Matendelelu
32 “Enu enyoso ku dyulu ivwenu i nganda zwela,
Enu enyoso mu ngongo ivwenu o maka u nganda zwela.
2 O ulongelu wami wanda noka kala mvula,
O izwelu yami, yanda lawuka kala dimume,
Kala mvula isuma ku thandu a ixoka,
Kala mvula inoka ku thandu a yangu.
3 Mukonda nganda fumanesa o dijina dya Jihova.
Zwelenu yalungu ni unene wa Nzambi yetu!
4 Mwene Ditadi dyonene, ibhangelu yê yoso yayuka,
Mukonda o jinjila jê joso jayuka.
Nzambi tutena ku mudyelela,
Mwene kimukwa mangonya, mwene muthu wayuka.
5 Éne abhange o ima yayibha,
Ene ki an’a Nzambi kana, o kitondalu kya éne.
Mwiji wayibha, wadyanguka!
6 Mukonda dyahi mwa mubhukumukina Jihova?
Enu mu mwiji watobho, wakambe o kilunji.
Kimwene Tat’enu wa mibhange,
Yó wa mibhangesa kutunga ni kusoma?
7 Lembalalenu o izuwa ya xahulu,
Xinganekenu o mivu ya miji ni miji yokulu.
Ebhulenu o jitata jenu, ene anda mitangela-kyu,
O adyakimi mwaxaxi kenu, ene anda mijimbulwila-kyu.
8 Kyoso o Sukeku kyabhana undundu ku mwiji ni mwiji,
Kyoso kya wanuna o an’a Adá mu ibuka-ibuka,
Mwene waxindi o jimbambe ja ifuxi,
Kala kyasoko o an’a Izalayele.
9 O mundu wa Jihova wa mutokala.
Kyene, Jakobo watokala kwa mwene.
10 Mwene wa asange mu kiphulungunzu,
Mu kikangalakata kyahatu, mwexile jibuya jikwatesa o wôma.
Wa alanga, yu wa akondeka kyambote.
Wa alangidila kala mon’a dyesu dyê.
11 Kala o holokoko ilonga o twana twê kutuka,
Ibutama ku thandu a twana twê,
Izala o mabhabha phala ku azangula,
Anga utwambatela ku isala ya mabhabha mê,
12 Jihova mwéne ngo wexile mu mwendesa,*
Kikwexile nzambi yengi wexile-nê.
13 Wa mwendesa kala kabalu mu ididi yadileka ya ixi,
Kyenyiki, wa mudikila bhukaxi ka idima ya mabhya.
Wa mudikila we ni wiki u tunda ku ndanji,
Ni máji atundu ku ndanji,
14 Ni mandeka o bhange ni lete ya jingombe ni lete ya jimbudi,
Kumoxi ni jimbudi jambote,
Ni tumbudi twa Basane ni isutu ya hombo,
Kumoxi ni tiliku yambote,
O ku jiuva jozuke, wanu-ku vinyu.
15 Kyoso Jesulume* kya nete, wabhukumukina ngana yê.
Kyene, eye wanete, wakomo, wekuta kyavulu.
Mukiki, wabhana dikunda kwa Nzambi wa kubhange,
Wasebhulula o Ditadi dyonene dya ubhulukilu wé.
16 A mukwatesa njinda mukonda dya kubheza jinzambi ja akwa jixi jengi,
A muluwalesa mu kubhanga ima yayibha.
17 Exile mubhakula jisata ku madimonyo, o kwa Nzambi kana,
Ku jinzambi kajijidile,
Jinzambi ja ubhe, ja sange ngo kindala,
Jinzambi o jikuku jâ kajijidile.
18 Enu mwajimbi Nzambi yenu wedi kala Ndanji, yó wa mibhange,
Kimwalembalala o Nzambi wa mibhana o mwenyu.
19 Kyoso Jihova kyamono o ima ya bhange, ka axikina,
Mukonda o twana twê twa mala ni twa ahatu a muluwalesa.
20 Mukyenyiki, mwene wambe: ‘Nganda ku abhana dikunda,
Ni ngimone yanda bhita ni ene.
Mukonda ene mwiji wabhukumuka,
Ana akambe ufiyele.
21 A ngiluwalesa kyavulu mukonda dya jinzambi ja makutu,
A ngiluwalesa mu kubheza iteka yakambe o valolo.
Nganda ku abhangesa kukala ni difuba bhukaxi ka athu katokala ku mundu wami,
Nganda ku aluwalesa ni kifuxi kyakambe kilunji.
22 Kuma o njinda yami ya wama túbhya,
Túbhya tutu twanda wama kate mu Mbila* yazongo,
Twanda bwika o ixi ni idima yê,
Twanda kwoha o madisesa a milundu.
23 Nganda bandekesa o jiphaxi jâ,
O jisosa jami joso nganda jilungila kwa ene.
24 Anda tala hadi* ni nzala,
Jifebele janda ku abwikisa ni ku ajima o mbutu.
Nganda ku atumikisa yama phala ku anumata,
Ni jinyoka jendela ku mavu phala ku anumata.
25 Ku kanga dya jinzo jenu, o xibhata yanda jibha o twana twenu,
Mu jinzo jenu o athu anda kala wôma,
O munzangala wa diyala ni kilumba*, anda kala ni wôma,
O kabwetele ni mwadyakime wa diyala wala kya ni jimvi, anda kala ni wôma.
26 Eme ngamesenene kuzwela: “Nganda ku amwanga,
Nganda bhangesa o athu ku ajimba,”
27 Maji kingakizwela mukonda ngexile ni wôma wa ima yeji zwela o jinguma jami,
Mukonda o jinguma ejitena kubanza kyayibha.
