Dya Kayadi Dya Jisobha
12 Ku muvu wa kasambwadi wa utuminu wa Jehú, Jowaji a mutumbika ku usobha, yu watumina mu makwinyi awana a mivu mu Jeluzaleme. O dijina dya manyâ dyexile Zibiya mukwa Beleseba. 2 Jowaji wabhange ima yambote bhu pholo ya Jihova, mu izuwa yoso yexile mu mulonga ku mukunji Joyada. 3 Maji mwene kabulu o ididi ya kubhezela-mu. O mundu wasulukile hanji ni kubhana jisata ni kubandesa o dixi mu ididi ya kubhezela-mu.
4 Jowaji wambela o akunji, wixi: “Katulenu o kitadi kyoso kyabheka o athu mu inzo ya Jihova phala o sata ikôla ni lubhaku lwene mufuta kala muthu nu muthu. Ni kitadi kifuta o athu kala kyakixindi ni kitadi kyoso kyene mubheka o athu mu vondadi yâ, phala o inzo ya Jihova. 5 O akunji anda tambula o kitadi kyoso ku athu, phala kuyudika o inzo ya Nzambi bhwoso bhwa zanganya.”*
6 Ku muvu wa makwinyi ayadi ni kitatu kya utuminu wa sobha Jowaji, o akunji ka yudikile luwa o tembulu. 7 Kyenyiki, sobha Jowaji wambela o mukunji Joyada ni akunji amukwa wixi: “Mukonda dyahi enu ki mwa muyudika o inzo ya Nzambi? Kyenyiki-phe, kanenu kutambula dingi kitadi ku athu, kikale ngo o kitadi phala kuyudika o inzo.” 8 O akunji axikina kwila, keji tambula dingi kitadi ku athu ni kwila keji kala dingi ku pholo mu kuyudika o inzo ya ngana.
9 Mukusuluka, o mukunji Joyada wakwata ngonga, wabhange-ku kadikungu yu wa ite ku mbandu a kalatódyu. Yene yexile ku mbandu ya kadilu mu dibokwenu dya inzo ya Jihova. O akunji exile mulanga o mwelu, exile muta-mu o kitadi kyoso kyexile mubheka o athu mu inzo ya Jihova. 10 Kyoso kyexile mumona kwila mu ngonga mwexile kya kitadi kyavulu, o seketa ya sobha ni mukunji wadikota exile mukatula* o kitadi phala kwijiya se kikuxi kyabheka o athu mu inzo ya Jihova. 11 Ene exile mubhana o kitadi kyenyokyo kwa yó exile mulanga o ikalakalu ya inzo ya Jihova. Ni kitadi kiki, ene exile mufuta o asongi a mabaya ni atungi exile mukalakala mu inzo ya Jihova, 12 ni kufuta o atungi ni yó exile mubula o matadi. Exile mu sumba we mabaya ni matadi osete kyambote phala kuyudika o inzo ya Jihova. Ni kitadi kyenyokyo, exile mu sumba we o ima yoso yabhindamene phala kuyudika o inzo.
13 Maji o kitadi kyakexile mubhakula o athu mu inzo ya Jihova, kexile mubhanga-nakyu jibasiya ja phalata, jitezola, matijela, jikoloneta né kima kyoso-kyoso kya ulu mba kya phalata phala o inzo ya Jihova. 14 O kitadi exile mukibhana ngo kwa yó exile ku pholo dya ikalakalu, ene exile muyudika o inzo ya Jihova ni kitadi kyenyokyo. 15 O yó exile mutambula o kitadi phala ku kibhana ku akalakadi, kexile mubhakula jikonda, mukonda exile athu a adyelela. 16 Maji o kitadi kya sata ya mulonga ni kitadi kya sata ya kituxi, kikyexile phala o inzo ya Jihova, kyatokalele ku akunji.
17 Mu izuwa yenyoyo, Hazayele sobha ya Sídya wayi mubhânga ni akwa Ngate yu wa atolola. Mukusuluka, Hazayele wabanze kuya mubhânga* ni akwa Jeluzaleme. 18 Mukonda dyakiki, Jowaji sobha ya Judá wakwata o ima yoso ikôla yabhakwile o jikuku jê, Jozafate, Jeholamu ni Akaziya, o jisobha ja Judá, ni jimbote joso jabhakwile mwene ni ulu yoso, ni jimbote joso ja inzo ya Jihova ni ja inzo* ya sobha, yu wa jitumikisa kwa Hazayele sobha ya Sídya. Kyenyiki, Hazayele waxisa o mbanza ya Jeluzaleme.
19 Ima ya mukwa ya musoso wa Jowaji, yoso yabhange mwene, a isoneka mu divulu dya misoso ya izuwa ya jisobha ja Judá. 20 Maji o jiselevende ja Jowaji adibhongolola ya a mulungulukila anga a mujibhila bhwa zukama ni Betemilo* mu njila i kulumuka ku Síla. 21 O jiselevende jê, Jozakale mon’a Simeyate ni Jehozabade mon’a Somele, ene a mujibha. Mwene anga a mufunda bhu kididi bhwa fundile o jikuku jê mu Mbanza ya Davidi. O mon’ê Amaziya mwéne wa mubhingana ku usobha.