Sofoniya
1 Yiyi yene o njimbu ya Jihova, yatambula Sofoniya,* mon’a Kuxi, mon’a Jedaliya mon’a Amadiya, mon’a Ezekiya, mu izuwa ya Joziya mon’a Amone, sobha ya Judá.
2 Jihova wambe kiki: “Nganda bwika o ima yoso yala mu ngongo.”
3 Jihova wambe dingi, wixi:
“Nganda bwika o athu ni yama.”
Nganda bwika o athu ayibha, o jinjila jibhita bhulu ni jimbiji jala mu musanza wa kalunga ni ima* yoso ibhangesa o athu kuta ituxi.
Nganda bwika o athu mu ngongo.”
4 “Akwa Judá nganda ku atalesa hadi,
Ni oso atungu mu Jeluzaleme,
Nganda bwika o ima yoso ya Bahale yaxala mu kididi kiki.
Nganda bwika o iteka ya jinzambi ja jixi jengi, kumoxi ni akunji abheza o iteka mwaxaxi ka mundu yú.
5 Nganda bhwika we yó afukama phala kubheza o jithéthembwa* ja dyulu,
Ni yó afukama phala kukanena kwa Jihova ku mukala fiyele,
Maji akanena we kukala fiyele kwa Malakane.
6 Nganda bwika we yó eha kwendela mu jinjila ja Jihova,
Ni yó adituna kusota o itendelesu ya Jihova.
7 Dixibhyenu bhu pholo ya Ngana Jihova Sukeku, mukonda o kizuwa kya Jihova kyazukama.
Jihova wayudika kya o sata yê. Wazelesa o athu a exana kwala mwene.
8 “Mu kizuwa kya sata ya Jihova, nganda kastikala o ilamba, o an’a sobha,
Ni oso yó azwata o izwatu ya akwa ifuxi yengi.
9 Mu kizuwa kyenyokyo, o athu oso abanda ku ditala* nganda ku atalesa hadi.
Ni yó abhanga o usweya, anganala akwâ phala o mbote ya inzo ya jingana jâ.
10 Jihova wambe wixi:
“Mu kizuwa kyenyokyo, bhu Mwelu wa Mbiji bhwanda kala jingololo.
Mu Mbanza ya Ubhe, o athu anda ditenda.
Ku milundu kwanda tunda jibuya javulu.
11 Ditendyenu, enu mwatungu mu mbanza ya Makadexi,*
Mukonda o asumbixi oso a abwika.
Oso exile muzonga o phalata a ajibha.
12 Mu izuwa yenyoyo, nganda solokota Jeluzaleme ni tundeya.
Nganda kastikala yó katandanganya ni kima, axinganeka kwila,
‘Jihova kanda bhanga kima kyambote, né kima kyayibha.’
13 O jimbote jâ anda kwatambula-ju, o jinzo jâ anda jibula.
Ene a katunga jinzo, maji kanda kala-mu,
Anda kuna mividi, maji kanda nwa o vinyu yê.
14 O kizuwa kyonene kya Jihova kyazukama!
Kyazukama mwene, kya mukwiza ni lusolo lwoso!
O athu anda kala ni wôma mukonda dya jibuya ja kizuwa kya Jihova.
Mu kizuwa kyenyokyo, kate mwene ni mazonda a ita, akata mitendu.*
15 O kizuwa kyokyo, kizuwa kya njinda.
Kizuwa kya malamba ni jiphaxi.
Kizuwa kya kitembu kyanguzu, kizuwa kya mukondo.
Mu kizuwa kyenyokyo, kwanda kala kuvunda ni kitombe.
Kizuwa kya matuta ni kitombe kyonene.
16 Kizuwa kya kuxika koloneta ni kya kuta nzongo ya ita,
Phala kubwika o jisabhalalu ni jimbanza jofikidile.
17 Nganda bheka jiphaxi ku athu.
Ene anda kwenda kala ifofo,
Mukonda ate kituxi kwa Jihova.
O manyinga mâ, anda dimwanga bhoxi kala fufuta,
O midya yâ, yanda lukumuka kala matuji.
18 O phalata ni ulu yâ, kiyanda tena ku abhulula mu kizuwa kya njinda ya Jihova.
Ixi yoso anda ita túbhya.
Mukonda mwene wanda bwika, wanda bwika mwene o athu oso atungu mu ngongo.”