Kala Kyasoneka Luka

2 Mu izuwa yenyóyo, Sézalu dya Nguxi wabhana kitumu phala athu oso ku disonekesa. 2 (O ku disonekesa kuku kwa dyanga, kwa bhiti kyoso Kidinu kyexile nguvulu ya Sídya.) 3 Athu oso anga aya mu disonekesa, kala muthu mu mbanza yê. 4 Kuma Zuze watokalele ku mwiji wa Davidi, mwene watundu mu mbanza ya Ngalileya mu sanzala ya Nazalé, yu wayi mu mbanza ya Judeya mu sanzala ya Davidi, a ixana Beleme. 5 Mwene wayi mu disonekesa ni Madiya kaza dyê. Kwa kambele ngó bhofele phala Madiya kuvwala. 6 Kyakexile bhenyobho, o izuwa yê ya kubhanduluka* ya bhixila. 7 Mwene anga uvwala o mon’ê wa dyanga, u mu futa mu milele, anga u mu zekesa bhu kididi kidila o ibhaku, mukonda ki bhwa kexile kididi phala ene kukala-bhu.

8 Ku jimbandu jenyójo, kwakexile abhidi, akexile mu mukáwu mu langa o ibhaku yâ mu usuku. 9 Mu kithangana kyenyókyo, o anju ya Jihova ya tukulukila o abhidi. O kididi kyoso anga k’izala ni kubhenya kwa Jihova, ene anga akala ni wôma wavulu. 10 Maji o anju ya atangela: “Ki mu kale ni wôma! Mukonda ngeza ku mi tudila njimbu yambote yanda sangulukisa o mundu woso. 11 Kuma lelu, a mi vwalela mubhuludi mu mbanza ya Davidi, mwéne Kidistu, o Ngana. 12 Kiki kyene o kijimbwete kyê: Mwanda sanga kamona kofute mu milele, a mu zekesa bhu kididi kidila o ibhaku.” 13 Mu kithangana kyenyókyo, kwa tukuluka kifuxi kyadikota kya jianju,* anga amateka kuximana Nzambi mu kuzwela, exi: 14 “Fuma ikale ya Nzambi ku dyulu, o mu ngongo, kutululuka mw’axaxi ka athu a axikina kwa Nzambi.”

15 Kyoso o jianju kya vutuka ku dyulu, o abhidi adyambela mudyâ, exi: “Tuyenu mu mbanza ya Beleme, ni tumone yoso yabhiti-mu, yatumu Jihova ku tu tudila.” 16 Anga aya ni lusolo, asange Madiya ni Zuze ni kamona kazeka bhu kididi kidila o ibhaku. 17 Kyamono kiki, atangela o athu o njimbu yevu yalungu ni kamona. 18 Athu oso ak’ivu, adiwana kyavulu ni ima ya atangela o abhidi. 19 Madiya anga ubhaka o maka oso yá ku muxima wê, ni kuxinganeka mu dilombolwelu dyê. 20 O abhidi anga avutuka ni kujingisa ni kuximana Nzambi, mu ima yoso yevu ni yamono, yoso yabhiti kála kya atangelele nayu.

21 Kyoso kyabhiti dinake dya izuwa, kyabhixila o kizuwa kya ku mu saya, a mu luku o dijina dya Jezú, o dijina dya mu bhele o anju ande dya ku mwimita.

22 Kyoso kyabhixila o kithangana kya kwazelesa, kala kituma o Kijila kya Mozé, Zuze ni Madiya, a mwambata mu Jeluzaleme phala ku mu londekesa kwa Jihova, 23 kala kyosoneke mu Kijila kya Jihova: “O mona woso wa diyala a dyanga ku mu vwala,* atokala ku mwixana muthu ukôla wa Jihova.” 24 Ene anga abhana sata kala kituma o Kijila kya Jihova: “Membe ayadi mba tu pomba tuyadi.”

