Ku Akwa Loma

15 Maji etu twakolo mu kixikanu, twatokala kukwatekesa yó azoza mu kixikanu. Etu ki twa tokala kubhanga ngó o vondadi yetu. 2 Kala muthu mudyetu a sote kusangulukisa mukwâ ni ku mu bhangela o mbote, phala ku mu swinisa. 3 Mukonda katé mwene Kidistu ka soto ku di wabhela mwene, maji kala kyósoneke mu Mikanda Ikôla ya lungu ni mwene, exi: “O kixongwenu kya yó a ku xongwena, kya tula ku thandu dyami.” 4 Mukonda ima yoso yosoneke mu Mikanda Ikôla, a isoneka phala ku tulonga, phala bhukaxi ka kukolokota kwetu ni kiswinisu kya Mikanda Ikôla, tukale ni kidyelelu. 5 Kyenyiki, o Nzambi mukwa kukolokotesa ni kuswinisa o athu, a mikwatekese kukala ni kixinganeku ni kilunji kala kyakexile nakyu Kidistu Jezú. 6 Phala enu enyoso ni dízwi dimoxi,* muximane Nzambi, o Tata ya Ngana yetu Jezú Kidistu.

7 Kyenyiki, di tambululyenu mudyenu, kala Kidistu kya mi tambulula. Kiki kibhana kijingu kwa Nzambi. 8 Ngi mitangela kwila, Kidistu wadibhange mukunji wa Jijudé phala kulondekesa kwila Nzambi mukwa kidi, ni kwidikisa kwila o ikanenu ya bhangele Nzambi ku jikuku jâ, yeji dikumbidila. 9 Kiki kyabhiti we phala akwa jixi jengi aximane Nzambi mukonda dya henda yê. Kala kyosoneke mu Mikanda ikôla, exi: “Mukonda dya kiki, nganda kuximana mwaxaxe ka akwa jixi jengi, nganda kwimbila mimbu mu dijina dyé.” 10 Nzambi wambe dingi, wixi: “Enu mu akwa jixi jengi, sangulukenu kumoxi ni mundu wa Nzambi.” 11 O Mikanda Ikôla yambe dingi, yexi: “Ximanenu Jihova, enu enyoso mu akwa jixi jengi, ni ifuxi yoso imuximane.” 12 Izaya wambe we, wixi: “Kwa keza muthu* watokala ku mwiji wa Jesé, mwene wanda tumina o ifuxi. Athu oso anda mu dyelela.” 13 Kyenyiki o Nzambi mukwa kubhana o kidyelelu, a mibhane kusanguluka kwavulu ni kutululuka, bhukaxi ka kidyelelu ki mwala nakyu kwa mwene. Phala mu kutena kwa nzumbi ikôla, o kidyelelu kyenu kivule dingi.

14 Enu jiphange jami, ni kidi kyoso ngejiya kwila mwene mubhanga jinga ima yambote. Ngejiya we kwila enu mwezala ni kwijiya kwoso, ni kwila mutena kudilonga mudyenu. 15 Nga mi sonekena ni kidi kyoso yalungu ni maka enyá phala ku mi lembalesa dingi. Ngibhanga kiki, mukonda dya ngalasa ya ngi londekesa Nzambi. 16 Eme ngi mukunji wa Kidistu Jezú phala o athu akwa jixi jengi. Nga mubhanga o kikalakalu kikôla kya kuboka o njimbu yambote ya Nzambi, phala akwa jixi jengi akale sata ixikina Nzambi bhukaxi ka nzumbi ikôla.

17 Eme nga sanguluka mu kukala ngi dixibulu dya Kidistu Jezú, ni mu kubhanga o kikalakalu kya Nzambi. 18 Eme ki nganda zwela yalungu ni kima kyoso-kyoso ki nga bhange. Maji nganda zwela ngó yalungu ni ima yabhange ni ya zwela Kidistu bhukaxi kami, phala kukwatekesa akwa jixi jengi ku mu tumaka. 19 Ene atumaka mukonda dya isumwa ni madiwanu bhukaxi ka kutena kwa nzumbi ya Nzambi. Mu kyenyiki, tundé mu Jeluzaleme katé ku mbanza ya Ilidiku, nga boko mu ididi yoso o njimbu yambote yalungu ni Kidistu. 20 Eme ngabhange yoso phala ki ngi boke o njimbu yambote mu ididi mwejidile kyá o dijina dya Kidistu, mukonda ki ngi mesenene kusuluka ni kikalakalu kya muthu wengi.* 21 Kala kyosoneke mu Mikanda Ikôla, exi: “O yó kiluwa évwa yalungu ni mwene, anda mwijiya, o yó k’evwile kima kyalungu ni mwene, anda tetuluka.”

22 Mukonda dya kiki, muveji javulu a ngi fidisa ku mikunda. 23 Kindala nga zubha kyá o kikalakalu kyami mu madyembu yá. Mu mivu yavulu* nga mesenene ku mikunda. 24 Kyoso ki ngandaya ku Xipanya, nga mesena ku mi mona. Ki twanda zubha kukala kumoxi tu ithangana ni kusanguluka kwoso, nga mesena kwila, mu ngi xinjikila bhofele mu njila. 25 Maji kindala nga muya ku Jeluzaleme phala kukwatekesa o jiphange.* 26 Mukonda o jiphange akwa Masedonya ni akwa Akaya, asangela ima ni kusanguluka kwoso, phala kukwatekesa o jingadyama ku mundu wa Nzambi* mu Jeluzaleme. 27 O jiphange jiji, akwatekesa ni kusanguluka kwoso, mukonda amono kwila exile ni dikongo kwa ene. Kiki kyabhiti mukonda o jiphange akwa Jeluzaleme awanene o ima yâ mu nzumbi ni jiphange akwa jixi jengi. Kyenyiki o jiphange jiji atokalele we kuwana o jimbote jâ ni jiphange mu Jeluzaleme. 28 Kyoso kinganda bhixidisa o ima yasangela o jiphange, ngandaya ku Xipanya. Mu kuya kwenyóko, nganda mikunda. 29 Ngejiya kwila kyoso kinganda mikunda, nganda mibhekela mabesá avulu a Kidistu.

30 Nga midyóndo, phange jami, bhukaxi ka Ngana yetu Jezú Kidistu ni mu henda ijila bhukaxi ka nzumbi ikôla, ngi mi tendelesa kwila, kolokotenu mu ku ngi sambela kwa Nzambi, kala ki nga mubhanga we eme. 31 Sambenu phala ngi bhuluke bhu maku a yó ala mu Judeya kene mu londekesa kixikanu kwa Jezú. Phala o ima yasangela o jiphange i nga mu kwambata phala o mundu wa Nzambi mu Jeluzaleme, a itambule mwene ni ujitu woso. 32 Kyenyiki, se Nzambi wa kyandala, ngandaya ku mikunda ni kusanguluka kwoso ni tu diswinise mudyetu. 33 O Nzambi mukwa kubhana o kutululuka, akale ni enu. Kyene!*