O Mukanda wa Kayadi wa Phetele
2 Kala kyala o jimesene ja makutu mwaxaxi kenu, mu ukulu kwakexile we jipolofeta ja makutu mwaxaxi ka mundu wa Nzambi. Ene anda longa maulongelu a makutu, anda dituna katé mwene ni Ngana yâ wa asumbu, kiki kyanda bhangesa kwa bwikisa ni lusolo. 2 Mu kyenyiki, avulu anda kayela o ukexilu wâ wa uhabu.* Mukonda dya ene, o athu anda zwela kyayibha yalungu ni njila ya Nzambi. 3 Kyenyiki, mukonda dya lwimbi lwâ, ene anda sota ku mi nganala bhukaxi ka izwelu ya makutu. Mu kiki, o kaxtiku kâ koxinde kyá tunde ukulu, kikanda laleka, o kubwika kwâ kwanda kwiza mwene.
4 Mu kidi, Nzambi kakambe ku kaxtikala o jianju jatele kituxi, maji wa atakula mu kididi akixana Talátalu,* mu kwakuta ni malubhambu* mu kitombe kyadikota ni kwabhaka katé mu kizuwa kya kufundisa. 5 Mwene we kakambele ku kaxtikala o mundu wokulu, maji wabhulula Nowé o muboki wa maka mayuka, kumoxi ni sambwadi dya athu, kyoso kyabheka o diluvyu phala kubwikisa o athu yó abhukumuka. 6 Mwene wafundisa o jimbanza ja Sodoma ni Ngomola, jene anga ja kituka uthôkwa, mu kubhana kijimbwete ku athu abhukumuka yalungu ni ima yakezaku. 7 Maji Nzambi wabhulula Lote o muthu wayuka, wexile ni kuxixima kwa muxima, mukonda dya wendelu wayibha wa athu abhukumuka. 8 (Mukonda kyoso o muthu yó wayuka kyatungile mwaxaxi kâ, o muxima wê wexile mu muxixima kyavulu mukonda dya kumona ni kwívwa o ibhangelu ya athu ayibha). 9 Kyenyiki, Jihova wejiya kubhulula mu ibhidi yó amukala ni wôma maji ubhaka o athu abhukumuka phala kwa bwika mu kizuwa kya kufundisa. 10 Bengebenge yó a mwa endesa ku jihânji jâ ja xitu, asota kufunyisa we akwa, kaxila we o maungana, abhumu, akake, kala ni wôma wakuzwela kyayibha yalungu ni yó ala ni maungana.* 11 Sumbala o jianju abetakota mu kukala ni nguzu ni kutena, maji kene mutatela o jimesene ja makutu ni kwa lokalala mukonda dya kuxila Jihova. 12 O mayala yá, a difwangana ni yama yakambe o kilunji, o yama a ivwala phala ku ikwata ni ku ijibha, o athu ya azwela kyayibha yalungu ni ima yakambe kwijiya, anda kwa bwikisa mukonda dya wendelu wâ wayibha ubhekesa kalunga. 13 Ene anda tambula o futu yâ, mukonda dya kubhanga o ima yayibha.
Awabhela kubhanga o jihânji jâ ja xitu mu mwanya watu, ene edi kala maxaka ku izuwatu ni itote bhupholo. Awabhela kulonga o ulongelu wâ wamakutu, kyoso ki muya ni kudya nawu mu jifesa. 14 O mesu mâ ezala ni undumbu, katena kweha kuta ituxi, ene afunyisa yó kala ni kixikanu kyakolo, o mixima yâ yezala ni lwimbi.* Ene anda kwa kaxtikala kwa Nzambi. 15 Ene axisa o njila yakidi, ya aditela njila yengi, akayela o njila ya Balamu mon’a Bewole, wazolele o futu ijila mu kubhanga ima yayibha. 16 Maji a mubazela mukonda dya kubhanga o kima kyayibha, sumbala o búlu kyama ki kizwela, maji kyene kyazwela ni dízwi dya muthu, anga kyafidisa o kima kya ulaji kya mesenene kubhanga o polofeta.
17 O athu ya edi kala jifixi jakambe o menya ni mbundu ayambata ku kithembu kyanguzu, a abhakela kwatakula mu kitombe. 18 Ene azwela ni uhete woso, maji o ima yazwela ki yala ni valolo, bhukaxi ka wendelu wâ wayibha ni jihânji jâ ja xitu, asota kufunyisa yó axisa kya o ima yayibha phala a ibhange dingi. 19 Sumbala akanena kubhana ufolo ku athu, maji ene we ala abhika a ituxi, woso a mutolola ukituka mubhika wa yó wa mutolola.* 20 Mu kyenyiki, ene kyoso kyazubha kwabhulula ku ima yayibha ya mundu yú, bhukaxi ka kwijiya kwa kidi kwalungu ni Ngana yetu ni Mubhuludi Jezú Kidistu, kifwa se avutuka dingi mu kubhanga o ima yexile mubhanga mukulu ni kwa tolola ku ima yiyi, kindala ene abeta dingi kota mu kuyibha, m’ukulu ndenge. 21 Kyeji betakota phala ene se akambele kwijiya o njila ya kuyuka, muveji dya kwijiya o njila yiyi ene a ixisa, aditela njila yengi, anga axisa o kitumu kikôla kyatambula. 22 Athu yá, kya abhiti kala kyambe o sabhu yakidi: “O imbwa yadi dingi o kudya kwalusile, o ngulu kyazubha ku izowesa yavutuke dingi mu di dimbula mu malowa.”