25 Mu Jeluzaleme mwakexile diyala amwixana Ximinyá, mwene wexile muthu wambote, utumaka Nzambi. Mwene wakexile mu kingila o thembu ya Nzambi kukonda o malamba a akwa Izalayele, mwene anga wizala ni nzumbi ikôla ya Nzambi. 26 Lwa mukwá, bhukaxi ka nzumbi ikôla, Nzambi wa mwijidisa kwila keji fwa ande dya kumona o Kidistu ya Jihova. 27 Bhukaxi ka nzumbi ikôla, mwene wayi mu tembulu, kyoso o jitata kyambata o kamona Jezú mu tembulu, n’a mu bhange kala kyatokala mu Kijila kya Mozé, 28 mwene watambula o kamona bhu maku, anga uximana Nzambi, wixi: 29 “Eye u Ngana, Suke-ku, kindala o mubhik’é utena kyá kufwa ni kutululuka, kala ki wa kitange, 30 mukonda o mesu mami amono kyá o mubhuludi u wa tumikisa, 31 u wa yudika bhu pholo ya athu oso, 32 mukengeji phala kujimuna o kuvunda ku ifuxi, ni kubhana fuma ku mundu wé, Izalayele.” 33 O tata ni mama, akexile mu diwana ni ima yakexile mu zwela Ximinyá yalungu ni kamona. 34 Ximinyá wa abesowala, yu watangela Madiya, many’a kamona, wixi: “Talesa! O kamona kaka a mu solo phala kubhangesa athu avulu mu Izalayele kudibhala ni kubalumuka, ni kukala kijimbwete kya ku mu sebhulula ku athu, 35 (eye-phe, kixibhata kyanda ku ku tubula*) phala kwijidisa o ixinganeku yala ku mixima ya athu avulu.”

36 Kwakexile we polofeta ya muhatu amwixana Ana, mon’a Fanuwele, watokalele ku mwiji wa Azele. O muhatu yú wakukile kyá. Tundé kya kazalele,* watungile ngó ni munumy’ê sambwadi dya mivu. 37 Mwene wexile mutudi, wakexile kyá ni makwinyi a nake ni kiwana kya mivu. Ithangana yoso mwene wakexile mu tembulu, mu kubheza Nzambi usuku ni mwanya, ni kujejuwala,* ni kusamba. 38 Mu kithangana kyenyókyo, mwene wazukama, yu wamateka kusakidila Nzambi ni kuzwela yalungu ni kamona ku athu oso akexile mu kinga o kubhuluka kwa Jeluzaleme.

39 Kya zubha ku kumbidila yoso yatumu o Kijila kya Jihova, ene avutuka mu Ngalileya, mu sanzala ya Nazalé. 40 O kamona anga kakala mu kula, ni kuswina, ni kuvula o unjimu. Anga o ngalasa ya Nzambi ikala kuthandu dyê.

41 Mivu yoso, o jitata jê akexile muya mu Jeluzaleme, mu fesa ya Phasu. 42 Kyoso mwene kyakexile ni kwinyi ni kiyadi kya mivu, ene ayi mu fesa ya Phasu kala kyexile o kifwa kyâ. 43 Kyoso kyabhu o izuwa ya fesa, kyakexile mu vutuka, o mona Jezú waxala mu Jeluzaleme. Maji o jitata jê ka k’ijidile. 44 Mukonda afika kwila mwene wakexile mu kwenda kumoxi ni akwá. Kyoso kyende kizuwa kimoxi, amateka ku mu sota mw’axaxi ka jindandu jâ ni ku athu a mwijidile. 45 Kuma ka mu sange, avutuka mu Jeluzaleme, ya amateka ku mu sota ni mwanyu woso. 46 Kyoso kyabhiti izuwa itatu, a mu sange mu tembulu waxikama bhukaxi ka alongexi, mu kwa evwa ni kwa bhanga ibhwidisu. 47 Oso-phe akexile mu mwivwa, akexile mu diwana ni kwijiya kwê ni itambwijilu yê. 48 O jitata jê kya mu mono, adiwana, o many’â anga u mwambela, wixi: “Mon’ami tata, mukonda dyahi wa tubhange kiki? Talesa, tat’enu n’eme twa thandanganyele ni ku kusota.” 49 Maji mwene wa atambwijila: “Mukonda dyahi mwakexile mu ngi sota? Ki mu kijidile kwila nga tokalele kukala mu inzo ya Tata yami?” 50 Ene katongolola o ima ya zwelele mwene.

51 Mwene wa kulumuka nawu, yu wavutuka mu Nazalé, anga usuluka mu kwa belesela.* O many’â anga ubhaka o maka oso yá ku muxima wê. 52 Jezú anga ukala mu kula mu kitala ni mu kuvula o kwijiya, anga akala mu mu wabhela kwa Nzambi ni ku athu.