axaxi ka madifundu, 47 ni kwila mu dijina dyê, o athu anda bokela o njimbu ya kudyela o ituxi mu jixi joso, mu kumateka mu Jeluzaleme. 48 Enu mwanda kala mu jimbangi ja ima yiyi. 49 Ijiyenu-kyu kwila, nganda ku mi tumikisa o kima kya kanena Tata yami. Kalenu mu mbanza, katé ki mwanda tambula o kutena kwanda tunda ku dyulu.”

50 Mu kusuluka, Jezú wa ambata bhu kanga katé ku Betanya, wazangula o maku, yu wa abesowala. 51 Kyoso kyakexile mwa besowala, wa sondoloka bhu mbandu yâ, anga ubanda ku dyulu. 52 Ene a mu fukamena,* anga avutuka mu Jeluzaleme ni kusanguluka kwavulu. 53 Ithangana yoso ene akexile mu tembulu mu ximana Nzambi.