Ku Akwa Loma
14 Tambululenu o muthu watolo o kixikanu, maji kanenu kufundisa yó kàla ni ixinganeku yadifu ni yenu. 2 O muthu wala ni kixikanu kyakolo udya ima yoso. Maji o muthu watolo o kixikanu udya ngó ifwata. 3 O muthu udya ima yoso, katokala kusebhulula yó kene mudya o ima yoso. Woso ukamba o kudya, katokala kusebhulula yó udya, mukonda Nzambi wa mutambulula. 4 Éye nanyi phala kufundisa o selevende yangene? O ngana yê mwéne u mutangela se walungu mba wabele. Ni kikwatekesu kya Jihova, mwene utena kuditunda kyambote.
5 Sayi athu abanza kwila kizuwa kimoxi kya betakota, o izuwa ya mukwá ndenge. Maji athu amukwá abanza kwila o izuwa yoso yasokele ngó. Kala muthu atetuluke ku muxima wê yoso yaxinganeka. 6 Woso uxinganeka kwila kizuwa kimoxi kyabeta dingi kota, abhange kiki phala kuximanesa Jihova. O athu adya ima yoso, adya phala kuximanesa Jihova, mukonda ene asakidila Nzambi. O yó kene mudya, akibhange we phala kuximana Jihova, mukonda ene mu sakidila we Nzambi. 7 Sé-ku muthu mudyetu wala ku mwenyu phala ku diximanesa, sé-ku muthu we udifwila ngó mwene. 8 Se twala ku mwenyu, twala ku mwenyu phala kuximanesa Jihova, se tufwa, tufwila phala kuximanesa Jihova. Kikale se tukala ku mwenyu mba tufwa, twatokala kwa Jihova. 9 Kiki, kyene kyabhangesa Kidistu kufwa ni kuvutuka ku mwenyu, n’a kale Ngana ya athu afu ni ya athu ala ku mwenyu.
10 Maji mukonda dyahi eye wa mufundisa phang’yé? Mba mukonda dyahi wa mu musebhulula? Kuma etu enyoso twanda kwimana bhu pholo ya Nzambi, phala ku tufundisa. 11 Mukonda o Mikanda Ikôla, yamba: “Jihova wambe, wixi: ‘Kala kingene ku mwenyu, athu oso anda ngi fukamena ni kwijiya kwila, éme ngi Nzambi.’” 12 Kyenyiki, kala muthu mudyetu, wanda bhakula jikonda kwa Nzambi.
13 Ki mudifundise dingi mudyenu, ki tubhange kima kyoso-kyoso kibhangesa phang’yetu kuzoza mu kixikanu kyê, mba ki mubhangesa kudibhala. 14 Bhukaxi ka Ngana Jezú, ngejiya ni kidi kyoso kwila, sé-ku kima kya dixidila ngó. Maji se muthu uxinganeka kwila sayi kima kyaxidi, phala mwene kima kyayibha ku kidya. 15 Se phang’yé udivwa kyayibha mukonda dya kudya ku udya, eye ki wa mulondekesa dingi henda. Kana kuzozesa o kixikanu kya phang’yé mu kudya ku udya, mukonda Kidistu wa mufwila. 16 Kanenu kwehela muthu woso-woso kuzwela kyayibha mu mbote i mubhanga. 17 Mukonda o Utuminu wa Nzambi kikima kyalungu ni kudya, mba kunwa. Maji o kima kya betakota, o kuyuka, kutululuka, ni kusanguluka bhukaxi ka nzumbi ikôla. 18 Woso usidivila Kidistu mu ukexilu yú, u sangulukisa Nzambi, a mu wabhela we ku athu.
19 Kyenyiki, tu sotyenu o ima ibhekela o paze ni ima i tu swinisa mudyetu. 20 Kanenu kuzanga o ikalakalu ya Nzambi mukonda dya kudya. Mu kidi o makúdya moso atena ku adya mwene, maji kyayibha kudya o kima kizozesa o kixikanu kya mukwenu. 21 Kima kyambote kukamba kudya xitu mba kunwa vinyu, mba kubhanga kima kyoso-kyoso, kibhalesa phang’yé. 22 O kixikanu kiwala nakyu kikale kya eye ngó ni Nzambi. Wazediwa o muthu kyoso kyabhanga o ima yamona kwila yayuka, kaditatela. 23 Maji se muthu wala ni phata yalungu ni kudya, anga udya, mwene ukala ni kikuma. Mukonda mwene kadi bhukaxi ka kixikanu kyê. Maji kima kyoso-kyoso ki tubhanga ki kyalungu ni kixikanu, kituxi.