Habakuke
3 Musambu* wa kuditenda wa polofeta Habakuke:
2 Jihova, ngevu yalungu ni ibhangelu yé.
Yene ya ngibhangesa kudiwana, u Jihova.
Bhanga-yu dingi mu mivu ni mivu!*
Ijidisa-yu mu mivu ni mivu.
Tukwatele henda mu kithangana kya njinda yé.
3 Nzambi watundu ku Temane,
O Muthu Ukôla watundu ku Mulundu wa Palane. (Selá)*
O kutena kwê kwavungina o dyulu,
O ixi yezalele ni athu a muximana.
4 O kubhenya kwê kwedile kala mukengeji.
Ku lukwaku lwê kwexile mutunda jinzaji jisedima,
Kwene kwadiswekele o nguzu yê.
5 Nzambi watumikisa dibhebhu kwa yó exile ku pholo yê,
O yó akexile kudima dyê exile ni jifebele javulu.
6 Mwene wemana yu watungutisa o ixi.
Wateketesa o ifuxi mu ku atala lumoxi ngo.
O milundu yeneku tunde ukulu, a ilundumuna,
O tumilundu twokulu twa sengumuka.
Mwene wanda bhanga o ima yabhangele kya mu ukulu.
7 Ngamono o kutata mu jibalaka ja akwa Kuxi.
O jibalaka ja akwa Midiyana jateketa.
8 Jihova tata, o kwila walungulukila o jingiji?
O kwila o jingiji jene jiwakwatela o njinda?
Inga o njinda yé wa ikwatela o musanza wa kalunga?
Mukonda eye wendela ku thandu a jikabalu jé,
O makalu mé a ita abheka ubhulukilu.
9 Eye wakwata o mufula wé phala kutakula-nawu o jisosa.
O jisosa a jisolo kya. (Selá)
O ixi wa iwane mu jingiji.
10 O milundu yateketa kyoso ki ya kumono.
Kwanoko kyavulu, o menya ezalesa o ixi.
O menya koxi a musanza a kalunga anumu.
Adibhange mabhuku ya abande ku thandu.
11 O dikumbi ni mbeji yemana mu ididi yâ yadileka.
O jisosa jé jexile mubhenya, ja jimi.
O mufula wé wexile musedima kala nzaji.
12 Eye wendela mu ixi ni njinda yavulu.
Mukonda dya njinda o ifuxi wa idyota-dyota.
13 Eye weza mubhulula o mundu wé. Wabhulula yó wa musolo.
O mutwameni wa inzo ya akwa phulu, eye wa mubulu o mútwe.
O inzo yê wa ibulu tunde ku mukambu kate ku kaboko. (Selá)
14 O masoladi mê wa ajibha ni jimbala jâ,
Kyoso o mazonda a mutwameni wenyó kya tulungulukila kala kitembwe phala kutumwanga.
Ene asangulukile ni kixinganeku kya kubatamena o muthu watate phala ku mujibha.
15 Wa zawuka o musanza wa kalunga, ku thandu a jikabalu jé,
O musanza wexile ni mabhuku ala ni nguzu yavulu.
16 Kyoso kingevu kiki, wôma wa ngikwata, mu mala mwabunguluka.
Mukwivwa o njimbu yiyi, mizumbu yami yateketa.
Mukutu wami wabotomoka,
Inama yami yexile muteketa.
Maji nga mukingila ni mwanyu woso o kizuwa kyanda kwiza o divuwa,
Ku thandu dya athu a mututalesa o hadi.
17 Né mwene se o muxi wa mufiku ki ubhana ithulu,
O muxi wa muvidi ukamba kubhana ibundu,
Né mwene se o muxi wa midiva ukamba kubhana ibundu,
O mabhya we kabhana idima,
Né mwene se mu ibhanga mukamba jimbudi,
Mukamba we jihombo ni jingombe;
18 Né kiki, nganda ximana Jihova,
Nganda sanguluka kyavulu mukonda dya Nzambi o mubhuludi wami.
19 Ngana Jihova, Sukeku, mwéne o nguzu yami,
Mwene wanda kolesa o inama yami kala o inama ya ngulungu,
Wanda ngendesa mu ididi yadileka.
Phala o mesene ya jingimbidi, ni iselekete yami ya kwimba o tugoji.