Kala Kyasoneka Máluku
1 Dimatekenu dya njimbu yambote yalungu ni Jezú Kidistu, o Mon’a Nzambi. 2 Kála kyasoneka polofeta Izaya, kyoso kyambe: “(Talesa! Ngi tumikisa o mukunji wami ku pholo yé. Mwéne wanda ku yudikila o njila.) 3 Evu dízwi dya muthu wa mu dikola mu mukáwu, wixi: ‘Yudikenu o njila phala Jihova! Yukisenu o ikoka yê.’” 4 Nzwá dya batizu wakexile mu mukáwu mu kubokela o athu kwila, abhingile ku a batizala mu kulondekesa kwila adyela o ituxi yâ, phala kwa loloka. 5 Athu oso akwá Judeya ni akwá Jeluzaleme akexile muya kwa mwene phala kufisala o ituxi yâ ni kwa batizala* mu Ngiji ya Njolodá. 6 Nzwá wakexile muta izwatu ya ibha ya kamelu ni kudikuta phonda ya kibha mu mbunda, ni kudya mahoho ni wiki* wa mukáwu. 7 Mwene wakexile mu bokela o mundu, wixi: “Kudima dyami kwanda kwiza muthu wala kota, eme ndenge. Eme ki ngi fwama ku mu bhetamena ni ku mu jituna o mikolo ya jihayi jê. 8 Eme nga mi batizala ni menya, maji mwene wanda mi batizala ni nzumbi ikôla.”
9 Mu izuwa yenyóyo, Jezú watundu mu Nazalé ku Ngalileya, anga a mu batizala kwa Nzwá, mu Ngiji ya Njolodá. 10 Kyakexile mutunda mu menya, wamono o dyulu dya jikuka, o nzumbi ikôla ya mu tulukila kuthandu dyê, kala dyembe. 11 Ku dyulu anga kutunda dízwi, dixi: “Eye u Mon’ami wakazola, eme nga kuxikina.”
12 Mu kithangana kyenyókyo o nzumbi ikôla imwendesa ku mukáwu. 13 Mwene ukala mu mukáwu mu makwinyi awana a izuwa, anga Satanaji u mu tendala. Jezú wakexile kumoxi ni yama ya muxitu, o jianju jakexile mu mu sidivila.
14 Kyoso Nzwá kya mute mu kaleya, Jezú wayi mu Ngalileya mu boka o njimbu yambote ya Nzambi, 15 ni kuzwela, wixi: “O kithangana kyoxinde kyabhixila kyá, o Utuminu wa Nzambi wazukama. Dyelenu o ituxi yenu, xikinenu o njimbu yambote ya Nzambi.”
16 Kyakexile mu kwenda ku mbandu ya Kalunga ka Ngalileya, mwene wamono Ximá ni phang’yê Mandele akexile mu takula o mawanda mu menya, mukonda exile atambi a jimbiji. 17 Jezú-phe wa atangela, wixi: “Ngi kayelyenu, ni ngi mi bhange mu atambi a athu.” 18 Mu kithangana kyenyókyo, ene axisa o mawanda mâ, anga a mu kayela. 19 Mu kwenda-ku dingi bhofele, mwene wamono Tiyaku mon’a Nzebedewu ni phang’yê Nzwá, akexile mu ulungu mutunga o mawanda mâ. 20 Mu kithangana kyenyókyo, wa exana. Ene axisa o tata yâ, Nzebedewu mu ulungu, kumoxi ni akalakadi, ya a mu kayela. 21 Ene anga aya mu Kafalanawú.
Kyoso kyatula o kizuwa kya Sábhalu, Jezú wabokona mu dilombe* anga umateka o kulonga. 22 O athu anga adiwana ni ukexilu wê wa kulonga, mukonda mwene wakexile mwa longa ni ungana, kuma o ulongelu wê, ki u difwile ni wa jimesene ja kulonga o Kijila. 23 Mu kithangana kyenyókyo, mu dilombe mwakexile diyala dya kexile ni nzumbi yayibha, anga udikola, wixi: 24 “Ihi i wamesena kokwetu Jezú dya Nazalé? Eye weza phala ku tu bwikisa? Eme nga kijiya mwene kyambote kwila, éye u Muthu Ukôla wa Nzambi!” 25 Maji Jezú wa mu bazela, wixi: “Dixibhe, tunda mwa mwene!” 26 O nzumbi yayibha anga i bhangesa o diyala kudivunda bhoxi ni ku mu sanyesa, ni kudikola ni dízwi dya swina, anga itunda mwa mwene. 27 Athu oso adiwana kyavulu, anga amateka ku dibhwidisa, exi: “O kiki kima kyahi? Ulongelu wa ubhe! Ni ungana woso, mwene utumina katé mwene o jinzumbi jayibha, jene anga ji mu belesela.” 28 O fuma yê anga i di mwanga mu ididi yoso ni mu jisanzala joso ja Ngalileya.
29 Ene anga atunda mu dilombe,* ya ayi kumoxi ni Tiyaku ni Nzwá, mu inzo ya Ximá ni Mandele. 30 O ukowakimi wa Ximá wakexile ni febele, mu kithangana kyenyókyo, atangela Jezú yalungu ni mwene. 31 Jezú wa mu zukama, wa mu kwata mu lukwaku, mwene anga udisanza, yu wa mateka ku alambela kudya.
32 Mu ngoloxi, kyoso kyafu o dikumbi, o athu a mu bhekela o jihaxi joso ni yó akexile ni madimonyo. 33 Athu oso mu mbanza anga abhongoloka bhu mwelu. 34 Mwene anga usaka athu avulu akexile mutala hadi mukonda dya mauhaxi avulu, ni kukaya o madimonyo. Jezú kakexile mu kwehela o madimonyo kuzwela, mukonda a mwijidile kwila, mwéne Kidistu.*
35 Mu kamene, kuma kwa vundile hanji, mwene wa balumuka, watundu ubheka wê, yu wa mateka kusamba. 36 Ximá ni yó akexile-nê kumoxi, ayi ku mu sota. 37 Kya mu sange a mu tangela, exi: “Athu oso a mu ku sota.” 38 Mwene wa atangela, wixi: “Tuyenu mu ididi yéngi, mu jisanzala ja zukama phala ngi boke-mu we, mukonda kyene kya ngi bheka.” 39 Mwene wende o Ngalileya yoso, mu kuboka mu malombe,* ni kutundisa o madimonyo.
40 Kwa mu zukama we mukwa dibhute, wa mu fukamena ni ku mu dyonda, wixi: “Ngana, se wamesena, utena ku ngi saka.”* 41 Mu kyenyiki, Jezú henda ya mu kwata, anga usununa o lukwaku lwê, ukwata o diyala, u mwambela, wixi: “Nga mesena! Disanze.” 42 Mu kithangana kyenyókyo, o diyala wadisanze ku dibhute dyê. 43 Ande dya ku mu lekela Jezú wa mu tendelesa, 44 wixi: “Dilange phala ku kitangele muthu woso-woso, maji ndé u dilondekese ku mukunji, ubhane sata mukonda dya kudisanza kwé, kala kyatendelesa o kijila kya Mozé, phala a ku mone kwila, eye wa disanze.” 45 Maji o diyala kyatundu bhenyobho, wamateka kubhana jingolokela ni kutangela o athu o kima kyabhiti. Mukonda dya kiki, Jezú katenene dingi kubokona mu mbanza yoso-yoso, phala ka mu mone ku athu. Mwene wakexile mu kala ubheka wê mu mikáwu, né kiki, athu a jimbandu joso, akexile mu kwiza kwa mwene.