Kala Kyasoneka Matesu
7 “Kanenu kufundisa akwenu, phala ka mi fundise, 2 mukonda o ukexilu u mu fundisa nawu akwenu, wene we wanda mi fundisa nawu, ni kizongelu ki mu zongela nakyu akwenu, kyene we kyanda mi zongela nakyu. 3 Mu kiki mukonda dyahi-phe utala o kakisoso* mu dyesu dya phang’yé, maji kuxinganeke kwila eye wala ni kimuxi mu dyesu dyé? 4 Kyebhi ki utena kutangela phang’yé kwila, ‘Zá hanji ngi ku katule o kakisoso* kala mu dyesu dyé,’ mbé eye wala ni kimuxi mu dyesu dyé? 5 Kamangonya! Dyanga hanji kukatula o kimuxi kyala mu dyesu dyé, anga umone kyambote kyebhi ki utena kukatula o kakisoso* mu dyesu dya mukwenu.
6 “Ki mu bhane ku jimbwa o ima ya Nzambi, ki mu takule o jiphelula jenu ku jingulu, phala ka ji dyota-dyote anga ji lunguluke ni ji mi kwama.
7 “Kolokotenu mu kubhinga, n’a mi bhane, kolokotenu mu kusota, ni musange, kolokotenu mu kuphupha n’a mi jikwile; 8 mukonda woso ubhinga, utambula, woso usota, usanga, woso uphupha, a mu jikwila. 9 Nanyi mudyenu, se mon’ê u mu bhinga mbolo, mwene u mu bhana ditadi? 10 Mba u mu bhinga mbiji, mwene u mu bhana nyoka? 11 Sumbala mu akwa ituxi, maji mwene mu bhana ima yambote ku twana twenu. O kwila Tat’enu ya dyulu kanda betakota kubhana ima yambote kwa yó a mu bhinga?
12 “Mu kiki, ima yoso i mwa mesena kwila athu a mi bhanga-yu, yene we i mwa tokala kwa bhanga ene. Mu kidi, kiki kyene kilonga o Kijila kya Mozé ni madivulu a Jipolofeta.
13 “Bokonenu mu dibhitu dyatolo, mukonda o dibhitu dya dikota ni njila ya zanze, iya kw’alunga, avulu abokona-mu, 14 maji o dibhitu dya tolo ni njila yofele yambata ku mwenyu, athu atolo a isanga.
15 “Alukenu-phe ni jipolofeta ja makutu, a mi zukama ni izwatu ya jimbudi, maji moxi dyâ, imbungu ya mesena ku mi dya. 16 Mwanda ejidila bhukaxi ka ibundu yâ. O kwila o athu atena kukanza jiuva mu minya, mba jifiku ku holokoso? 17 Kyene we kimoxi, muxi woso wambote wima ibundu yambote, maji o muxi woso wayibha wima ibundu yayibha.* 18 Muxi wambote ki utena kwima ibundu yayibha, o muxi wayibha ki utena we kwima ibundu yambote. 19 Muxi woso ukamba kwima ibundu yambote, a ubatula anga a utakula mu túbhya. 20 Mu kiki, athu yá mwa kà ejidila bhukaxi ka ibundu yâ.
21 “Ki athu oso ang’ixana ‘Ngana, Ngana,’ anda bokona mu Utuminu wa dyulu, kikale ngó yó ubhanga o vondadi ya Tata yami wene ku dyulu. 22 Mu kizuwa kyenyókyo, avulu anda ngitangela, exi: ‘Ngana, Ngana, ki twa zwela kala tu jipolofeta mu dijina dyé, ki twa kaye madimonyo mu dijina dyé, ki twa bhange ima ya madiwanu mu dijina dyé?’ 23 Maji eme-phe nganda kwa tangela, ngixi: ‘Ki nga m’ijiya! Tundenu bhabha, enu mu abhangi a ima yayibha!’
24 “Mu kiki-phe, woso wívwa o maka mami anga u akumbidila, wanda sokela ni diyala dyala njimu watungu o inzo yê bhu ndanji. 25 Mvula anga inoka, bhu dibhanga mazanga, kitembu anga kibhusa* ni nguzu ku inzo, maji yene ki yalundumuka, mukonda a itungu bhu ndanji. 26 Woso wívwa o maka mami anga ukamba kwa kumbidila, wanda sokela ni diyala dya kambe unjimu watungu o inzo yê ku museke.* 27 Mvula anga inoka, bhu dibhanga mazanga, kitembu kibhusa* ni nguzu yoso ku inzo, yene anga ilundumuka.”
28 Kyoso Jezú kyazubha kuzwela o maka yá, o mundu woso wadiwana ni ukexilu wê wa kulonga, 29 mukonda mwene wa alongo ni ungana, ka alongo kala kibhanga o jimesene ja kulonga o Kijila.