Kala Kyasoneka Luka

6 Mu kizuwa kya mukwá, kya sábhalu, Jezú wakexile mubhita mu mábhya ni maxibulu mê. O maxibulu akatula o idima,* ya a ixokota ni maku, anga a idya. 2 Mukonda dya kiki, sayi Jifalizewu azwela, exi: “Mukonda dyahi mwa mubhanga o kima katokala ku kibhanga mu kizuwa kya Sábhalu?” 3 Maji Jezú wa atangela, wixi: “Kiluwa mutanga ya bhangele Davidi, kyoso mwene ni yó akexile-nê, kyakexile ni nzala? 4 Mwene wabokona mu inzo ya Nzambi, anga utambula o jimbolo ja sata, wajidi, yu wajibhana we kwa yó akexile-nê, sumbala katokalele ku jidya ku muthu woso-woso, kikale ngó ku akunji.” 5 Mwene wambe dingi, wixi: “O Mon’a muthu, mwéne o Ngana ya kizuwa kya Sábhalu.”

6 Mu sábhalu yamukwá, mwene wabokona mu kididi kya ubhezelu,* yu wamateka o kulonga. Mwenyomo mwakexile diyala, ni lukwaku lwakadilu lwakate.* 7 O jimesene ja kulonga o Kijila ni Jifalizewu, akexile mu tonginina Jezú phala kumona se weji saka muthu mu kizuwa kya Sábhalu, n’a sange ndunge phala ku mutatela. 8 Maji mwene wejidile o ima yakexile mu banza, kyenyiki watangela o diyala dyexile ni lukwaku lwakate:* “Balumuka, ukale bhukaxi.” Mwene wabalumuka, anga wimana bhenyobho. 9 Jezú wa atangela, wixi: “Ngi m’ibhula, o kwila kifwama kubhanga o mbote mu kizuwa kya Sábhalu, inga kubhanga kyayibha? Kubhulula mwenyu inga ku ukatula?” 10 Kyazubha kutala swí ku athu a mu kondolokele, watangela o diyala, wixi: “Sununa o lukwaku lwé.” Mwene wa lu sununa, o lukwaku anga lu disanza. 11 Ene njinda ya akwata, ya amateka kudizwelesa mudyâ, se ihi yeji bhanga kwa Jezú.

12 Sayi kizuwa, mwene wayi ku mulundu, phala kusamba, anga ubhita usuku woso ni kusamba kwa Nzambi. 13 Mu kamene, mwene wexana o maxibulu, yu wasolo-bho kwinyi ni kiyadi, anga u aluka jipoxolo: 14 Ximá, wa mu luku we Phetele ni phang’yê Mandele, Tiyaku, Nzwá, Filipe, Matulu,* 15 Matesu, Tomé, Tiyaku mon’a Lufewu, Ximá amwixana muthu waswina, 16 Juda mon’a Tiyaku, ni Juda dya Kadyota, yó wasumbisa Jezú.

17 Mwene wakulumuka nawu, anga wimana bhu kididi kyosokelese kyambote. Bhenyobho bhwakexile mundu wavulu wa maxibulu mê, ni athu avulu atundile mu Judeya yoso ni mu Jeluzaleme, ni ku jimbandu ja Tilu ni Sidónya, ejile phala ku mwivwa, ni kwasaka o mauhaxi mâ. 18 Katé mwene ni yó akexile mu atalesa hadi ku jinzumbi jayibha, akexile mwasaka. 19 Mundu woso wa mesenene ku mu babata, mukonda ku mukutu wê kwakexile mutunda kutena, kwakexile mu saka athu oso.

20 Mwene anga ubhetula o mesu kwala o maxibulu mê, yu wambe, wixi:

“Mwazediwa enu mu jingadyama, mukonda o Utuminu wa Nzambi wa mi tokala.

21 “Mwazediwa enu kindala kiki mwala ni nzala, mukonda mwanda kwikuta.

“Mwazediwa enu kindala mwa mudila, mukonda mwanda kwolela.

22 “Mwazediwa enu kyoso athu kya mizemba, kya misandula, kya milokalala ni kuxidisa o dijina* dyenu, mukonda dya Mon’a muthu. 23 Kyoso kibhita o ima yiyi, sangulukenu, mutuke ni kisangusangu, mukonda o futu yenu ku dyulu yadikota. Kuma o jikuku jâ, jakexile we mubhanga o ima yiyi ku jipolofeta.

24 “Lamba dyenu, enu mu jimvwama mukonda mwa tambula kyá o mbote yenu.

25 “Lamba dyenu, enu mwekuta kindala, mukonda mwanda kala ni nzala.

“Lamba dyenu, enu mwa mu kwolela kindala, mukonda mwanda dikwata mukôndo ni kudila.

26 “Lamba dyenu kyoso kya miximana ku athu, mukonda kyene we kyabhangele o jikuku jâ ku jipolofeta ja makutu.