Ejitena kuzwela kiki: “Twatambula o kikôwe mukonda dya nguzu yetu,
Ki Jihova wabhange o ima yoso yiyi kana.”
28 Mukonda ene kifuxi kyakambe o kilunji,
Mwaxaxi kâ kibhwala muthu watetuluka.
29 Tamanu se exile jinjimu! Eji xinganeka mu maka yá.
Eji banza mu ima yeji bhita ni ene.
30 O muthu umoxi weji tena kyebhi kumwanganesa o midi ya athu?
Kyebhi athu kiyadi kyeji tena kukayesa o dikwinyi dya midi?
Kyeji bhita ngo se Nzambi yâ wedi kala Ndanji, wa abhanene dikunda,
Se Jihova wa abhakwile bhu maku a jinguma jâ.
31 Mukonda o ditadi dya jinguma jetu kidyadifu ni Ditadi dyonene dya Izalayele,
Kate mwene o jinguma jetu ejiya o kidi kiki.
32 Mukonda o dibhya dyê dya mividi dyatundu ku mividi ya Sodoma,
Ni ku mikáwu ya ixi ya Ngomola.
O jiuva jê, jiuva jijibhisa,
O isaka yê yalulu.
33 O vinyu yê yedi kala mathe a jinyoka,
O mathe a swiji.*
34 Ibhangelu yâ yoso nga ibhake,
Nga ijika ni kidimbu mu kididi kyami kya kubhaka o ima.
35 O phonzo ya ngitokala éme, éme we nganda ivutwila,
Mu kithangana kyoxinde, kyoso kyanda xalumuka o kinama kyé,
Mukonda o kizuwa kya kibwika kyé kyazukama,
O ima yanda bhita, ya mu kwiza ni lusolo.’
36 Jihova wanda fundisa o mundu wê,
Wanda kwatela henda ku jiselevende jê,
Kyoso kyanda mona kwila o nguzu yâ yatolo kya,
Ni kwila kwasubhuka ngo yó wakambe woso u mukwatekesa ni yó wazoza.
37 Mwene-phe wanda zwela: ‘O jinzambi jâ jala kwebhi,
O ditadi kwayile musotela o dilengelu?
38 Kwebhi kwala o jinzambi jexile mudya o banya ya jisata jenu,*
Ni kunwa o vinyu ya jisata jenu ja mauholwa?
Eze-phe, a mikwatekese.
Akituke o dilengelu dyenu.
39 Kindala talenu kuma, éme mwene ngo ngi Nzambi,*
Kikwala jinzambi jengi, éme ngo mwene.
Ngala ni kutena kwa kubwika ni kwa kubhana o mwenyu.
Eme ngi kwama, eme ngi saka,
Kikwala muthu utena kubhulula mukwa bhu makwami.
40 Kuma ngaleka o lukwaku lwami ku dyulu,
Ngaloka mwene, ngixi: “Kala ki ngene ku mwenyu kate ku hádya ni hádya,”
41 Kyoso ki nganda zwika o xibhata yami ibhenya,
Nganda disokejeka phala kufundisa,
Nganda vutula phonzo ku jinguma jami,
Nganda vutula we phonzo kwa yó a ngizembe.
42 O jisosa jami janda kwizala* ni manyinga,
O xibhata yami yandadya xitu,
Kumoxi ni manyinga a yó a ajibha ni a yó a akwika,
Ni mítwe ya atwameni a jinguma.’
43 Enu mu ifuxi, sangulukenu kumoxi ni mundu wê,
Kuma mwene wanda vutula phonzo mukonda dya manyinga a jiselevende jê,
Wanda bheka hadi ku jinguma jê,
Wanda zelesa o ixi ya mundu wê.”
44 Mukyenyiki, Mozé weza yu watumbula o izwelu yoso ya mwimbu yú, bhu pholo dya mundu, kumoxi ni Ozeya* mon’a Nune. 45 Kyoso Mozé kyazubha kutumbula o izwelu yoso yiyi, ku mundu woso wa Izalayele, 46 wa ambela, wixi: “O izwelu yoso i nga mu mitendelesa lelu mu ilunda ku muxima, phala mutendelese o twana twenu, ene n’a kumbidila o izwelu yoso ya Kijila kiki. 47 Mukonda o izwelu yiyi, ki izwelu ya kingoho, ilombolola mwenyu phala enu. Se mubelesela o izwelu yiyi, mwanda kala ni mwenyu mu mivu yavulu, mu ixi i mwanda lundula kyoso ki mwanda zawuka o ngiji ya Njolodá.”
48 Mu kizuwa kyenyokyo, Jihova wambela Mozé, wixi: 49 “Banda ku mulundu yú wala ku mbandu ya Abadimi, o mulundu wa Nebu, wala mu ixi ya Mowabe, bhwa zukama ni Jedikó, utale o ixi ya Kanana i nganda bhana ku akwa Izalayele kala undundu. 50 Mukyenyiki, wanda fwila ku mulundu ku wanda banda. Wanda fwa kala kyafu phang’yé Alá ku mulundu wa Hole, 51 mukonda kiyadi kyenu ki mwa ngilondekesa ufiyele mwaxaxi ka akwa Izalayele, bhu mbandu a menya a Mediba, ku Kadexi, mu kikangalakata kya Zini. Ki mwa ngijingisa bhu pholo ya mundu wa Izalayele. 52 O ixi i nganda bhana ku mundu wa Izalayele, wanda i mwena ngo dikanga, maji kiwanda bokona-mu.”