Kala Kyasoneka Matesu

10 Mwene wexana o kwinyi ni kiyadi kya maxibulu, anga wa abhana o kutena kwa kukaya o jinzumbi jayibha, ni kusaka o mauhaxi moso.

2 O majina a kwinyi ni kiyadi kya jipoxolo enyá: Wa dyanga, Ximá amwixana Phetele ni phang’yê Mandele; Tiyaku mon’a Nzebedewu ni phang’yê Nzwá; 3 Filipe ni Matulu;* Tomé ni Matesu mukwa kutambula o lubhaku; Tiyaku mon’a Lufewu, Tadewu; 4 Ximá mukwa Kanana,* Juda dya Kadyota, yó wa sumbisa Jezú.

5 Kyoso Jezú kya tumikisa o kwinyi ni kiyadi kya jipoxolo, mwene wa abhana o itendelesu yiyi: “Kanenu kuditela mu ikoka ya akwa jixi jengi, ki mu bokone mu jimbanza ja akwa Samádya; 6 maji kikale-phe muya ku jimbudi ja jimbidila ja dibhata dya Izalayele. 7 Kyoso ki muya, bokenu kwila, ‘o Utuminu wa dyulu wazukama.’ 8 Sakenu o jihaxi, fukununenu o madifundu, zelesenu akwa mabhute, kayenu o madimonyo. Enu mwa tambula mu kingoho, bhanenu mu kingoho. 9 Ki mu ambate ulu, phalata, mba ngondo mu jiphonda jenu,* 10 né mbwenga, izwatu ya mukwá,* jihayi,* né mwene mbangala ya mukwá. Mukonda o mukalakadi wafwama kutambula o kúdya kwê.

11 “Mu mbonge mba sanzala yoso i mu bokona, sotenu woso mukwa ujitu, kalenu mwenyomo katé ki mwanda tunda. 12 Kyoso ki mu bokona mu inzo, menekenenu akwa dibhata. 13 Se akwa dibhata akala akwa ujitu, o paze yenu ikale ku thandu dyâ, maji se akala athu akambe ujitu, o paze yenu i mi vutukile. 14 Woso ka mi tambulula mba ukamba kwívwa o maka menu, kyoso ki mu tunda mu inzo mba mu mbanza yenyóyo, kukumunenu o fufuta ku inama yenu. 15 Ni kidi kyoso ngi mi ambela kwila, mu Kizuwa Kya Kufundisa, o divuwa dya mbanza yiyi, dyanda betakota, o dya ixi ya Sodoma ni Ngomola ndenge.

16 “Ngi mi tumikisa kala mu jimbudi, mw’axaxi ka imbungu. Mu kiki-phe, dimukenu kala o jinyoka, kalenu sé kikuma kala o membe. 17 Di langyenu ni athu, mukonda ene anda mi bhakula mu jinzo ja kufundisa ni ku mi beta mu malombe* mâ. 18 Enu anda myambata bhu pholo ya jinguvulu ni ya jisobha mukonda dyami, phala kubhana umbangi kwa ene ni ku ifuxi. 19 Maji kyoso-phe kya mi kuta, ki mu tandanganye yalungu ni ima i mwanda zwela, mba kyebhi ki mwanda zwela, mukonda mu kithangana kyenyókyo, anda mibhana o ima i mwanda zwela; 20 mukonda ki enu ngó mu zwela, maji o nzumbi ya Tat’enu yene izwelela bhukaxi kenu. 21 Kya mukwá, muthu wanda bhana phang’yê phala ku mu jibha, o tata wanda bhana o mona, o ana anda bhukumukina o jitata jâ ni kwa bhekela o kalunga. 22 Athu oso anda mi zemba, mukonda dya dijina dyami, maji yó ukolokota katé ku dizubhilu, mwéne wanda bhuluka. 23 Kyoso kya mi zukutisa mu mbanza imoxi, lengelenu mu mbanza ya mukwá, mukonda ngi mi tangela o kidi kwila, enu ki mwanda zubha kubokela o jimbanza joso ja Izalayele ande dya Mon’a muthu kubhixila.

24 “O dixibulu ki dyala kota dya mesene yê, o mubhika we kala kota dya ngana yê. 25 Kabasa o dixibulu disokela ni mesene yê, o mubhika ni ngana yê. Se o ngana ya inzo o athu amwixana Belezebú,* o akwa dibhata dyê anda exana kyebhi? 26 Kyenyiki, kimukale ni wôma, mukonda sé-ku kima kyófute ki kamba kumoneka, mba kima kyósweke akamba ku kijiya. 27 Ima yoso i ngi mi tangela mwavundu, mu itangela mu mwazele, yoso ya mi fwetela ku mátwi, bokenu-yú bhu matala ma jinzo. 28 Kyenyiki kimukale ni wôma wa yó ajibha o mukutu, maji katena kukatula o mwenyu,* muveji dya kiki kalenu ni wôma wa yó utena kubwikisa o mukutu ni mwenyu mu Njena.* 29 O athu kene mu sumbisa tudyédye tuyadi mu dibele* dimoxi dya kambe valolo yavulu? Maji kadyédye kamoxi ki ka lawuka bhoxi, sé Tat’enu ku kijiya. 30 Maji katé mwene ni ndemba ya mítwe yenu yokondale. 31 Mu kiki kimukale ni wôma, enu mwa betakota o tudyédye twavulu ndenge.

32 “Woso ufisala bhu pholo ya athu kwila wa ngi xikana, eme wami nganda muxikana bhu pholo ya Tata yami wene ku dyulu. 33 Maji woso ukamba ku ngi xikina bhu pholo ya athu, eme wami ki nganda muxikina bhu pholo ya Tata yami wene ku dyulu. 34 Ki mu banze kwila ngeza mu bheka paze mu ngongo, ki ngeza mu bheka paze, maji xibhata. 35 Mbata ngeza phala kubhangesa kwila, o mon’a diyala udikwata ni tat’â, o mon’a muhatu ni mam’â, o mbalakaji ni ukow’ê. 36 Mu kidi, o jinguma ja muthu janda kala akwa dibhata dyê. 37 Woso uzola dingi tata mba mama, eme ndenge, yú ka fwama kukala dixibulu dyami; mba woso uzola dingi mon’ê wa diyala mba wa muhatu, eme ndenge, yú ka fwama kukala dixibulu dyami. 38 Woso kaxikina kwambata o taka* yê ya jiphaxi ni ku ngi kayela, yú ka fwama kukala dixibulu dyami. 39 Woso usanga o mwenyu wê wanda ku u texi, maji woso ujimbidisa o mwenyu wê mukonda dyami, wanda ku usanga.

40 “Woso u mi tambulula, u ngi tambulula we eme, woso u ngi tambulula, utambulula we Yó wa ngi tumikisa. 41 Woso utambulula polofeta mukonda dya kukala polofeta, wanda tambula kisakidilu kya polofeta. Woso utambulula muthu wayuka mukonda dya kukala muthu wayuka, wanda tambula kisakidilu kya muthu wayuka. 42 Woso ubhana ngó kopho ya menya atalala ku muthu umoxi ku maxibulu* yá, mukonda dya kukala dixibulu, ngi mi tangela ni kidi kyoso kwila, mwene wanda tambula o kisakidilu kyê.”