27 “Maji enu-enyoso mwa mu kwívwa, ngi mitangela: Zolenu jinga o jinguma jenu, mu kubhanga o mbote kwa yó a mizembe, 28 mu kubesowala a mi lebhula ni kusambela yó a mi xongwena. 29 Woso u kubhana huxi kuditama, u mu bhana we o ditama dya mukwá. Woso u kutambula o kizwatu kyé, ku mu fidise kwambata we o divunga dyé. 30 Woso u kubhinga kima, mubhane, se muthu u kukatula o kima kyé, kana ku mu bhinga phala ku kuvutwila-kyu.

31 “Ima yoso i mwa mesena kwila athu a mi bhanga-yu, yene we i mwa tokala kwa bhanga ene.

32 “Se muzola ngó o athu amizolo, kisakidilu kyahi ki mwanda tambula? Mukonda katé mwene ni akwa ituxi azolo we o athu a azolo. 33 Se mu bhanga ngó o mbote kwa yó ene mu mibhanga o mbote, kisakidilu kyahi ki mwanda tambula? Katé mwene ni akwa ituxi, kyene we kyabhanga. 34 Kyene we kimoxi, se mu sobhesa ngó o ima kwa yó u mwa kinga ku mi vutwila kima, kisakidilu kyahi ki mwanda tambula? Katé mwene ni akwa ituxi, asobhesa ku akwa ituxi ni akwâ, n’a kinge kwa vutwila kyasoko. 35 Maji-phe, zolenu jinga o jinguma jenu, mu kubhanga o mbote ni kusobhesa o ima sé kukinga ku mi vutwila kima. Anga o futu yenu yanda kala yadikota, mwanda kala mu an’a Suke-ku, mukonda mwene mukwa kubhanga o mbote yê kwa yó akambe o kisakidilu, ni ku athu ayibha. 36 Kalenu jinga mu akwa henda, kala kyene Tat’enu, o mukwa henda.

37 “Kanenu kufundisa akwenu, phala ka mi fundise, kanenu kulongolola akwenu phala ka mi longolole. Sulukenu mu kuloloka* akwenu, phala enu wenu a mi loloke.* 38 Bhanenu jinga akwenu, phala enu wenu a mi bhane. Anda mi lundulwila bhu homba yenu kizongelu kyambote, kyóbate, kyosakese, kyozalese kyambote. Mukonda o kizongelu ki mu zongela nakyu akwenu, kyene we kyanda mi zongela nakyu.

39 Mwene wa atela kifika, wixi: “O kwila kifofo utena kwendesa kifofo ni mukwá? Kiyadi kyâ kanda bwa mu dikungu? 40 Dixibulu katúndu o mesene yê, maji woso a mulonga kyambote, wanda sokela ni mesene yê. 41 Mu kiki, mukonda dyahi utala o kakixinji* mu dyesu dya phang’yé, maji ku xinganeke kwila wala ni kimuxi mu dyesu dyé? 42 Kyebhi ki utena kutangela phang’yé kwila, ‘Phang’yami, zá ngi kukatule o kakixinji* kala mu dyesu dyé, maji eye kumono o kimuxi kyala mu dyesu dyé? Kamangonya! Dyanga hanji kukatula o kimuxi kyala mu dyesu dyé, anga umone kyambote kyebhi ki utena kukatula o kakixinji* mu dyesu dya phang’yé.

43 “Mukonda kana-ku muxi wambote wima ibundu yayibha, kana-ku we muxi wayibha wima ibundu yambote. 44 Mukonda, muxi woso a wijidila mu ibundu yê. Mu kifika, o athu kene mu kanza jifiku mba jiuva ku minya. 45 O muthu wambote ku dilundilu dyambote dya muxima wê, ubheka-ku ima yambote, maji o muthu wayibha ku dilundilu dyê dyayibha, ubheka-ku ima yayibha. Mukonda o dikanu dizwela o ima yala ku muxima.

46 “Mukonda dyahi, mu ng’ixana, ‘Ngana! Ngana!’ maji ki mu kumbidila o ima i ngi mitangela? 47 Woso wiza kokwami, anga wívwa o maka mami, ni kwa kumbidila, nganda mi londekesa se mwene wadifu ni nanyi. 48 Mwene wadifu ni diyala, mu kutunga o inzo yê, wakande dikungu dyazongo, yu wate o disesa* bhu ndanji. Kyoso kyeza o kimvula, o menya adibeta ni nguzu ku inzo yenyoyo, maji o inzo ki ilundumuka, mukonda yotunge kyambote. 49 Maji woso wívwa o maka mami, anga ka akumbidila, wadifu ni diyala watungu o inzo yê mu museke* mwakambe disesa.* O menya adibeta ku inzo yenyiyi, mu kithangana kyenyókyo, o inzo ya lundumuka. O kubwika kwa inzo yiyi, kwadikota.”